Wẏtleken sẏ alle den ghenen de dissen Bryͤf seen oder lesen horen . Dat die erbaren knechte der kortzenwerchte(re) to Stendal hebben ghebeden den Erlẏke(n) ma(n)nen / oren ghildemeiste(re)n des seluen werckes to gheue(n)de eẏnen brẏf in sodanen stucken stede vnd ghantz to toholdene alse hir na bescreuen stan . Des hebben en der kortzen=/werchten besworen ghildemeiste(re)n met vulborde . vnd met rade orer ghemeẏnen ghildebrode(re)n vnd sunderlike(n) met guden willen der heren der Ratma(n)ne to stendal lutterli=/ken dorch god gheghu(n)net vnd gheorlouet . vnd wan id der Ratma(n)ne wille nicht en is . vnd en nicht lengher behaghet . so scal disse brẏf aue sẏn . vnd ne schal neẏne macht / mer hebbe(n) . To deme irste(n)male schal iowelk knecht de sik to stendal i(n) orem wercke vermedet sẏnen godes pe(n)ningh gheuen in de Busse , de de knechte ghetughet vnd maken heb=/ben laten to irer nuͦt . vnd to den stucken de hirna ope(n)ba(r)e werden . Dat iowelk meẏsterknecht alle jare scal to iowelkem verndeil iares i(n) de Busse gheuen twe pe(n)ningh(e) . vnd de ju(n)=/ghe knecht enen pe(n)ningh . We hir an Brict , de schal den knechten beteren met eẏnem haluen pvnde wasses ane ghnade . Vortmer welk knecht den anderen mẏshandelt . met worden . / edder myͤt werken . de scal ok beteren met eẏnem halue(n) punde wasses den knechten . Welk knecht ok verdobbelt sẏne cleẏdere . edder verspolet sẏne pende also dat he dar vmme ghevn=/neret , vnd ghehonet . de scal beteren den knechten met eynem haluen pvnde wasses . Ok weret sake dat e(n)nich kortzenwerchter knecht vntmechtich . vnd kranc worde sẏnes lẏes / deme schalmen van deme ghelde vt der busse lẏen to syner noet vẏf schillinge pe(n)ninghe icht he so arm sẏ dat he der pe(n)ninghe nicht ne hebbe . Vortmer weret dat de krancke=/ knecht hir bouen to sẏner noet met pe(n)ninghe bedorfte . de scolen en lyen de meẏster , vnd de knecht de de Busse met den pe(n)ninghen bwaren . vnd sẏ scolen dat holden na orer twier / rade . vnd we(n)ner de krancke knecht ghesunt wirt . so schal he in vnsem wercke de vorscreuen gheleghene pe(n)ninghe wedder gheuen den knechten in ire busse . Welk knecht hir / an wedderstreuich worde . vnd der pe(n)ninghe nicht wedder gheuen ne wolde . Den knecht ne schal neẏn kortzenwercht(ere) meister noch e(n)nich ghildebroder in sẏnem wercke holden to sten=/dal wedder der knechte wille . Welk ghildebroder den knecht hirbouen hilde . de scal de pe(n)ninghe gheuen in de Busse de de knecht schuldich is ghebleuen . Ok we(re)t sake dat etlich / knecht storue deme pe(n)ninghe gheleghen weren to sẏner vt der knechte Busse van irme ghelde . wat de knecht let na sẏnem dode . Dar scolen de behudere der Bussen der knechte / ghelt wedder anwardende wesen ane vortoch . Des sint ok de ghildemeiste(re) der kortzenwerchten met oren ghildebrode(re)n to stendal . vnd met oren knechte(n) dar selues eẏndrechtich / gheworden . also dat welkorer steruet van den ghildebrode(re)n . edder van den knechten . Den scolen si alle in sament luden laten . vnd met vilgen . vnd met sylemissen laten be / ghan . vnd scolen ou(er) en opperen . vnd nemant schal to wercke ghan we(n)ner man dat lẏk des morghens to der kercken dreghet . er de dode to der erden be stadet sẏ . Wyͤ sik an / dessen stucken versuͦmet de schal den knechten beteren myͤt eynem haluen punde wasses . Id ne were dat id eme redelike noet be nyͤme de he bewisen muͦchte . Ok scolen de knechte / der kortzenwerchte(ren) ghilde baldeken vnd de lyͤchte ghebruken to iren noden in allen tẏden lẏke oren ghildebroderen . Dar vmme scolen de knechte met oren ghelde / vt orer busse . dat Baldeken vnd de lyͤchte der ghilde helpe(n) Beteren we(n)ner en des noet is nach rade der besworen meẏste(re) . vnd des knechtes de dar to in der / tẏd ghekoren is . Desse vorbenomede knechte busse met orem ghelde scolen bwaren vnd i(n) orer behalt hebbe(n) de besworen meẏste(re) . De busse schal hebbe(n) twe slote / vnd twe slotele . Des scolen hebben de besworene ghildemeẏste(re) eynen slotel . vnd den ande(re)n slotel schal de knecht hebbe(n) de van sẏner cu(m)pane weghen dar to ghekoren wirt . vnd / were dat ok . dat de ghekoren knecht by(n)nen der tid in sẏnem jare wande(re)n wolde so schal he des vullemacht hebbe(n) . Dat he in sẏne stede eẏnen anderen bedderuen knecht kẏse . de / em dar to bequeme du(n)cket wesen . vnd welk knecht hir to ghekoren wert . vnd des weighert . wo dicke dat he weẏghert so dicke scal de knecht bete(re)n sẏnen cu(m)panen met eẏnem / haluen punde wasses . Vortmer scolen ok der kortzenwerchten ghildemeiste(re) met oren ghemeẏnen ghildebrode(re)n to stendal . vnd met vns knechten vnse ku(m)pane die disse vorscreue(n) / stucke ghestichtiget vnd ghedichtet hebbe(n) die hir na bescreuen stan in eẏnem ande(re)n bryue began laten met ludende . met vilgen . vnd met sylemẏssen . We(n)te sie ore almuͦssen i(n) godes / ere hir tu ghegeuen hebben . sie steruen bute(n) landes . edder rede ghestoruen sẏnt den god allen ghnade id si wor dat si . likerwise icht de knechte hir to stendal ẏeghe(n)twardige(n) gestor/uen weren . vnd scolen de knechte laten baren in der besworen meẏster(e) huse . iowelken knecht bẏsunde(re)n . alse vruͦ alse en dat witleken wert ghedan dat sie irstoruen sẏnt . Dat alle / disse vorscreue(n) stucke dẏsses bryͤues . vnd eẏn ẏchlik bẏsunde(re)n . de kortzenwerchte(re) knechte to stendal . de nuͦ sẏnt . vnd noch tokomen . stede vnd ghantz holden willen vnd holde(n) scolen / Des hebbe wẏ ghildemeiste(re) der kortzenwerchte met rade . vnd met vulborde vnser heren der Ratma(n)ne , vnd vnser ghildebrode(re) met recht(er) witzschap vnser ghilde Jngheseghil to / orkunde laten hengen an dessen Brẏf .Do Ratma(n)ne weren . Ghyse wẏneke(n)s . Etzel duser . Enghel hẏdde . Vritze roxtze . Ghereke ẏerchow . Claws kastel . Ghereke bẏsmark(e) / Cone dornstede Cone ghunter . Enghel kastel . Thideke zippelingh . vnd Hans dernevitze . Ghildemeẏstere weren . Thideke boldekens . vnd olde Claws hane . Ghe gheue(n) Na / ghoddis Bort , Dusent Jare Drẏhundert Jare . Jn deme twevndsoue(n)tighestem Jare . Jn deme hilgen Daghe Der bort der hilgen Ju(n)cfrowen Marien vnser vrowen