Ik her gheuerd van alue(n)seleue ridder wonachtich thuͦ calue mas van ghorne wonachtich thuͦ ghorne Wẏ be kenne(n) openbare i(n) dessen / breue thuͦ alle den de dessen bref seen vn(de) horen lesen dat wẏ vn(de) vnse rechten erue(n) schuldich sint van rechter schult , / salomon vn(de) ẏsaak Joden thuͦ stendal vn(de) eren rechten eruen sestich brandenb(ur)g(ische) mark suluers de wẏ scholen vn(de) willen / en be reẏden thuͦ wẏnachten de neghest thuͦ komende is wer dat wẏ dat ghelt nicht gheue(n) den Joden vppe de / vorbenomeden tẏd so loue wẏ vn(de) willen en gheue(n) vppe Jewelke mark thuͦ Jewelker weken ses stendalsche pen=/nẏnghe thuͦ woker vn(de) wan de vobenomeden Joden des nicht lenk willen vntberen van vns vn(de) manen vns / dar v(m)me edder laten vns dar v(m)me manen v(m)me eren houͮetstuͦl vn(de) woker so wille wẏ komen in de stad thuͦ / stendal ofte in ey(n) ander stad wor dat den Joden be quemest is vn(de) dar nicht vd thuͦ komende wẏ en hebben / sẏ be reẏt houetstul vn(de) woker met reden ghelde edder met nuͦghafteghen panden dẏt loue wẏ her gheuerd / vn(de) mas van ghorne vn(de) vnse rechte eruen met gantzen truͮwen vn(de) met eẏner zamendenhant stede / vn(de) vaste thuͦ holdene sunder aller leẏge arghelist vnde suͦnder bosemeẏninghe thuͦ eẏner groteren be kant=/nẏsse hebbe wẏ vnse Jngheseghele met witschap vn(de) met guͦden willen ghe henghen an dessen bref ghe scre=/uen na godes bort druͦtteẏnhuͦndert jJare dar na in deme vive vn(de) achteghesten Jare des neghesten son=/daghes vor mẏtuasten