Ik henni(n)gh van sanne wonachtich thuͦ sanne zakeweldeghe des na be screuen gheldes ghereke van nẏenker=/ken vn(de) Juͦnghe hans osterholte knapen borghen vn(de) medelouere wẏ be kennen vn(de) be tuͮghen openbare / met dessen breue dat wẏ louen vn(de) hebben ghe louet in guden truwen vn(de) met eẏner zamendenhant / abraham , salomon moseen sẏne(n) sonen vn(de) mattana sẏnen broder Joden thuͦ stendal vn(de) eren rechten / eruen achte mark vn(de) eẏne(n) veẏrdink brandenb(ur)g(ischen) suluers stendal(scher) wichte vn(de) ghe were de loue / wẏ en thuͦ be reẏdene vn(de) scholen en dar hauͮe vor gheuen in der stad thuͦ stendal nuͦ thuͦ sunte / mertens daghe de neghest thuͦ komende is vn(de) wer dat wẏ der haue nicht eẏn kuͮnden werden / so scholen de Joden kesen eẏnen bedderuen man vn(de) dar schole wẏ eẏne(n) teghen kesen vn(de) de / scholen vns vntschichten vn(de) wes de bedderue lude segghen dat de haue werdich is dar scholen / sẏ de Joden vor nemen dẏt loue wẏ knapen vorbenomet alle in guden truwen vn(de) met eẏner / zamendenhant dessen vorscreue(n) Joden stede gantz vn(de) vaste thuͦ holdene ane vortoch ane bosemeẏ=/ni(n)ghe ane hulperede vn(de) sunder allerleẏge arghelist , thuͦ eẏner grotere(n) be kantnisse hebbe wẏ / vnse Jngheseghele vntleken thuͦ thuͮge laten henghen an dessen bref ghe screue(n) na godes bort , / druͦtteẏ(n)huͦndert Jare dar na in deme sesse vn(de) achteghesten Jare des anderen daghes na phi=/lippi vn(de) Jacobi der hilghen apostele ,