Jn nomine domini amen wy Gherwere Schomakere bekkere burenmakere korsewrechtere / vn(de) lakenmakere yn vnses heren stad to stendal synt eyndrachtych ghe worden dorch ere / wylle vnde dorch vromes wylle der gantzen stad ofte ennych ynual queme dat were buten edder bynnen / scolde wy dar enneghen nod v(m)me lyden dat wylle wẏ met eyndrachtycheyt vt draghen vnde wy wyllen den / Ratmannen nene ede mer don wen der stad beste vnde der gulde beste alzo vnse bryue vt wysen ok wylle wy / nenen wylkore mer ghe setted hebben ouer vns wen eyn stad recht ys wy don dat met eyndracht der gulden / Vortmer synt wort ghe vallen vor den guldemeysteren ghemeyne me dorfte franke bodekers reyse nycht mer / maken vnde scolde ennych kryeth vp stan so wolde he dat de scheghe yn syne(n) iuͦnghe(n) yaren de wẏle dat he / syne knoken reghen muchte dorch der wort wylle gynghen de guldemeystere yn enen Rat vnde vruchten / sek dat de daet scolde volghen nach den worden ofte me ymande vor weldeghen wolde dorch hates wylle / den wylle wẏ be hulpen wesen met lyue vnde met gude alzo verne alzo syn recht wendet yn vser enynghe / ok ofte manket dessen meysteren ymant were de syk vor sproke met worden vnde dede ¹ dat den meynen gulden to / guͦde vnde to vrome vnde der meynen stad den wylle wy nycht vͦt vns gheuen wy wyllen en vor dedynghen / synes rechtes hyr vp scal syk nemant vor laten he scal don alzo vele alzo recht ys desse vor benomeden stukke / loue wy stede vnde² de hyr vor bescreuen stan loue wy stede vnde vaste to holdende alzo bedderue lude yn truwen / vnde yn eren Ghe screuen na godes bort dusent yar dry hundert yar yn den souene vnde achteghesten / yare yn sunte liuinus daghe des hylghen merteleres amen