Wẏ Radmanne der stad to Stendal Bekennen vnde betughen openbar , med dessem(e) brẏue , dat wẏ med Rade vnd(e) med / fulborde vnser eldesten vnde wisesten borghere , dorch eyndracht wille in vnser erghenante(n) stad to stendal ewichliken / toblẏuende , med den vorsichtigen wisen luden allen guldemeisten vnsen besunde(re)n vnde med vnse(n) lyuen ghemeynen / borghere(n) . to Stendal sẏnt eẏn gheworden desse stucke toholdende di hir na ghescreuen staͤn To deme irsten male dat me / vnser stad grote Inghesegel sunderliken schal besluten in eynem(e) schrẏue med Twen slottelen vnde dat sulue schryͤn med . / deme grote(n) Inghesegel schal me vort an besluten in eynem(e) ku(m)me med achte slottelen vnde wẏ vorbenomede Radma(n)ne / schullen di twe slottele hebben van deme vorscreue(n) . schrẏue , vnde di meistere van allen gulden schullen hebben dẏ . / achte slottele van deme ku(m)me dar dat schrẏn med deme grote(n) Inghesegel in ghesloten is , also dat van den selue(n) achte . / slottelen di meẏster(e) van isliker gulde eyne(n) slottel schullen nemen , vnde men schal med dem(e) vorbenomeden grote(n) . / Jnghesegel nicht vorseghelen id enschee de(n)ne med witschap vnde med fulborde der meẏstere van allen gulden Vortmer / schulle wẏ noch enwillen neẏn Nẏe ghesette setten ane witschap vnde fulboͤrt der , meyster(e) van allen gulden , Vortmer / Nẏmand schal eẏghen reysen stichten edder sik laten bidden van synen vrunden di wolde riden v(m)me vrommet guͦd / dar vnsem(e) heren deme lande vnde den steden vigende moghen ane werden ane witschap vnde fulboͤrt des rades vnde . / der meẏste(re) van allen gulden wẏ sik dat an vorsu(m)mer , di schal van stu(n)t an di stad ruͤmen vnde also lange dar enbute(n) . / blyuen , bed dat he deme Rade vnde den meysteren van allen gulden dar v(m)me eyn wandel ghedan hebbe nach erem(e) rade . / also dat deme Rade vnde den meẏstere(n) van allen gulden dar wol anghenuͦge Sunder worde ymand dar mede beteghe(n) / dat he dat ghedaͤn hedde vnde he sede sik des vnschuldich So schal he der stad der andedinge benemen edder he schal / sik des entleddige(n) sulff drudde vnsen borgheren vmbesproken bedderuen luden vppen vilghen , Ok schulle wy Raͤd=/manne vorbenomet alle iaͤr twie Rekenschap doͤn den meẏsteren van allen gulden vnde wẏ schullen en vor dẏ / Rekenschappe di schoͤt brẏue lesen laten also dat sẏ horen wẏ syn schoͤt hefft ghegeuen edder nicht , vnde vor dẏ , / Rekenschappe schulle wy der stad schulde vnde wes van deme richte velt ghentzliken manen vnde schullen ok eyn / jslik dingh suͤmmen van alle deme dat wẏ vpnemen vnde vͤtgheue(n) . van der stad weghen vnde also dicke alse men / Reͤkend schulle wẏ den meiste(re)n van allen gulden seggen offt di stad ermer edder riker is gheworden vnde desse Reken=/schap schulle di meistere van allen gulden toende vͤthoren Vortmer nymand schal vnreẏnicheit werpen in die vehte . / vnde di vorfuͤllen vnde nymand schal tobreken edder tohowen di Schuttebrede di dar to ghemaket werden also dat / dat vor[... ?] wan des tyͤd is in reͤdelcheit mach doͤrch di stad vliͤten wy sik dar an vorsu(m)met di schal dat beteren bẏ . / der staͤd koͤre Vortmer Schege dat an dessen stucken di hir voͤr ghescreuen staͤn Je(n)nigh brok worde , wes wy doch nicht / enhopen So schullen di meẏstere van allen gulden dat med eẏn ander(en) van vns vorde(re)n vnde manen also dat id gescheͤ / vnde were de(n)ne Je(n)nigh meẏster mangk en di des med vorsate edder med freuele also nicht wolde helpen manen vnd(e) / dar mede toghaͤn sunder echte noͤt vnde redelike hulperede di schal vͤt der guldemeister(e) vrake blue(n) . vnde sy schulle(n) / des vor neynen guldemeister holden also lange bed dat he den guldemeistere(n) . dar v(m)me ghentzlike(n) eẏn wandel ghe . / daͤn hebbe vnde weret dat wẏ Radma(n)ne vorbenomet med den meẏstere(n) van allen gulden hir na maͤls eynes / beteren torade worden dat schal vnschedelik wesen an dessen ieghenwardige(n) brẏue alle desse vorscreuen . / stucke vnde eẏ Islik besunderen loue wẏ vor vns vnde vor alle vnse nakomelinge Radmannev to Stendal / Jn ghuden truwen stede vnde vaste toholdende alse wy vorderst ku(n)nen vnd(e) moghen sunder allerleẏe hulpereͤde / vnde arghelist Med Orkunde desses bryues dar wẏ vnser stad grote Inghesegel dar dat cleyneInghesegel torugge / is anghedrucket med witschaͤp vnde med fulborde der meẏste(re) van allen gulden an hebben laten henghen Na . / goͦdes boͤrt dusent iaͤr virhundert iaͤr dar na in deme Sesten iaͤre des negesten donredages vor dem(e) Sondage / in der vasten alsemen singhet letare Jherusalem Doͤn Radmannen weren Claus Bucholte Henni(n)gh wulteke . / Claus Schadewachte(re) . Coppe Schernekow(e) Ghereke Euerstede , Coppe meseberghe Tideke Insel olde Hans van der / haghe Hans Erksleue peter(e) Schartow(e) Hans Hasselman vnde Hans Ronnebeke Doͤn weren guldemeistere der / wantsnẏder olde Hans Hadekop Cone Calue Henni(n)gh dobberkow(e) vnd(e) Claus Rynow(e) di nu dessem(e) iare vorstorue(n) . / is der lakemeker(e) peter gransoẏe Heyne klinke Hans dwetze Henni(n)gh Smed Hans Bukelman Ha(n)s Cloͤt / arnd oscheren vnde Claus Elmerstorpe , der Schuͦmeker Otte koske vnde wilke Bucholte der knokenhouwer(e) / Heyne Boldeke vnde Junghe Coppe Toͤp , der Cremer(e) olde Rikman cone Brunko vnde Dreus Bucholte . / der Becker(e) Heyne Runtorpe vnde Dreus Brunko der korsewrechter(e) Jurien kerberghe vnde Ebel wolden=/berghe vnde der Buͦrenweuer(e) heyse molner vnde ludeke westuaͤl , /