Wy Hans vnde Betke broder(e) geheiten karstil . Bekenne(n) vnde betugen openbare mẏt dessem(e) open(e) Briue / vor alsweme dat wẏ mẏt wolbedachten mode rechtes kopes vorkoft hebbe(n) vnde vorkope(n) mẏt craft / desses Briues den gemeynen kalandes brodere(n) vnde Sustere(n) to Stendal desse nageschreue(ne) Jarlike / rente Jn dem dorpe to Dalem ¹ ouer Hans gharlippes hoff vnde huͦuen Eyne(n) haluen wispel rogghen / vnde ghersten vnde Ses schillinge vnde vier pe(n)ninge ouer Hans Boruͮitzen

hoff neghen schilli(n)ge / ane vier pe(n)ninge . hir vor hebben vns de gena(n)te kalandes broder(e) vnde Suster(e) van des kalandes / wegen wol to dancke ghegeue(n) vnde bereydet Jn eyner Su(m)men Twelff mark Stendalscher weringe / de ghentzliken Jn vnse vnde alle vnser eruen Nut vnde frome(n) gekome(n) sint . Desse ergenante Jarlike / rente vnde plege schole(n) de vorschreue(n) lude ere eruen Edder de Je(n)ne de de benomeden houe bewone(n) / vnde de huͦuen bedriuen Alle Jar vppe sunte Mertens dach den ergenante(n) kalandes brodere(n) vnde / sustere(n) ofte eren kemerere(n) brenge(n) vnde bereyden Jn der stad to Stendal sunder allerleyge hulperede / vnde sette sy in fredeliker were der gnante(n) rente mẏt craft desses Briues vnde wille(n) den kalandes / brodere(n) vnde Sustere(n) der ergenante(n) Jarlike(n) rente vnde plege eyn recht gewere wesen wenne / war vnde wo dicke en des not vnde behuff ẏs sunder allerleyge hinder vnde hulperede . weret / ok dat wẏ Hans vnde Betke broder(e) gheite(n) karstil Edder vnse erue(n) desse vorschreue(n) rente wolde(n) / wedder kopen des schole wẏ alle Jar mechtich wesen . So schole wy en den wedderkopp vor kundige(n) / vppe sunte Mertens dach . vnde de(n)ne vppe vnser leue(n) frowen dach to lichtmẏssen dar negest to kome(n)d(e) / weddergeue(n) Jn eyner Su(m)men Twelff mark Stendalscher pe(n)ninge mẏt aller geboren rente Jn de / stad to Stendal . wan de vorschreue(n) wedderkop gescheen ẏs vnde betalinge alse vorscreue(n) steit So / schal vns vnde vnsen erue(n) de vorbenomede rente mẏt dessen Briue leddich vnde loͤs wesen vnde / nicht er . Weret ok dat Je(n)nich Jnual qweme dar god lange vor sy van dodes wegen vnses vnde / vnser rechte(n) leenerue(n) Jd were van der herschop edder van ander(e) beku(m)meringe wege(n) also dat de / ergena(n)te plege den vorscreue(n) kalandes brodere(n) vnde Sustere(n) to Stendal nicht volghen kuͤnde / vnde muste So wil wẏ Hans vnde Betke broder(e) geheite(n) karstil vnde vnse erue(n) vnde vnse na / geschreue(n) borge alle schole(n) vnde ey(n) Jowelk besundern schal den sulue(n) kalandes brodere(n) vn(de) Suste(re)n / wedder geuen vnde bereyden bynne(n) den negesten verndel Jares alse vns dat ge openbaret vnd(e) / van vns geesschet wert an reden pe(n)ningen Jn eyner Su(m)men Twelff mark Stendalscher / weringe mẏt der gebore(n) rente bynnen Stendal ane Je(n)nigerleye weddersprake edder hulperede / Alle desse vorscreuen stucke vnde artikel vnde eyn Jslik besunder(e)n loue wẏ Hans vn(de) Betke broder(e) / gheite(n) karstil vnde vnse erue(n) sakeweldich . vnde wy Ghise bukholte vnde Ghise schadewachte(n) / Borge vnde medelouer(e) laue(n) ok mẏt eyner sampden hant den ergenante(n) kalandesbroderen / vnde Sustere(n) to Stendal de sulue(n) vorscreue(n) stucke altosamen(e) vnde eyn Jslik besunder(e)n Stede / vnde vaste vnde vnuͮorbroken to holdende sunder allerleyge vortoch weddersprake edder / hulperede . Vnde scheget dat desser ergenante(n) borge welk vorstorue dar god lange vor sẏ / So schole(n) wẏ Hans vnde Betke edder vnse erue(n) vnde de Borge de de(n)ne noch leuet bynne(n) vier / weken na des doden eyne(n) Nughaftige(n) wissen borge(n) den vorscreue(n) kalandes brode(re)n vnde Susteren / Jn der stede sette(n) . Alle desse stucke laue(n)de vnde dessen Briff to vornigende alse vake alse en des not / vnde behuff ẏs . Des to groter bewaringe vnde forder . bekantnisse . hebbe wẏ Hans vnde Betke broder(e) / geheite(n) karstil vnde vnse erue(n) sakeweldich . vnde wy Ghise bukholte vnde Ghise schadewachten / Borge(n) vnde medelouere vorbenomet alle vnse Ingesegell mẏt guden wille(n) vnde recht(er) witschapp / laten hange(n) an dessen open Briff . De ghegeue(n) vnde screuen ys . Na der bord (cristi) vnses heren / vierteinhundert Jar dar na Jn den viffvnd(e)feftighesten Jare des donredages na Epiphanie , /