Wy Ratmann(e) to Stenndall Bekennen apinbar(e) betugen inn vnd mit dessem briue vor alszwem(e) / dat wy mit rade vnnd vulborde vnnser Guldemeister vnd wirtigsten borg(ern) von vnser obgnanten stat / wegen vorkofft hebben vnd in crafft dūsses briues vorkopen , dem(e) v(or)sichtigen vnsem(e) medeborger(e) / Liuine kutzen vnnd sinen r(e)chten eruͮen ock dem(e) hebb(e)re dusses briues mit sinen guden willen / negen gude Rinsche gulden dry schillinge vnd achte pe(n)n(i)ng(e) Stendelsch(er) yarleker rente vor Twehuͮndert / gude Rinsch guld(e)n de he vns woltodanke betalet hefft vnnd Jn vnse Stat nuͮt vnd fromen gentzlik(e)n / sint gekomen desse vorschreuen negen Rinsch gulden dry schillinge vnd Achte pe(n)ni(n)ge yarliker rente / schollen vnnd will(e)n wy vnd vnse nakomen(e) Ratmann(e) to Stendall dem gnanten Liuine kutzen / sinen r(e)chten eruen vnnd dem hebber(e) dusses briues mit sinen guden willen alle yar(e) van / vnnseme Rasthase zu twen tijden alse vp der hiligen dryerkoni(n)g dage vir guld(e)n twelff schillinge / teyn pe(n)ni(g)e vnd vp sunte Johann(is) Baptisten dage to mydden somer vir guld(e)n twelff schilling / teyn pe(n)ni(n)ge bynnen vnser Stat gentzliken geuen vnd sunder Insage betalen vnd wy vnd / vnse nakomelinge Ratmann(e) beholden vnns ock vulkomen macht desse v(or)schreuen rente / weddertokopende , vnd wan wy dat dan will(e)n so schollen wy dat dem(e) gnant(e)n Liuine sinen / rechten eruen Edder dem(e) hebber(e) dusses briues mit sinen guden willen vp vnser leuͮen / frouwen dage to Lichtmessen toseggen vnd vorkundigen vnd en vp Johannis baptisten dage tho / myddensommer dar negest uolen(de) weddergeuen vnd betalen bynnen vnser Stat Twehundert / gude Rinsch gulden in eyner Su(m)men mit den tinsen de wy de denn(e) plichtich sin vnd der welk / vorseten weren vnd wan wy dat gedan hebben so schollen vnns vnd vnser Stat de v(or)schreuͮen / rente wedder qwit vnnd los sin vnd ehr(e) nicht des to orkund hebben wy vnser Stat Grote / Ingesegell dar dat cleyne toruͮgge angedruckt is hangen lat(e)n an dessen briff Gegeuen na / cristi vnses her(e)n gebort duͦsentvirhuͮndert vnnd Jm(e) Achtvnndnegentigst(e)n jar Am(e) fridage / na Jacobi des hilgen Apostels