Wi Guncel vnde Hinric brodere , van Godes gnaden Greuen toͮ Zwerin bekennen openbare an dessen breue / dat wi vns erliket hebben mit den edelen mannen vsen leuen vederen , Greue(n) Nẏcolaus vnde Guncele sime / sone , eweliken tosamene to bliuende , geghen alle de , de se mit vnrechte anvegthen , vorbat alle deschelinghe / de dar was , oder werden mach twischen vnsen vorbenoͤmeden wedderen af ene sit , vnde vns af de anderen / sit , de hebbe we ghelaten vppe agthe riddere vnser man , an beẏden siden , dit sint vnse Riddere , Her Ghert / Rauen , Her Bolthe van Driberghe , Her oͤlrick van Pinnowe , Her Borchart van Dambeke , dit sunt vnser / vedderen Riddere , Her Arnt van Wozsthen , Her Johan van Lutzowe , Her Herman van Bluchere vnde / Her Hinrick Sprenghel , dat di vns vnschede scoͤlen , na erer samwithegeẏt endeliken b[i]nnen den nageste(n) / ver weken , an minne oder an rechte , so se beste kuͦnnen , vnde wat si vns dar vmme hethen doͤn , dar scole / wi bibliuen , sunder wederrede , Wi nescolen ock vns tonemene vorbinden mit deneste , ane vnser vorbenoͤ/meden vedderen rat , vnde der Riddere , de dar vore bescreuen sint , Weret over also dat vns en orloghe antrede , / dat wj vns erweren nẏcht konden ifte moͤchten mit vnsen mannen , vnde helpe bedroften , so wo it [...] / de vorbenomeden agthe Riddere tuẏschen vnsen vorbenoͤmeden vedderen , vnde vns voghe(n) vmme vnse(n) we[...] / scole wi bibliuen sunder wederrede , Weret over also dat , dat wj der Riddere nicht hebbene mogthen , de hir vor / bescreuen sint , so scoldeme andere Riddere nemen in er stede , de vnse man weren , vppe dat desse deghdinge gantz , / vnde stede bliuen , so late wj vnsen twen vedderen hulden , vnse hus vnde stat to Zwerin mit mannen , vnde mit / lande , dat dar tohort , Ock ofte Wj des nicht helden dat hir vore bescreuen is , so scolden vnse ridde(re) vnde vnse / m[a]n van deme lande to Zwerin , vnde de ¹ stat dar mede , to vnseme vedderen Greuen Nẏcolaus vnde sime sone / G[un]cele keren , also langhe dat Wj dat helden oͤder weder deden , na der vorbenomeden Riddere Rade , an minne / oder an recthe , dat dit stede bliue , dar hebbe wi twe vntruwen oppe louet , vnsen beẏden vedderen de dicke / vor ghenoͤmet sint , vnde tughet it oc mit den ridderen hir vor ghenoͤmet sint , vnde oc mit vnser twiger / Inghesegelle de hir hanghen , Desse bref is geuen na vnses heren bort , Dusent iar , Drehundert iar daz seue(n)=/den iares , des vridaghes na alleman(n)en vasten , vppe deme hus to Zwerin , /