Wi albern bonsake vnd hartewich ramekendorp beken[nen in du]sser scrift , dat vse Edele here greue hinrik van zwerin heft / ene gansze sone deg(e)dinghet tvschen vs . vnd vsen erfnamen vnde vroͮnden , af en sit vnde h(er)n georrius . Iohan . vnd goschalke . / pren , vnd eren erfnamen . vnde vroͮnden , af ander sit , vm de scelinghe . de wi mit en hadden , vm de neghen houe vnd en verden/del de wi coft hebben van h(er)n georrius van Iohan vnd goschalke . vnd eren erfnamen . de ligget to camptze , also hir na screuen / steẏt , Dat wi . vnd . vs erfnamen . De neghen houe vnd en v(er)dendel vnbeworen . beholden vnd hebben scolen mit holte mit wat(er)e , / mit weẏde , mit aller Nut vnde vroͮcht , mit richte , mit rechte to man rechte , also her georrius . vnde Iohan vnd goschalk , vnd / er erfname(n) se hadden¹ , ok scal her georrius . Iohan vnde goschalk , vnd er erfnamen , vs . vnd vse erfnamen . vnde vroͮnt , van , / sculden vnde broke nemen , van vsen Edelen heren greuen hinrike vnd Juncheren clawsse , vnd se vs to vroͮnde maken , vm Dat / ramekendorp . vnde gert bonsak , h(er)n georrius vnde sine vroͮnt . in erme lande venghen , vnde se vt erme lande voͮrden Tus/chen hir vnde paschen , Ok vm dat her georrius . Iohan vnde goschalk . vt vsme gode nemen . vnd nemen leten . to vn rech/te , dar scolt se vs vm don Tuschen hir vnde mit vasten . wat her nigenk(er)ken se hed don , vppe desse ding de hir vore scre/uen stat hebbe wj louet . vnd louen mit vsen vroͮnden ghert , vnd albern bonsak , hinrik bonsak , ghert bonsak , / ludeke barwẏc , hinrik bursowe , conrad bonsak , ghert bonsak , vnde dideric bonsak , vnd troͮwen . hern georrius / Iohan vnd goschalk pren vnd eren erfnamen vnde vroͮnden , vor ene ganzse sone Des sint vs ingheseghele / to dessem breue henget .Desse bref is ghe gheuen na godes bort dusentiar drehundertiar , in deme en/vnddrutichsten iare Des mitwekens na lychmissen