Wy albert van der gnade godes . hertoghe van mekelenburgh greue to zwer(in) / (it cetera) . Bekenne openbar in desme Breue dat wi mit wolbort vnser eruen / vn(de) na rade vnser ratgheue(re) hebbe(n) vorlegen vn(de) gheuen to eme rechten lene / vnsem leue(n) denere ghert stuͮrken . vn(de) sinen rechte(n) erue(n) hinrikes hof van / der sulten de dar licht in dem dorpe to der sulten ¹ in vnser greuescop to / zwerin . alz he an vns gheuallen is na dem dode des vorben(omeden) hinrikes mid / al siner nut vn(de) vruͦcht . mid ackere buet vn(de) vnghebuet mid holte mid wa/tere wisz vn(de) weẏde vn(de) mid al siner tobehoringhe als he licht vn(de) van / oldinghes ghelegen heft binnen siner schede gheue² tuͦ merer bethuginghe / so hebbe wi vnse grote yngesegel heng(het) late(n) vor dessen bref . de gheue(n) / is to zwerin na godes bort dusent iar drehundert iar in dem twe vn(de) sostigesten iare . in sunte bartolome(we)s daghe . Tugh(en) sint her mathies raue(n) / her hinr(ik) knop . vn(de) her johan cropelin vnse kenselere /