Wy kersten Ridder vnd hannes brodere vnd hen(n)ingh ere veddere knechte alle ghe heten Bosel be ken(n)en vnd tuͮghen open/bare in dessem breue dat wy vnd vse eruen dat hus to Stauenowe mid al den dorpen vnd guͦde dat dar tuͦ licht dar it / vs ok greue otto van zwerin dem god gnade mede vor pandet hadde . hebben entfanghen tuͦ enem rechten lene van dem hoch/ghebornen voersten vsem gnedighen heren hern Alberte . hertoghen tuͦ mekelenborgh de greue is tuͦ zwerin vnd here tuͦ / Stargarden vnd tuͦ Rostok vnd van sinen eruen . vnd scholen vs number noch mid dem slote noch mid dem gude vorbeno/met tuͦ ienighen anderen heren setten edder van iemande anders entfaen. men wẏ . vnd vse eruen scholen . vnd willen darmede / truweliken vnd tuͦ ewighen tiden tuͦ des vorbenomeden hertoghen albertes vnd siner eruen denste sitten . vnd en dar af denen vnd / doen also truwe bederue lude eren rechten heren tuͦ rechte doen scholen . Des schole wi vortmer van staden an vort buwen dat / vorben(omede) huͮs als wẏ best kuͦnen vnd dat sulue huͮs schal alle ¹ tid ere opene slod wesen tuͦ al eren nuden vnd noden . Vnd / hebben ghe gheuen . vnd gheuen mid dessem breue . vor vs vnd al vse eruen vsem vorbenom(eden) heren . herr alberte . hertoghen / tuͦ mekelenborgh vnd sinen eruen . des gantze macht dat se vs dat vorbenom(ede) huͮs vnd guͦd af kopen moghen wan se willen / dat si ouer kord , edder ouer langh . vor also vele gheldes als twe erer man de se dar tuͦ setten scholen , vnd twe vser / vruͤnd de wi dar tuͦ setten scholen spreken dat en dunket redelik wesen vnd dat sprekent , vnd ok de losinghe schole wi , vnd / vse vruͤnd de wy dar tuͦ setten enbouen redelicheyt mid nichte vor teen mer wi scholen dat ghensliken vnd al vt holden / sunder allerleẏe arghelist . vnd wes de vere spreken dat se vs dar vore gheuen scholen . dat scholen se vsgheuen in ener / stede , dar wẏ dat brukliken vnd vnentberliken entfaen moghen . vnd se scholen vs de beredẏnghe al vt to dem besten / keren . vnd so schole wy vnd vse eruen en edder eren eruen dat vorbenom(ede) huͮs , dorpe vnd guͦd sunder ienigherleye vor/togherẏnghe brukliken antworden vnd scholen en ok dat al vt to dem besten keren Alle desse dingh stede vnd vast / tuͦ holdende loue wi kersten Ridder hannes vnd hen(n)ingh knechte vorbenom(ede) . vor vs vnd vor alle vse eruen vsem vorbenom(eden) / heren Hertoghen alberte vnd sinen eruen bi truwen vnd bi vsen eren in dessem breue . dar wẏ tuͦ tughe vse ingheseghele / an ghehenght hebben De gheuen vnd screuen is tuͦ zwerin na godes Bord drutteẏnhundert iar in dem vif vnd sestighesten / iare des hillighen auendes tuͦ pingsten /