Wy Rodulph van godes gnaden biscop to zwerin vnd hertogh to mekelenborch vnd wi hinrik prouest Johannes berchteheile . lubbertus witgerwer Johannes / bulow Jacobus crutzebiter . Fredericus molteke Jacobus oem Johannes kalenoͧrde domheren vnd(e) dat gantze capitel der kerken to zwerin bekenne(n) vnd betuge / openbar in dessem breue . vor vns vnd vor vnse nakomelinge dat wi mid wol bedachte mode hebben vns endrachtichliken gesetthet vnd(e) setthen mit dessem / breue to den dorluchtigen forsten heren albrechte der sweden vnd(e) der goten koninge vnd to sinem vedderen hern Johanne hertoghe magnuse sone hertoghen / to mekelenborch greuen to zwerin to stargarde vnd to Rozstocke heren vnd to eren eruen to erer herscop mannen vnd steden in aldus daner wijs . dat wi vnd vnse / nakomelinge scolen vnd wille mit vnses stichtes sloten butzow vnd warin vnd(e) mit des stichtes mannen mit gantzer macht bẏ desser vorscreuenen heren / hulpe bliuen yeghen enen yewelken dar wi eres rechtes mogen mechtich wesen he sy geistlik edder wertlik vnd(e) quemen de vorben(omeden) vnse heren an yenghe / veyde edder krigh dar scole wi bi bliuen vnd scolen vns van en nicht vreden . daghen edder sonen . wy en don dat mit erem willen . were ok dat desse vorben(omeden) vnse / he(re)n to krighe quemen mit den hoghebornen fursten . heren Johanne . edder mit heren Vlrike hertoghen to mekeleborch vnd(e) heren to stargarde dat god vorbede / So schole wi vnd(e) willen mit des stichtes sloten butzow vnd(e) warin vnd(e) mit des stichtes mannen to deme kryge stille sitthen an beyden syden . were ok dat wy / in deme krige vnsen vorben(omeden) heren koning albrechte vnd(e) hertoghen Johanne helpen wolden vp hertoghen Johan vnd(e) hertoghen vlrik dat scal to vns stan / Alle desse vorscreuen stucke vnd artikle . loue wi biscop Rodulph . hinrik prouest Johannes berchteheyle . lubbrecht witgerwer . Johannes bulow Jacobus / crutzebiter frederik molteke Jacobus oem Johannes kaleuorde domheren vnd(e) dat gatze ¹ capitel der kerken to zwerin vor vns vnd vor vnse nakomelinge / den vorben(omeden) vnsen gnedigen he(re)n koning alberte vnd(e) hertoghe Johanne vnd eren eruen in guden truwen stede vnd(e) vast to holdende sunder yengherleye / hulperede vnd sunder alle arich . vnd hebben des to tuge vnde merer bewaringhe vnser aller Ingesegele mit des capittels Ingesegel mit willen vnde / mit witscop henghen laten an dessen breff . de gescreuen vnd gheuen is to zwerin na godes bord dusent Jar drehundert Jar in deme achte vnd(e) negen/tichsten Jare in sunte lucien dage der hilgen Juncvrouwen /