Wy hinrich hartich vnde Albert broder(e) geheten Bonenzacke to Canyn bekennen vnde betuͦgen openbar(e) an dessem breue / also als wy brokaftich ge worden weren . yeghen vnsen leuen gnedighen heren den hochgebornen fuͦrsten konig(en) Albrechte to Sweden / vnd Hertogen to Meklenborch . dar heft he vns sẏne gnade vm(m)e to kerd . vnd heft vns dar vorlaten also dat wy syne(n) gnaden to ende / dancken . vnd wy vnd vnse erue . vnd alle vnse vedderen vnd vru(n)t de vm(m)e vnsen will(e)n don vnd laten will(e)n scolen vnd will(e)n num(m)ermer / zaken vp de schicht . edder vp de ghene de to der tid mit vnsem vorben(omeden) leuen gnedighen heren . vnd mit herme(n) kerktorpe vp deme / velde weren ze zy(n) ridder(e) edder knechte . borgher(e) edd(er) bure . men alle schicht de to der tid schuͦde dat dar van vp stan is . vnd in vnd a(n)ne / begrepen is dat schal alto male endet vnd lendet wesen vnd gantzliken doet wesen . likerwys ofte dat ny geschen sy . vnd wy hinrik . / hartich vnd albrecht . vorben(omede) . vor vns vnd vnse rechte erue(n) . loue(n) vnd zweren mit vppe richteden vingheren to den hilghen ene gantze / sone vnd ene rechte orueyde . vnse(n) leuen heren konigh Albrechte vorben(omed) . vnd hertoghe ¹ Johanne syne(n) vedderen hertoge Magnus son / dem god gnedich sẏ . vnd eren rechten eruen .also dat wẏ alle ding holden will(e)n als vor sc(re)uen is .. vnd louen vnd zweren ok to den / hilghen . mit vppe richteden vingheren . vme ² der zuͦlue(n) schicht will(e)n ene gantze sone vnd ene rechte orueyde . hermen kerktorpe / vnd syne(n) eruen . wy vnd vnse rechten erue(n) scholen vnd will(e)n . nuͦm(m)er vnser vorben(omeden) heren viende werden vnd num(m)er vns vor van / an en vnd an eren erue(n) . an eren landen steden . sloten vnd man(n)en bogeren³ vnd buren . vnd ok sunderghen an hermen kerktorpe . / vnd an syne(n) erue(n) . men wy scol(e)n vnd will(e)n vns mit enen iesliken vor vnsen leuen gnedigen heren . an rechte machen laten . Ok / scole wẏ des stichtes van zwer(in) vyende nicht werden . vnd dat stichte nicht beschedighen . ane vns(er) vorben(omeden) heren vnd erer erue(n) orlof / vnd will(e)n Alle desse vorsc(re)uen stuͤcke vnd artikle vnd en ieslik bẏsunder . loue wẏ hinrik hartich . vnd albrecht vorb(e)n(omede) . stede / vnd vast to holdende an ghuden truͦwen vnd sweren de mede to den hilghen . mit vppe richteden vingheren vor vns vnd vor / vnse rechte(n) erue(n) to holdende vnd vor vnse veddere(n) vnd vru(n)t de vm(m)e vnsen will(e)n don vnd laten will(e)n . Vnd wẏ Ghereke / Bone(n)zak vnd Radeke bone(n)zak to scharsyn . hen(n)i(n)gh bone(n)zak to hu(n)gherstorpe . hinrik Bone(n)zak to Moysalle . hartich plote / Tydeke van bulowe to Radum . volrad sperlingh vnd ghereke plote . truͦwe medelouere . louen vnd Reden an ghuden t(ru)wen / vnsem leue(n) gnedighe(n) heren koni(n)g Albrechte . vnd h(er)toghe Johan(n)e vorben(omed) . vnd ere(n) erue(n) . vnd to erer truͦwen hant . den / Erbaren Ridderen . hern vlricke van pentze . her hen(n)igh van stralendorp . her hen(n)igh halu(er)stade h(er) Otten vereggen her Gerolt / hazenkoppe . her Johan lutzowen . her Bernde van plesse . vnd Ju(n)ge vlricke van pentze hartighe van bulowe . Marquert / beyenvlete , detlef negendanken . hinrik quytzowen . vnd hen(n)eke van plessen knapen . vortm(er) loue wẏ vnd reden an / ghuden truͦwen . hermen kerktorpe vnd sine(n) erue(n) vorb(e)n(omede) . vnd to erer truͦwen hant . werneke linstowen . Clawese . / RadekenJachyme hen(n)eken . vnd vicken gheheten kerktorpp sine(n) veddere(n) . hinrik zelighen . vnd hen(n)eke zelighen . deneken / van der oldenstad . Jachim linstowen . Janeken van helpte ene(n) kersten knape . alle desse vorsc(re)uene ding vnd stucke stede / vnd vast . to holdende . vnd dat desse vorben(omeden) . hinrik . hartich . vnd Albert . bone(n)zacke de orveyde vnd zuͦne . vnd artikele de / vorsc(re)uen sint . holden scholen ze vnd ere erue(n) . dat loue wẏ mit en vnd ze mit vns an guden truwen . mit ener samede(n) / hant . sunder iegherleẏe hulperede . vnd gentzliken ane alle argelist . Vnd des to tughe vnd merer bekantnisse / alle dess(er) vorsc(re)uen stucke so hebbe wy vorben(omeden) hinrich . hartich vnd Albert . vnse Ingezegele . mit vns(er) vorben(omeden) / medelouere(n) ingezegelen henget mit . will(e)n . vnd wiscop an dessen breff . de ge sc(re)ue(n) is to zwer(in) na godes / bort druttey(n) hu(n)dert iar an dem . achte vnd neghentigestem Jare . des . dingstedages na sunte vites daghe /