Wy hinrik vnd gotscalk brodere gheheten tzulowe knapen vonaftich to tzulov louen in guden / truͦwen sunder all arch mit vnsen eruen dem dorluchtigen fursten vnsem gnedige(n) h(e)ren h(e)re(n) / alberchte der sweden vnd(e) der gote(n) koni(n)ge vnd(e) sine(n) vedderen hertogen jo(hann)e , hertogen to mekele(n)/borch greuen to zwerin to stargarde vnde to rozstok h(er)ren vnd(e) eren rechten erue(n) dat wy / willen vnd(e) scolen . binne(n) dessen neghesten twen jaren na dessem neghesten su(n)te michele / daghe to komende , wedder kopen vnd(e) wedder losen veer m(a)rk gheldes vnd(e) jj schillinge / de wy vorkoft hebben vnd(e) vorsat to ene(m) weddeschatte in vnse(m) gude to tzulouwe h(e)ren / hinrike tarnow vicarius to zwerin vnd(e) scolen vnse(n) h(e)ren deme koni(n)ge sin ingesegele wedder / schippen van deme breue den he vp den koop mit vns besegelt heft , vnd(e) weret sake dat wẏ / dat nicht en deden binne(n) desse vorscr(euene) tijd so wille wy vnd(e) scolen in sine(n) mynne vnde in / sine(n) gnaden dar v(m)me bliuen vnd(e) des to bekantnisse hebbe wy vnse ingesegele henghe(n) laten / an desse(n) bref de gescr(euen) is to zwerin . na godes bord , verteẏn hundert jar in dem vastelaue(n)de /