Witlik sy all den ẏennen de dessen breff seen edder horen lesen dat ich hinrik sperling / bekenne vnd(e) betughe openbar an dessen breue dat ich mit willen vnd(e) beraden mode vor / mẏ vnd(e) vor myne eruen vnd(e) vruͦnt boren vnd(e) vngheboren vnd(e) vor alle de vm(m)e myne(n) / willen doen vnd(e) laten willen ghelouet vnd(e) mit vpstaueden vyngheren to den hilgen / ghesworen hebbe , loue vnd(e) swere in dessem yeghenwardigen breue ene ewyghe orveẏde / vnde ene ewige ganze sone den dorluchtigen fursten vnd(e) h(e)ren h(e)ren Alberchte der swe=/den vnd(e) der goten koninge . vnd(e) sinem vedderen hertogen Johanne . hertogen magn(us) sone , / hertoghen to mekelenborch greuen to zwerin to stargarde vnd(e) to rozstocke h(e)ren vn(de) eren / eruen . eren man(n)en landen vnd(e) steden vnd(e) allen inwoneren erer lande beẏde gheistlike(n) / vnd(e) werliken . vnd(e) sundergen den borgh(er)meisteren ratman(n)en vnd(e) borgheren to godebutz / vnd(e) allen eren nakomelingen to ewigen tiden dat ich na dessem daghe num(m)er will ed/der schal der vorben(omeden) h(e)ren edder erer erue(n) erer man(n)en steden landen , edder erer vndersa=/ten vẏend werden . vnd(e) och se nicht arghen edder beschedigen hemelik edder openbar . / de wẏle ich leue sunder ich will vnd(e) schal mich mit enem ẏewelkem ma(n)ne in der / vorben(omeden) h(e)ren landen vnd(e) steden in rechte noghen laten .. Desse vorscreuene orveẏde vnde / sone loue ich hinrik sperling . deme hoghebornen gheistliken h(e)ren Herre(n) Rodulphe biscope / to zwerin . vnd(e) sinen nakomelingen . vnde deme stichte vnd(e) allen inwoneren des stich/tes to zwerin stede vnd(e) vast to holdende . in guden truwen . sunder all arch vnd(e) hebbe / des to bekantnisse . vnd(e) merer bewaringe mẏn ingesegel witliken vnd(e) mit gude(n) wille(n) / hengen laten an dessen bref . Vnd(e) wy clauues sperling . kord sperling . kord preen van / modentyn . vnd(e)henneke bulou to der zyme . bekenne(n) openbare an dessem breue . dat wẏ / louet hebben vnd(e) louen in guden truwen den dorluchtigen vorben(omeden) fursten koni(n)g Alberte / vnd(e) hertogen Johanne . vnd(e) eren erue(n) . vnd(e) to erer truwen hand . den erbaren man(n)en / herren otten veregged . h(e)ren gherolde hasekop . ridderen . hinrike reuentlow . vogede . to / zwan . hinrik van drantym . vogede to zwerin . Marqwarde beẏenvlet . detleue neghen=/danke . harteke van ouwe . den borghermeiste(re)n vnd(e) ratman(n)en . to godebutz . vnd ere(n) / nakomelingen . vor desse vorscreuene orveẏde vn(de) sone . dat . hinrik sperling , de in alle(n) / artiklen alse he se louet vnd(e) sworen heft . stede vnd(e) vast holden . sunder ẏenigherleẏe / hulperede vnd(e) sunder all arch . vnde hebben des to bekantnisse vnd(e) merer bewaringe / vnse ingesegele . mit hinrikes sperling ingesegel . witliken hengen laten an dessen / breff de ghescreuen is to zwerin na godes bord in dem verteẏn hundersten jare . in / vnser leuen vrouwen auende alse se to hemele voor /