Ik hinrich sperling bekenne vnde betuge openbar(e) an dessem breue dat Ik mit wolbedachten / mude vnde mit guden vrien will(e)n . vor mẏ vnd vor my(ne) erue(n) . hebbe vorlaten . vnd vorlate an / dessem breue vor dem zittenden richte(re) . den hochgebornen . dorluchtigen fursten vnde heren . hern / Albrechte . der Sweden vnd der goten konighe . vnd hertoge Johanne . hertoge Magnus son . h(er)toge(n) / to Meklenborch . Greuen to zwer(in) . to Stargarde . vnd Rostok . heren vnd eren erue(n) . mẏne(n) hoff / to guͦssterowe vnd wes Ik hadde in dem dorpe dar zuͦlues , also als dat . beẏde hoff vnd ghud / mit alle sẏne(n) tobehoringen vnd scheden belegen is . an Mol(e)n . an Acker(e) . wischen . wateren weyde(n) / holten bruͦken buͦschen muͦren . an waters tolopen vnd aflopen . an stowingen . vnd an vischerye(n) / an straten an wegen . vnd an vnwegen . vnd mit aller rechticheit egendum(m)e to behoringe , / vnd vrẏheit . als ik vnd mẏne erue(n) vorb(e)n(omede) vnd mẏne vorvaren . den hoff , molen vnd gud / ye egenst vnd vryest bezeten hebb(e)n . vnd gehat hebb(e)n . mẏ vnd mẏne(n) erue(n) . dar gantzliken / vnd mit alle nuhtes ane tobeholdende vnd tohebbende . vnd Ik vnd mẏne erue(n) schol(e)n vnd / will(e)n . num(m)ermeer saken vp den den vorsc(re)uen(en) hoff Molen vnd ghud . an to kome(n)de(n) ewigen / tyden .., Vortm(er) . were dat mẏne leuen gnedige(n) heren vorben(omede) edder ere erue(n) yema(n)t bewore / an dessem vorsc(re)uen(en) houe . Molen vnd ghude . to guͦsterowe . als ik dat gehat vnd vorlaten hebbe / alz vorsc(re)ue(n) is . he wer(e) gestlik edder werlik de vor recht kome(n) wolde vnd recht geue(n) vnde / neme(n) wolde .. dar schal ik vnd mẏne erue(n) ze vnd ere erue(n) . af entfryen . vnd en vnd eren / erue(n) des houes . Mol(e)n vnd gudes . vorsc(re)uen waren vor alle ansprake to rechte als in deme / lande en recht is Alle desse vorsc(re)uen(en) stuͦcke . vnde en Jeslik bẏ sik . loue Ik vorb(e)n(omede) hinrich vor / mẏ vnd vor mẏne eruen . vnd mit vnsen truwen medeloueren . alse Clawes sperlinge koͮrd / sperlinge koͮrd prene to Modenty(n) . vnd henneke bulowen van der zymen . mit ener zame(n)den / hand . vnsen vorb(e)n(omeden) leuen gnedigen heren . koni(n)g Albrechte . vnd hertoge Johanne vnd eren / erue(n) . vnd to erer truwen hand . den Erbaren luden hern Otten vereggen . hern Gerolde / hasencoppe vogede to godebusse ridderen . hinrik Reuentlowen vog(e)d(e) to zwan . hinrik van dra(n)t=/hem vogd(e) to zwer(in) . Marquard Beyenvlete vodermarscalke . hartich van awen vnd detlef / negendanken knapen stede vnd vast to holdende . an guden truwen sunder yeng(er)leẏe hulperede / vnd gantzliken ane alle argelist . Tho tuͦge vnd merer bekantnisse alle desser vorscr(eu)en ding(e) / hebbe Ik vorb(e)no(mede) hinrich sperling mẏn Ingezegel . mit mẏner medelouer(e) . als Clawes / sperlinges kurdes . sperlinges . kurd prenes . vnd hen(n)eke(n) bulowe(n) vorben(omede) . Ingezegelen mit / will(e)n vnd wiscop . to same(n)de hengen laten an dessen breff . de geue(n) vnd screue(n) is to zwer(in) / na godes bord . an deme veerteynhunderdestem Jare . An deme auende vns(er) leuen frowen / Marien alse ze to hemmel vur /