IN godes name(n) Amen witlik sy al den ghenen de dessen bref sen edder hore(n) leze(n) dat ik / volret pren knape wonaftich to stenuelde beken(n)e openba(r)e in desseme breue mit mẏ/nen rechte(n) erue(n) dat ik vorkoft hebbe deme gardiane vn(d) deme gantze(n) c(on)ue(n)te to / zwerin de nv sẏnt vn(d) to kome(n)de sẏnt to ewẏghe(n) tẏden we desse(n) bref heft mit / ereme willen he sẏ gheẏstlik edder werlik So hebbe ik em ghesettet twe man / to stenuelde de ene is ghe nomet laure(n)tius mit xx . s(chillinghe) . De ande(re) is ghenomet / Strokerke mit ener marc gheldes lubescher mu(n)te edder pen(n)ẏnghe Desse / vorbenomede man(n)e hebbe ik volret pren mit mẏne(n) rechte(n) erue(n) de nuͮ synt / edder to kome(n) moghe(n) deme closte(re) to zwerin den brode(re)n van sunte ffra(n)ciscus / orden vor koft vnde vorkope vor xxxv . m(a)rc lubescher pen(n)ynghe alzo / to lub(ecke) vn(d) to der Wismer ghenghe vn(d) gheue sẏn Desse suluen vorbenome/den jarlẏker ghulde vptoborende alle sunte Michael daghe alzo vrẏg vn(d) / alzo quẏd alzo ik dat ye vrygest beseten hebbe vn(d) alzo it mẏ mẏne olderen / eruet hebben Vnde mach desse sulue(n) jarliker gulde pande(n) edder pande(n) late(n) / alzo dicke vn(d) alzo vaken des behof vn(d) not is Vnde des ghelẏk so mach dẏt vor/benomede gut ok pande(n) edder pande(n) late(n) De Rad van zwerin Vnde ok mach / de Rad van zwerin dẏt vorben(omede) gut bescherme(n) edder bescherme(n) late(n) lẏk ereme / eghen gude vnde dessen ẏeghenwardighe(n) bref schalme holde deme Rade van / Zwerin van worde(n) to worde(n) alzo he lud lẏk wẏ sulue(n) Vnde ik volret pren / vn(d) mẏne rechte(n) erue(n) schal dit vorben(omede) gut vordene(n) van den here(n) van deme / lande vn(d) bescherme(n) lẏk mẏneme eghene(n) gude Vnde Weret dat dẏt ghut / ghe pandet worde so machme de pande vore to der negheste(n) kopstad vn(d) mach / de ẏarliker ghulde dar afneme(n) Vnde dyt vorben(omede) gut hebbe ik volret pren / mit mẏne(n) rechte(n) erue(n) alzo vrẏg vorkoft alzo dat ik vn(d) mẏne erue(n) dar / nichtes nicht schole(n) ane hebbe(n) men alleẏne den wedder kop Wen ik edder / myne erue(n) dẏt vorbenomede gut wedder losen wille(n) so schal ik edder mẏne / erue(n) to segghe(n) deme gardiane vn(d) deme closte(re) edder we desse(n) breff heft mit ereme willen vppe sunte Johans dach to mẏdden zomer vn(d) dar na vppe den negheste(n) / sunte Mertens dach wen de pacht van den sulue(n) erue(n) vn(d) houe(n) dar nv / laure(ntius) vn(d) strokerke vppe wone(n) vn(d) sẏne ¹ ere nakomelinghe vp / gheboret is so schal ik volret pren vn(d) wil edder mẏne rechte(n) erue(n) / betalen vn(d) bereden deme gardiane vn(d) deme closte(re) edder we dessen / bref heft mit ereme willen² xxxv . lubscher mu(n)te ³ pen(n)ẏnghe in guder mu(n)te in der / stad to zwerin vppe ener seker stede wor it deme gardiane vnde deme / closter recht is edder we dessen bref heft mit ereme wille(n) an guden / reden pen(n)ẏnghe(n) sunder vortoch vn(d) sunder ere(n) schade(n) Alle desse stucke / vn(d) en ẏewelÿk bẏ sẏk to holdende so loue ik Volret pren mit mẏne(n) rech/te(n) erue(n) deme gardiane deme closte(re) to zwerin vn(d) we desse(n) breff heft / mẏt ereme wille(n) sunder yenigherleẏe hulpe rede edder arghe lẏst / sunder gheystlikes rechtes gandes Alle desse stucke to vestende vn(d) mer / to ener bewaringhe So hebbe ik volret pren mẏn Inghezeghel ghe/henghet vor dessen breff vn(d) ok to hogher wẏtlicheẏt vn(d) Bekantnisse / so hebbe ik ok Vicke pren mẏn Inghezeghel ghehenghet vor dessen / bref De ghe gheue(n) vn(d) screue(n) is na godes bord verteẏnhundert jar / in deme xlvj jare des negheste(n) Sondaghes na sunte Mertens daghe . /