Wy diderick von ghenade goddes bischop to brandeborgh . dun witliken . alle den / dy dessen brif sien vnde horen . dat na rade vnser heren hern Otten ertz/bischop to mey(ge)deborgh vnde hertzoghen Rudolfes von sassen . is ouer/gheuen als hir na ghescreue(n) steyt . Wy eyne marc gheldes kopen wil vp / erue in der stat to wittenbergh . ehr scal sy kopen vmme teyn brandebur/sche marc vnde nicht nair vnde dy de sy vor koft an deme scal dat stan / wen he sy widder kopen mach mit goddes hulpe vnde nicht an deme dy sy / koft wen he scal sy em mit willen laten weder vmme dat vornante ghelt / vnde scal den tins nicht lengher stan laten wen eyn jar so scolen dy ratma(nne) / yre(n) knecht dar to lyen dat ime ein pa(n)des helpe vt deme erue sundir claghe . / wir it ouer dat ine ein pa(n)des nicht helpe(n) muchte vnde ghener vluchtich / von sime erue worde so scal dy den tins het claghe(n) vp dat erue vor gherichte / also it recht is . vn(de) scal dat erue vorkope(n) so it eyn recht is vor sin ghelt vnde / vm sine(n) tins . Ok scal ine neyn scot dar vp slan sundir yderman scal sin gut / seluen vorscoten . were auer dat eyn man dy den tins hat sines gheldes dorfte / dẏ mach wal eyne(n) andere(n) man(n)e den tins vorkope(n) vm(m)e so dan ghelt also he / en koft het vnde dat dy dy den tins vorkoft het scal bliue(n) by deme suluen / rechte als it vor ghena(n)t is . disse vorbena(n)te stucke volborde wy vorbena(n)te diderick / biscop to brand(enborgh) vnde hebbe(n)t dar vor dat sy mit Eren vnde rechte wol sin moghe(n) / to eyme orku(n)de so hebbe wi to dissem briue vnse inseghel anghehanghen / dar sin ouer ghewesen dẏ erbar lude . dy .. lesemeyst(er) von den baruotyen bruͦ/deren to witte(n)b(er)gh . meyst(er) hinr(ick) perrer to der tzane meyst(er) hinr(ick) des vorbe/na(n)ten hertzoghe(n) von sassen sc(ri)ber her otto vnse official vn(de) ander lude . / disse brif is ghegeuen to witte(n)bergh . na goddes bort dritteynhu(n)dert iar . in / deme seuendeveftichesten iare in sente marien magdalenen daghe /