Wy Ratmanne schepe(n) . Jnnẏngmeiste(re) vnd(e) die gantze ghemeẏnheit d(er) stat tuͦ Cerwist / arm vnd(e) Rike . beken(n)e(n) vnd(e) betuͦghe(n) openlik in dissim briue dat die hochgeborne(n) forste(n) Albr(echt) [vnde] Wold(emar) / vnse gnedige(n) herre . vnd(e) wie mit on ghededing(e)t hebbe mit guͦde wille . mit gantzer / fuͦlbort vnd(e) eẏndracht . dat wie noch vnse nakomelinge . die na vns kome(n) ewichlike(n) vnd(e) / y(m)mer mer ny(m)mer keyne Ratmanne kẏsen scolen . noch en willen . wie duͦn dat mit vns(er) / vorgenante(n) herre(n) oder orer erue(n) fulbort vnd(e) gantze(n) wille(n) . vnd(e) die Ratmanne die / ghe kore(n) werden . die scole(n) vnse vorgenante(n) h(er)ren . oder ore erue(n) stedeghen . eer sie vpp / dat rathuͦs gan . vnd(e) die Ratmanne scolen swere(n) . dat yar ratmane tuͦ wesene / vnd(e) vnser vorgenante(n) gnedig(en) h(er)ren vnd(e) orer erue(n) . ere . vnd(e) beste tuͦ weruene . / vnd(e) der stat dat beste tuͦ radene . vnd(e) des nicht laten wille(n) noch en scole(n). dorch / lieff od(e)r dorch leit . vnd(e) dorch keynerhande niẏde Ok hebbe(n) wie ghe dedingt mit vnsen vorgenante(n) gnedige(n) herre(n) . dat wie noch vnse nakomelinge . vnder vns keẏn ghe/sette scolen noch en willen setten . wie duͦn dat mit vnser vorgenante herre(n) vnd(e) orer / erue(n) fulbort vnd(e) gantze(n) wille . Ok hebbe wie ghededingt . dat wie ouer vn(s)er / herr(e)n man . oder ghesinde keẏn gerichte scolen hebben . wes vns tuͦ on not is dat scole / wie vorwẏnne(n) vor vnsen vorgenante(n) herr(e)n od(er) vor ore(n) erue(n) . Were awẏr . dat unser her/ren man oder ore ghesinde ennẏch vngherichte deden in d(er) stat . dat scole wie vorwẏnne(n) / vor vnser herre(n) vogit vnd(e) vor dem schultete(n) . Ok scole wie vnd(e) wille(n) d(er) straten in d(er) / stat tuͦ Cerwist die vnser herre(n) vrie sien . mit nichte beku(m)me(r)n mit ennẏghe(n) dinge(n) / wie duͦn dat mit vnser vorgena(n)te(n) h(er)ren . od(er) orer erue(n) fulbord vnd(e) wille(n) . od(er) mit / orer a(m)mechtlude die ore macht dar ane hebbe(n) . Ok scole unse vorgena(n)ten h(er)ren oder / ore erue(n) . vnse gnedighen herre(n) sien vnd(e) wie vnd(e) vnse nakomelinge wille(n) vnd(e) sco/len bliue(n) vnd(e) sien . vnser vorgena(n)te(n) h(er)re(n) vnd(e) orer eruen t(ru)we borghe(re) . ane allerleige / gheuerde . Disse ding(e) loue wẏ stede und(e) gantz tuͦ haldene . ane allerleige arghelist / Tuͦ Orkunde hebbe wie dissin briff gheue(n) na gats gebort drittein huͦndirt / iar . Jn dem ses vnd(e) veftigisten iare . Jn dem auende vnser liue(n) vrouwe(n) lichtmesse / vorsegilt mẏt vnser stat Jngesegile