Wẏ Ratmanne der stad Tzerwist . allen kristen lvͦden dẏ disse ghegenwerdighe schrift sehen . horen adir lesen . Vnse moͤghelicke dinst . vnd plichtiger / truͦwe stedicheit . Wen gheschichte vnd ding mit vortgange der tẏt von gedechtnisse der menscheit vorswindet vnd vorgheten wert . it en si denne dat / dẏ vorsichticheit der wisen dẏ gheschichte vnd ding mit tvͦghen vnd mit schriften in ghedechtnisse behalden . beuesten vnd ewich maken . Hirvmme wẏ Rat/manne tv Tzerwist willen opembar sẏn vnd bekennen vor allir menscheit dẏ nv is . vnd hir na tv komende wert . Dat wẏ nicht alleẏne mit eighener / vulbort vnses willen . sunder mit witschaft vnd mit eẏndrechtigem rade der vorsichtighen wisen lvͦde Der schepen und ynningen meẏste(re) . vnd boͤrghe(re) / ghemeẏne der ghenanten stad Tzerwist . Vnd ouk mit rade vnd vulbort der vorstender der elenden in der parkerken sente Nẏcolaus hebben ge gheuen / vnd gheuen in dissem brẏue lvͦtterlicken tv erwerdicheit des almechtighen goddes vnd der allir hilghesten ivnkvrowen Marien sẏner muder vnd ouk / tv troste salicheit vnd ewighe ghedechtnisse der elenden Twene wischepel kornes gewonlicker markt mate Eẏnen wischepel roggen vnd eẏnen wische/pel ghersten von eẏner breide hvuen tv der andern missen der elenden altar . ghebuwet vnd ghestichtet in der par kerken sente Nycolaus . Jn der hilghen mer/terer ere Lẏuini . Valentini . Barbare und Dorothee . Disse twene wischepel kornes scal Andreas Jvͦterchowe boͤrgher tv Tzerwist . dẏ nv disse beschreue=/ne breide hvue drift vnd winnet . adir sẏne nakomelinge . wen he von disser werlde scheidet . gheuen vnd bringen alle iar deme altaristen . deme dẏ / ghenante altar tv der anderen missen geleghen is . vp sente Mertens dach ane vortoch . Vnd dẏ twene wischepel kornes scolen ewighe tẏt tv der and(er)en mis/sen des siluen altares bliuen . tv des nvt vnd vrome dẏ dar med begnedighet is . vnd scal dat also bestellen und voͤghen . dat he siluen tv homisse tẏden . / adir eẏn ander prẏster von sẏner weghen ouer dem dicke ghenanten altar misse halde . Vort mer wẏ Ratmanne tv Tzerwist mit vulbort der er ghe/schreuene lvͦde leggen vnd gheuen tv ewigher tẏt . tv der siluen anderen missen der elenden altar . Eẏne mark b(ra)ndenborghes silueres ierlickes tinses an deme / huse ieghen sente Nẏcolaus kor . Dẏ mark scal Hans hesse . dẏ nv in dat hus wonhaftich is . adir wẏ dat vp ierlickem tinse nẏmt . deme pryste(re) der anderen missen / des ghenanten altaris gheuen alle iar tv twen tẏden . eẏne halue mark vp Passchen . vnd eẏn halue mark in der meẏnde weke . Vnd ouk hebbe wẏ er benvͦm/de lvde gegheuen vnd gheuen ewichliken driddehaluen vẏrding brandenborghes siluers . vp vẏf schvhallen an deme vor gheschreuen huse . Dissen drid/dehaluen vẏrding scolen gheuen Herman belitz . Klaus moͤlner . Hans von wẏden . Arnt dunker . Lvͦtke peter . alle iar io welk eẏnen haluen vẏrding . adir / wy nach orer tyt tv tinse nẏmmet dẏ vor gheschreuenen hallen vppe sodanghe tẏt alse sẏ vor mẏdet werden . Dar nach hebbe wẏ Ratmanne tv Tzerwist / mit vulbort der erghenanten lvͦde gegheuen vnd gheuen tv der dicke ghenanten misse des beschreuenen altaris eẏn hus mit eẏme garden vp dẏ moͤlen/bruͦkge . dat hans sassen wente her tv von den elenden tv eruen tinse ghe hat het vnd dẏ ghenante Hans scal nv mer alle iar deme pristere dẏ tv / der ande(re)n missen der elenden altar belenet is gheuen eẏne brandebursche mark in twen tẏden . eẏne halue mark vp passchen . vnd eẏne halue / mark in der meẏnde weke von deme seluen huse vnd garden . adir dẏ sẏne neisten erfnamen sint nach sẏme dode . Denne vort mer gheue / wẏ ouk tv der ghenanten misse tweẏ bvden mit sodanghen garden alse dar tv wente noch ghehort hebben . vnd heẏne bernstorpes kindere wen/te her tv erflik beseten hebben . Disse bvden vnd garden gheuen vnd ghelden ierlickes tinses eẏne mark . dẏ men dem priste(re) der anderen missen / der elenden altar gheuen scal alle iar vp sodanghe tẏt . als dẏ bvden mit den garden vormẏdet werden . Vnd ouk scal man von dissen erueken vnd / garden schoten . waken und borgher recht dvn . als disser stad wonheit is . Dar nach alle disser vor ghenanten gvͦlde vnd tinses hebbe wẏ Ratmanne / tv Tzerwist . Vnd wẏ vorstender der elenden afticht ghedan vnd vortigen allent des . des vns Ratmannen von der stad weghen Tzerwist . vnd vns vorsten/deren der elenden . adir vnsen nakoͤmelingen von der elenden weghen an der vorschreuen gvͦlden behoren mvͦchte . Disser rede vnd gaue sint tvͦghe / Klaus hoghensteẏn . Hans rvlfs . Hans ghise . Wilken wils . Hẏnrik daghevẏr . Hans predemitz . Heẏne bulendorp . vnd Laurentz kopstorp des iares / Ratmanne . Klaus brizke vnd Hans gretz tv disser tyt vorstender der elenden . vnd vele ander guder lvͦde . Tv orkvͦnde vnd ewighe dechtnisse / dat disse vorschreuene stuͦcke gantz . ewich vnd unvorruͦcket bliuen . tv der anderen missen des elenden altares von vns adir vnsen nakomelingen . / So hebbe wẏ Ratmanne tv Tzerwist vnse grote ingheseghil mit witscaft hengen laten an dissen brif . Dẏ gheschreuen is na goddis ghebort dret/teẏn hvndirt iar. Jn deme seuen und seuentichsten iare . Jn sente Lucien daghe der hilghen ivnkvrouwen .