Wy Radmanne . Schepen . Jnnigmeyste(re) . vnd Burg(ere) gemeyne der stad to Czerwyst bekenne(n) ope(n)bar Jndessem je=/ghe(n)werdig(e)n . briue , vor alle(n) luͦden , dad wy eẏndrechtliken verkouft hebb(e)n va(n) vns(er) stad weg(e)n , seue(n) m(a)rk jngeldes / jerlikes tynses czerwyster weringe , hanse , clause , arnde , frede(r)ike claus werenars kindern . vnd ere(n) eruen vor / hundert m(a)rk B(ra)ndeb(u)rsches suluers , dy si vns . vul . vnd albetald hebb(e)n . na meydeb(u)rscher weringe , und wy gekard / hebb(e)n , jnder stad to czerwyst nud vnd vrome(n) . dar des nod . was , Desse g(e)n(an)t(en) seue(n) m(a)rk Ingeldes scholle wy odd(er) / wy des iares . Radman(n)e sin . geue(n) vnd betale(n) . den g(e)n(an)t(en) . hanse , clause , arnde , vnd frede(r)ike . claus werenars kind(er)n vnd ere(n) / erue(n) , jnder stad czerwyst . alle iar . vp sente . mertens dach . negest tukome(n)de , vort ouer eyn iar erst anstande an / Groschen ¹ odder an Sulue(re) wie eyne gemeyne . weringe is jnder stad to Czerwyst . ane allerleye hind(er)nisse . vnd scholle(n) wesen / schotes . vnd allerleye . stad Rechtes frẏ Also bescheyden , wenne wy dyd jngelt , wedder kope(n) wille(n) odder mog(e)n . so scholle / wy one dad witlik dun eyn virdel iares to vorne vor deme tynsdaghe , und geue(n) one dad vorbenu(me)de gelt . hund(er)t m(a)rk / myd deme tynse dy sik gebord vp dy tyd . vul . und al . jnder stad to m(a)gdeb(u)rch , m(a)gdeb(u)rscher wer(i)nge . alse eyn gemeyne / betalinge . is . inder . stad to m(a)gdeburch , We(re) ouk dad one ennigh . brok worde an orer guͤlde . dad wy one dy nicht engeue(n) vp / dy tyd . alse vorbenuͤmed is So scholle(n) si des macht . hebb(e)n dad si vnse Buͦrge(re) mog(e)n hindern myd Rechte vor ere guͦlde / wenne vnd wu dycke on des nod is , dar enschole wy noch enwillen , sy nicht vm verdenke(n) , Ouk wy(r)e oft der vorbenu(me)den / bruͤde(re) hans , claus , arnd , frede(r)ik ennich afe ginge , des god nicht enwyl , So schal dad vorbenu(me)de geld , vnd tyns , sterue(n) / van eyne(n) vp den andern , ouk h(e)re gebod geystlik odder werlik krych dy twische(n) h(e)re(n) vnd Sted(e)n w(er)den muͦchte , en schal on / dy orer guͤlde nicht hinderlik sin noch neynerleie recht schal on in vnser stad . schedelik noch . hinderlik sin on / erem gelde odder guͦlde , Ouk enscholle wy vns myd neyne(n) . deding(e)n behelpen , noch beschone(n) , dar sy ennig(e)n brok an orem / gelde odder tynse vm hebb(e)n scholle(n) Vortmere wolden sy ouk ymande . desse guͦlde v(or)kope(n) . dad scholle(n) . sy vns to vorne / segg(e)n , geue(n) wy on ore pen(n)ige nicht , Sweme sy dy denne v(or)kope(n) , deme wille wy dad v(or)briue(n) vnd tusch(ri)ue(n) . laten / desser bryue glyk . ane alle gaue vnd weddersprake , gescheghe ouk . dad desse bryf v(or)werlosed worde van nod weg(e)n / dad schal on an orem gelde noch tynse neyne(n) schaden . bring(e)n , Alle desse vorbeschreue(n) dink hebbe wy vorg(e)n(an)te(n) Radma(nnen) / Schepe(n) . Jnnigmeste(re) . vnd Buͦrg(ere) gemeyne der stad czerwyst geloued . in guden truwe(n) den g(e)n(an)t(en) . hanse , clause , arnde / frede(r)ike . claus weremars kindern . vnd ere(n) erue(n) . Stede vnd gantz tuhaldene , ane allerleye argelist / Tu orkunde hebbe / wy on dess(en) bryf gegeue(n) versegelt . myd vns(er) Stad . angehangeden Jngesele . Nach . goddes gebord drytte(yn)hundert iar / Jndeme dry vnd . achtichsten iare . Jndes heylig(e)n cruces daghe . exaltat(i)onis