Wy Ratman Alt vnde nyge Junyngesmeyster vnde Borge(re) gemeẏne der Stad Czerwiyst vnde vns(er) ¹

Wy Radman Schepen Iningmestere vnde borgere allegemeyne der stad tu Cerwest bekennen vnde betugen openbar an / dissen brife allen den dy on syen adir horen lesen dat wy eyndrechtliken mit guden willen vnde met wolbedachte(n) mude / hebben vorkoft vnde vorkopen met craft diszes brifes . deme vorsichtigen wisen man(n)e hern Johanse hogetorn kanoniken / tu Aken . twe vnde drutich mark ingeldes Jerliker gulde tu syme lyue Cerwester weru(n)ge . vor driddehalff hundert mark / myn(n)er ses marke(n) . der sulue(n) werunge dy vns vnde unser stat vul vnde al betalet sin . vnde vns witlik in vnser stat nuͦt / komen sin . disze vorgn(a)nte twe vnde drutich mark ingeldes jerliker gulde schole wy vnde willen deme vorbescreuene hern / iohanse geue(n) vnde betalen. alle iar viff vnde twintich mark up sente mertens dach . vnde seuen mark up wẏnachten schotes / fry vnde allirleye gebodes geistlikes vnde werltlikes dy wile dat hy leuet ane hinder . ane wedir sprake vnde ane allirleye / argelist . alzo dat keyn man die gulde tu male adir eyn deil vnder vns adir in vnse Stat besette(n) schal adir kan met geistlikem / adir werltliken gerichte , were auer dat en(n)ich man die gulde vnder vns adir in vnse Stad besettede met geistlike(n) adir met werlt=/likem gerichte adir mit gewalt vorbode dat scholden wẏ vnde wolde(n) von stunde(n) an na der besettu(n)ge adir na der vorbidu(n)ghe / dat vt dedinge(n) up vnse koste vnde auenture vnde up syne nicht . wen auer dy vorg(ena)nte her iohan(n)es steruet so schole wẏ vnde / willen ane wedir sprake deme dy vns diszen briff wiset al dat geue(n) dat wy vorseten hebbe(n) . bẏ ern ioh(anne)s leuende vnde ok allen / den dat gebore(n) is von der gulde tu geuene na der iar tal tu rekene von deme tage alze disze briff gegeue(n) is eẏn verndel iars / adir eyn halff iar myn adir mer tu allen went an den dach synes endes . also dat dissen briff wiset wat om geboren mach nym(m)er / besetten adir vortiden schal adir kan also man hern iohanse by syme leuende nicht enkunde vnde scholen vnde willen sin den / vordedingen nach diszes bryues vtwisunghe alze wy ern iohanse by syne leuende gedan hebben , were auer dat her iohanse na / sente mertens dach ouer up dy wynachte(n) adir inden negesten achte dagen darna ennich iar nicht betalden dẏ gulde vnde drage / her ioh(anni)s na den achtagen enge koste adir nyme en(n)igen schaden dorch der gulden willen dy koste vnde den schaden schole wy vnd(e) / willen dragen vnde he nicht betalde wy ok den briff wiser in achte dagen nicht dar na wen wẏ dar vm(m)e gemanet worden dat / om antreden muchte so scholde wy vnde wolden deme briff wisere dy koste dy he dorch der gulde wille drughe gelden ane wedir / sprake . Wir nuͦ en diszen briff ichtz vorgeten icht vorsumet icht misscreuen adir worde disze briff begoten adir worde dat Inge=/segel an dissen briff tu broken . adir worde he vorbrant adir vorloren . dat scholde . Ern Johanise adir deme dẏ dy bewisunge hedde / dat her hans em der gulde gegunt hedde oft dẏ briff nicht enwere tu engenen schaden komen Tu eyme orkunde vnde tu / eyme openbaren getuchnisze dat wẏ alle disze vorscreuen stucke(n) vnde artikel vnde eẏn islik bisund(er)n stede vnde gantz halde(n) / scholen vnde willen ane allerleie argelist Des geue wy hern Johanse diszen briff besegilt met unser stad angehangeden / Jngesegele dat wy met witschap eyndrechtliken vnde met guden willen hebben laten hengen an diszen briff den wẏ alle gesien hebben vnde gelesen is in al vnser iegenwerdicheit dy Gegeue(n) is na godes gebort dusent iar dry hundirt Jar indem / achte vnde negentigisten Jare an des heiligen lichams dage