Wy Radmann der Stadt Czerwist Bekennen openbar in dussen vnsen opene / Brife vor Allen de on sehn horen adir lesen Dat wy recht vnde redeliken van / gheheites und(e) bevelunghe wege , des hochgeborn Graüen Adolffes fursten / to Anhalt vnnses gnedigen hern vth synre wonliken orvede so wy on de / jarliken plegen to geuen , Den vorsichtigen hermann Rabbÿne vnde Claws / vandorppe vorstendere to Sunthe laurentz in der nygen stad magdeburg / drittich schogk older Crutz groschen So genge vnde geüe syn eyns vp to / nehmen vp sodanne dagetÿd Alse nw to dem(e) irsten vpp(e) Sunthe mertens / daghe nha gifft dusses brifes to komen ouer eyn jar dat is nemliken / wan man scrifft nha godes gebort (et cetera) in dem(e) achte vnde virtigisten jare / Theÿn schogk der suluen olden groschen vnde denn der negest vppe den / anderen Sunthe mertens daghe dar negest dem(e) irsten volgende ouk / Theẏn schogk groschen vnde vppe den dridden sunthe mertens daghe nha / den irsten twen volgende ouk Theyn schogk groschen vorberuret geredet / vnd(e) gelouet hebben , ouk reden vnde louen in crafft dusses brifes so vor/gescreuen stät gutliken vnd(e) wol to der genughe to geuen vnde to betalende / ane alles geuerdes vnd(e) argelist vnde wen wẏ denn so den obgnant(e)n / vorstender to sunthe laurentz de vorgescreuen drittich schogk groschen / alse vorgescreuen stät gegeuen vnd(e) betalet hebben , So schal dusse briff / denn meher machtelosz vnd wẏ der betalinge vorder to donde dar van / gequitet vnde geledich wesen ane alles geuerdes Des to orkunde / vnd(e) grotter wissenheit hett So hebben wÿ dussen breff hir nedden / med vnsem(e) Secrete witliken lathen vorsegelen De gegeuen is nha / (cristi) gebort vnses hern verteynhundert dar nha in dem(e) seuen vnd(e) / virtigisten jare Am(me) Sonnawende nha Sunthe Bartolomewes / daghe des hiligen Apostels