Wy Borg(er)meistere vnde Radmanne Schep(e)n Jnnigesmeiste(re) vnde gemeyne Borge(re) der Stad Czerwist bekennen apenba(r)e / vor vns vnse nakomenden in dessen vns(e)n apenbriue vnde dun kunt allen den dy en sih(e)n horen edder lesen dat wy med wol=/bedacht(e)n muͦde vnde ripen rade recht vnde redeliken vorkofft hebben vnde vorkopen jn vnde med craft dusses briues up eynen / recht(e)n wedderkoͤp viͤff gude vulwichtige rinsge gulden jerliker gulde vnde renthe uͤp vnsem(e) rathusze vͤt allen vns(e)n schoten / renth(e)n tinszen vnde tugeuell(e)n wuͦ wy dy hebb(e)n dem(e) Erba(re)n herren Ern Johanne godek(e)n vica(r)io indem(e) dohm(e) thu halb(er)stad vnde synen / Testame(n)ta(r)ien adir den dy dess(e)n briff med syne(n) will(e)n jnne hefft edder hebb(e)n wert vnde wy hebb(e)n em dy gegeuen vor hundert guld(e)n / des gna(n)t(e)n goldes dy vns van em reyde auer woltudancke gegeue(n) vnd(e) betalet syn dy wy vorder gekaret vnde gewant hebb(e)n jn uns(er) v(or)gna(n)t(e)n / Stad gemeyne nuͦt vnd(e) fromen dar des behuͦf vnd(e) noͤt was desse v(or)geschreue(ne) viff guld(e)n jerliker renthe schull(e)n wy vnd(e) will(e)n vnde / alle vnse nakomeling(e) den vorbenumed(e)n Ern johanne godek(e)n synen Testame(n)ta(r)ien hebb(e)n edder hebbe(re)n dusses brives med synen / will(e)n van vns(e)n radhuse up dess(e)n negest(e)n tokomende sunte Mertensz dach van gifft dusses briues vort auer ey(n) jar jn vns(er) Stad / Czerwist ane allerleye v(or)kummernisse geystlikes vnd(e) wertlikes gerichtes vnd(e) rechtes vnd(e) ouk he(rre)n gebodes ane v(or)toch vnde denne / dar na als(e) vort alle jar jerlikes uppe dy gna(n)te dagetid dy wile wy des nicht wedder auekop(e)n reyk(e)n vnd(e) gutlik(e)n geue(n) ane alle / geuerde jnghud(e)n loffen vnd(e) truwen Ouk moge wy edd(er) vnse nakomelinge dy gna(n)te gulde vnd(e) renthe als(e) viff guld(e)n med hundert / guld(e)n des gemelt(e)n goldes wedd(er) aue kop(e)n na duss(e)n jare welkesz jaresz wy will(e)n So vorder wy em den wedderkop up Sunte / Johann(is) dach Baptist(e)n midden jndem(e) sommer vorkundig(e)n wanner denn(e) sulke vorkunding(e) van vns geschin is So scholl(e)n / wy vnd(e) will(e)n eme ore hundert gulden(n)e rinsg(e) med den bedaged(e)n rent(e)n viff rinssche gulden(n)e vnde offt dar wat hinderstellich / gebleue(n) were vnd(e) vorset(e)n vul vnd(e) aͤl gutliken wedder geue(n) vnde betale(n) ane allerleye hinder argelist hulperede vnde geuerde des / thu eyne(r) ware(n) bekentnisse(n) vnd(e) vorder sicherheit dat alle vorgeschreue(n) stuck(e)n vnde article(n) desses briues dem(e) volgna(n)t(e)n Ern johann(e) / godek(e)n synen Testame(n)ta(r)ien hebbe(n) effte hebb(ere)n dusses briues med synen will(e)n van vnd(e) upgna(n)t(e)n Borg(er)meist(er)n Ratman(n)en Schepen / Jnnigesmeist(er)n vnd(e) gemeyne(n) borg(er)n der Stad Czerwist vnde uns(e)n nakomend(e)n stede vaste vnd(e) unvorbrak(e)n gehold(e)n werd(e)n So / hebb(e)n wy vns(er) stad vorgna(n)t(e) grote Jngesegel vor vns vnd(e) alle dy uns(e)n nakomeling(en) witlik(e)n lat(e)n heng(e)n nedde(re)n an dess(e)n briff / Na (cristi) vnses liue(n) he(rre)n gebord virteynhundert jar dar na indem(e) sesvnd(e) veftigest(e)n jare des dunredag(es) na aller hillig(e)n dage