Wy Borgermeistere Radtmanne vnnd Borgergemeyne der stadt Zcerwst Bekennen Jn diesszem vnszern apin / brieue vor vns alle vnsze Nahkom(m)en vnnd ydermennigliken die diesszen vnsz(e)rnn brieff Sehenn horen adder / leszen , dat wy mith eyndrechtliken Ripen rade vnd vnsz(e)r aller wethen vnd fulbort Den v(or)sichtig(e)n hanszen / dodeleüen . Hans dodeleuen selig(e)r nachgelaten szone borger to magdeborch vnd nach synen dode toüorbetter(e)n eynes / lehns , dat schall geschyen , mit rade vnnd weten synen negisten vier frunde vnd den wie diessz(e)n brieff mith / oren vnnd oren erffen wethen vnd willen Jnne hefft viff rynsche gulden Jerlik(e)r renthe vp Nati(vitatis) marie / nach dato diesszes brieff(es) Jerlik(e)n to geuende von vnsz(e)rm Rathusze vth vnsz(e)rn reydisten renten schoten tynszen / to fallen vnd vpboringen vp eynen r(e)chten wedd(er)kop vor hundert rynsche guld(en) houetsum(m)en v(or)kofft vnd die / alszo forth Jn vnsz(e)r stadt Nüth vnd frömen wu vns des noth vnd behuff gewest is , gekart vnnd gewanth / vnnd(e) von ohn Jn eyner Sum(m)en wol tor gnuge vnd to willen entphang(e)n hebben , Welke viff rynsche gulden / tynsze wy obgnant(e)n Borgermeistere Radtman(n)e vnnd(e) Borg(e)r gemeyne Reden glaüen dem(e) v(or)sichtig(e)n hanszen / dodeleuen wü vorberurt synen nehisten vier frunde vnnd(e) den we diessz(e)n brieff mith oren vnnd(e) oren eruen Wethen / vnnd(e) willen Jn hefft alle Jar vp Nati(vitatis) ma(r)ie jerlich Nach giffte diesszes brieff(es) Jn der oldenn stadt mag=/deborch unuorbaden vnnd(e) vnbekum(m)erth aller gerichte gutliken to geüene vnnd(e) to betalen Doch Be=/holden wy gnante v(or)kopere Jn vnnd(e) mith crafft diesszes brieff(es) die macht dat wy add(er) vnsze nach=/kom(m)en sodan viff rynsche gulden Jerlik(e)r tynsze mith hunderth rynsche gülden houetsum(m)a welkes / Jars wy mogen add(er) willen wedd(er) aüekopen vnnd(e) fryen mogen , Doch mith dem(e) bescheide dath wy / add(er) vnsze Nachfolger dem gnant(e)n hans dodeleüen synen nehisten vier frunde adder den wie diessz(e)n / brieff mith oren vnnd(e) oren erüen weten vnnd(e) willen Jnne hefft den wedd(er)kop eyn ferndel Jares / vor Nati(vitatis) 1 ma(r)ie v(or)kundig(e)n vnnd dan sodan viff rynsche guld(en) tynsze mith sampt den hunderth / rynsche guld(en) houetsum(m)en ok v(or)seten tynsze Effte der welke hind(er)stellich gebleuen weren ane alle argelist / Behelp vnnd(e) geuerde Geuen entrichten vnnd betalen sollen vnd willen vnnd(e) wanner solke ent/richtunge vnnd v(or)gnügünge all geschyenn is , Alszdan schal diesszer brieff machtlosz vnnd crafftlosz / syn vnd blyuen To orkunde vnnd Bekentnis hebben wy v(or)gnant(e)n Borgermeistere vnnd(e) Ratman(n)e / der stadt Zcerwst vor vns vnd(e) alle vnsze Nachkomen vnszir stadt Jngesigil an diesszen brieff laten / hengen vnnd Gegeuen Na der gebort Cristi vnsers h(e)rrn vierteynhunderth dar Nach Jn dem(e) eyn/vndenegentigisten Jar Am(me) Auende Nati(vitis) 1 ma(r)ie v(ir)g(inis) glo(rificatione)