Wy Borgermeistere vnd Radmanne der Stadt Zcerwst bekennen Jn diszszenn opin brieue / vor vnns vnd vnsze nakomelinge vnd vor alszweme die diszszenn vnszern brieff sehen horenn / adder leszenn dat wy myt eyndrechtlikem ripen rade vnde gantzen weten vnde fulbort der / wittigestem by vns von vnszer Stadt vnd gemeyn wegen vor hundert rinsche gulden / die vns tor gantzer gnuge betalt vnde fort Jn vnser Stadt witlikenn nüth gekomenn / sin rechts vnd redelikes kopes vorkofft hebbenn vnd vorkopenn Jn Crafft disszes brieffs der dogentsa/men fruwenn Katherinen nach gelaten weddewenn Claus stegemans seliger borger to / magd(eborch) Clausenn hansen oren sonenn vnd margretenn erer dochter Sestehaluenn rinsche / guldenn adder Szo vele werdiger vnd gengehafftiger muͮnte Jerlike rente die wy ohnn / von vnszer Stadt schotenn Renten tynsen to fellen vnd vpboringe wur an die syn alle / Jar vp dem kopfeligen mandach in der alden stat magd(eborch) vngehindert vmbekum(m)ert / vnd vnu(or)baden von alszweme gutlikenn vnd ane geuerde gelden vnd betalen sollenn / vnd willenn Doch wenn vns vnd vnszern nakomelinge dat bequeme is szo mogenn / sy die gedachtenn hundert guldenn adder Szo vele werdiger mu(n)te t(u) Jerliker tinse mit / hundert rinsche guldenn houetsuma wedder kopenn des wij der gemelten fruwen kathe/rinen nachgelatenn weddewen Claus stegemans seliger borger to magd(eborch) Clausen ha(n)se(n) / oren szonenn und margreten orer dochter adder den die disszenn brieff mit foren wille(n) / wuͮ obgnant Jnne hebbenn eyn verndel iars vor dem kopfeligen mandage dath touorn / vorkundigenn vnd to weten dhonn vnd ohn den vp den suluen kopfeliger mantage / dor na nehist folgend inder gnanten olden Stadt magd(eborch) die jc rinsche guldenn houet/geldes mith denn plichtigenn renten Jn eyner sum(m)en fry vnd von ydermen(n)igliken / vngehindert vnd vm(m)bbekummert weddergeuenn vnd betalenn ane alles geue(r)de / vnd des to glouffwerdiger bekentnis hebbenn wy erbenomeden Burgermeistere / vnd Radtmanne vor vns vnser nakomelinge ohn dissen brieff mit vnszer Stadt / Jngesigil hir an gehangen vorsigilt vnd Gegeuen und geschreuen nach Cristi / gebort vnsers hernn vierteinhundert dor nach Jm xciiij Jare am(me) middeweken / nach Jnnocennt