Wy Borgermeistere vnd Radmanne der Stad Zcerwst Bekennen Jn dusszen vnsern / brieue vor vnns vnd alle vnsere nakomelinge(n) vnd vor alsweme die dusszen / vnszernn brieff sehen horen adder leszen dat wÿ mit eÿndrechtlikem ripen Rade / gantzen weten willen vnd fulborth der wittigisten by vns von vnser Stad vnd / gemeyn wegen vor thweyhuͮndert rinsche gulden die vns tor gnoge gantz / betalt vnd forth in vnszer Stadt witliken nuͮth vnd fromen gekomen sin Rechtes / vnd redelikes kopes vp liffkop vorkofft hebbenn vnd vorkopen Jn vnd mit crafft / dusszes briues dem vorsichtigenn hanszen keiszer borger der olden stat madebroch / Agaten szyner eliken husfruwen vnd hanszen vnd annen oren kindernn / to oren vier lieuͮen die wile sy ale vhire adder orer eyn leuͮen twintech rinsche / gulden duchtig jn golde vnnd mü(n)the adder szo vele groschen alsze die gna(n)ten / gulden gelden mogen Jerliker lyffrente die wy dem mergedachten hanszen keiser / Agaten szyner eliken huszfruwen vnd hanszen vnd annen oren kindernn / dÿ wile szy alle viere adder orer eyn leuen von vnszer Stad bereidesten Schoten / tinszen renten tofellen vnd vpboringe wu vp vnserm Radhusze dy geuͮallenn / vnd war ane dy szin alle Jar na giffte duͮsszes briuͮes vp den Sontage / Jnüoca(vi)t Jn der olden stat magdeborch gutlikenn vnd wol todancke ane aller / gerichte geistliker adder wertliker vorhinderunge vnd Sunder eynige Jnsage / vnd alles geuͮerde reikenn vnd betalen szollen vnd willen vnd wanner / duͮssze velgnante hans keiszer agata szyn elike husfrüwe vnd hans vnd anna / ore kinder alle van dodes wegen dat god thom besten wende auegeghan / szÿn dan vnd nicht ehr szo szal dussze liffkop vnd vorschriuͮuͮnge gantz von / vncrefften machtlosz szyn vnd bliuͮen vnd wie merbestymden Borger=/meistere vnd Radtmanne vnd vnsze nakomelinge sollen solcker thwiͤntich / rynsche guldenn adder szo vele muͮnte vnd groschen wu obgnant lyffrente / vnd thweyhundert rinsche gulden houetsum(m)a gantz quijdt vnd ledich szyn / Des to orkunde vnd vhester holdunge hebben wy gedachten Borgermeistere / vnd Radtmanne vnszer Jngesigil an dusszen vnszern brieff laten hengen / vnd Geschreuen Nachre Christi vnszers hern gebort vierteynhundert / Dar nach Jm vier vnd negentigistem Jare am mandage nach dem / Sundage Jnuocauit