Wie Burgermeister Rathmann vnd Borger Gemeyne Der Stadt Czerwist Bekennenn Jn diesszen vnnszem op[e]/nen briüe vor vns vnd(e) alle vnnsze Nakomlinge . vor allen Den die diesszen brieff Sihen Edder horn leszen Dat / wie Eyndrechtlicke met Rade wille vnd(e) fulbordt vnnszer Aller aller vdt vnd(e) van vnnszer Stadt Bereidisten Ren=/then Tinszen Schoten vnd(e) uppboringen Dem Erszamen hanszenn Seger borger vnnszer Stadt Czerwist ka=/therinen syner Eelicken huszfruwen to orer twier liue Die wilhe orer Eyn edder sie beyde leüen to Eynem / Rechten lieffkope vorkofft hebben vnnde vorkophen Jn vnd(e) met krafft diesszes briües virteyn Rinissche guld(en) / Jerlicker lieffrenthe vor Anderhalffhundert Rinissche gulden hofftsum(m)a Die vns die gna(n)te hans Seger / An bereydem golde gantz tornuͮge fulh vnd(e) alh wol bethalet vnd(e) wol auergeantw(o)rdet heth(e) Die wie / denn(e) forder Jn vnnszer Stadt merglichen nuͮtt vnd(e) framen wu des noyt was wittlicken gekerth vnd(e) / gewendt hebben , Die suliuen virteyn Rinissche gulden Edder szo velh werdiger mu(n)the Jerlicker lieff/Renthe Reden vnd(e) laüen wie Ergna(n)ten Borgermeyster Rathmanne vnd(e) Borger gemeyne Der Stadt Czer/wist Dem suliuen hanszen Seger katherine(n) syner Eelicken huszfruwen alle Ja(r)e Jerlicken vpp wynnach/ten gutlicken vnd(e) wol todancke vnuortochlicken to Reicken to geüen vnd(e) to bethalen Aller gerichte / vmbekum(m)ert Ok aller hern gebott vnuorbaden Ane Jnsage Argelist vnd(e) geuerde , Vnde wannehr / dissze vorgena(n)ten hanns Szeger vnd(e) Katherina syne Eelicke huszfruwe , beyde Jngot vorstorue(n) vnd(e) / vorscheydin synn dat got thom allerbesten kere vnd(e) wende Dann(e) vnd(e) nicht ehr Szollin vns / vnd(e) vnnszen Nakomlingen sulke virteyn guldin edder so velh werdiger mu(n)the Jerlicker lieffrenthe to / sampt Anderhalffhuͮndert gulden hofftsum(m)a gantz qüiet leddich vnd(e) losz gestoruen vnd(e) diessze / vnnsze briff vnd(e) vorschriuu(n)ge gantz machtlosz syn vnd(e) bliuen Alle Stucke punctu vnd(e) arti/kelle diesszes Briües Reden vnd(e) lauen wie vorgemelten Burg(e)rmeister Rathman(ne) vnd(e) Borger Ge=/meyne Stede vesthe vnd(e) vnuorruckt to halden Des To Orkunde steder vnd(e) vahster haldunge / hebben wie Ergemelte(n) Burgermeyster Rathmann vnd(e) Borger Gemeyne vnnszer Stadt Grote / Jngeszegell vor(e) vns vnd(e) alle vnnsze Nakomlinge vnden an diesszen brieff wittlicken henge(n) / lathen Den Gegeüen vnd(e) Geschreüen Na Godd(es) Geborth virteynhundert Darna Jn deme / Szeuen vnd(e)negentigestem Jare Donnerdag(es) Na Dorothee der hilgenn Junckfruwenn