Wie Borgermeister Rathman(n)e vnde Borgere Gemeyne Der Stadt Czerwist Bekennen Jn disseme vnsem briue vor vns vnde alle vnsze / Nakomelinghe vor allen die diesszem vnszen breff Sihen horen edder leszen dat wie eyndrechthichliken myt Rade willen vnde fulborth / vnser aller vth vnszer Stad bereidisten Renthen thinszen Schoten vnde vpboringhen deme Ersamen Hansze lichtenberghe Borger / Jn der Oldenstadt Magdeborch Vnde Jlszen syner Eliken husfrouwen To orer twyer liue to eynen rechten liffkope vorkofft hebben / vnde vorkopen Jn vnnd(e) myt krafft disszes briues Teyn Rinsche gulden Jarliker liffrenthe vor hundert Rinsche gulden Houet Sum(m)e(n) / Die sze vns an bereidem golde gantz vornogeth vnde betaleth hebben Die wie denn(e) forder Jn vnser Stad Nuth vnd(e) frame(n) war vns / des noth vnde behoff dede witliken gekehrt vnde gewenth hebben Die suluigen teyn Rinsche gulden liffrenthe Reden vnde / gelauen wie ergenanthen Borgermeister Radtmanne vnde Borgere gemeyne dem gnanten Hanszen lichtenberge Jlszen syner / Eliken huszfrouwen alle Jhar nha giffte diesszes briues Als vpp den Sundach vor deme Sunnauende wan men Alleluia lecht / Jn der Oldenstad Magdeborch gutliken vnde to dangke ane alle vorhinderünghe Geistliker edder wertliker gerichte Ok aller her(r)en / geboth unuorbaden Ane Jnszage vnde geuerde to Reikenne vnde to betalen vnnd(e) wannehr Diesse vorgenante(n) twe Personen vonn / dodeszweghen dat got thom besten wende auegegan vnnd(e) vorstoruen syn Szo scholle wye der teyn gulden vortmhere to geuene / vnuorplichtet szyn Besunderen orer beyder kynder Hansz ore szone vnnd(e) Marga(r)eta ore dochter Die nu thu der tyd am leuende / syn . Vort mher schal man on Achte gulden Reyken vnde geuen Die wiele sze vnuorstorue(n) edder eyn an deme leuende sie Szo / lange sal sulke lieffkopp vnde vorschriuen Jn krefften stan vnde weszen ane geverde wenn(e) dann(e) die mherbenomede(n) vier p(er)sone(n) / wu vorgescreuen is vorstoruen vnde von dodeshaluen vorfallen syn dy got na synen willen friste Dann forder szo schall / die liffkopph vnnd(e) vorschriuu(n)ghe Craftlosz vnnd(e) vornichtiget bliuen gentzliken ane alle geuerde vnnd(e) dat wy borgermeister / Radtman(n)e vnde Borger gemeyne vnnd(e) vnsze Nakom(m)en schollen sulcke teyn Rinsche gulden liffrenthe vnnd(e) Hundert Rinsche / gulden Houet sum(m)a gantz quijt ledich vnnd(e) losz syn vnnd(e) bliuen Des to Groter Orkunde Hebben wy Borgermeister / Rathman(n)e vnnd Borger Gemeyne Vnszer Stadt Grothe Jngesegell vnden an dusszen vnszen breff witliken hengen lathen / De gegeuen Nach Cristi vnnszes Heren Godes Geborth Dusent Viffhunderth Am Sundaghe Vor deme Sunnaue(n)de Wann Men Alleluia lecht