ESTO dixo el rrey de Lançarote que lo non podia creer que era verdat que el yazia con la rreyna. Mas aquella ora que los sobrinos fueron preguntados ovo ende el pesar que es sobre todos los pesares; ca el amava la rreyna Ginebra a desmesura. Entonçe començo a pensar asy grand pieza que non sopo cosa do estava. E Mordorec le dixo: Sennor, nos lo encobrimos mientra podimos. Agora dezitnosvoslo sin nuestro grado. Agora fazet y lo que vos semejare, e que non venga mal ende a vuestra tierra nin a vuestros amigos. Commoquier, dixo el, que sea ende vengado asy que sienpre ende fablaran. E sy el mi bien queredes, rruegovos yo que me lo tomedes y. E ellos gelo prometieron que lo farian asy. E el rrey les prometio que faria del en tal guysa justicia que sienpre el e su linaje ende fablasen. Entonçe salieron de la camara e fueronse al palacio. Mas bien parescia en el rrey commo andava sanudo. E fuese el rrey a caça e non quiso que Lançarote fuese con el. E en commo dixo Lançarote a algunos de sus cavalleros: Veyes que senbrante me fizo el rrey? Ca non sabia Lançarote en commo era ya descobierto.
TANTO que el rrey Artus fue a caça, enbio la rreyna dezir a Lançarote que veniese a ella onde al non feziese. E el fue muy ledo e consejose con Boores. Por Dios, non vayades alla; ca bien sabedes que sy alla ydes, pesar vos ende verna. Ca he pavor de vos, e el mi coraçon me lo diz. E el dixo que lo non dexaria en ninguna guisa. Pues asy queredes, sennor, yd escondidamente e levat con vos vuestra espada. E fuese a la camara de la rreyna. Mas sabet que bien entendio el que Morderec e sus hermanos con
muchos cavalleros le tenian la puerta de la camara. En tanto quanto el entro en la camara, echose con la rreyna. Mas non yogo y mucho; que luego venieron a la puerta los que lo esperavan. E fallaronla cerrada e dixieron a Agravayn: Que faremos? Quebrantaremos la puerta? Dixo el: Si. Desy ferieron a la puerta. E oyolos la rreyna e levantose toda tollida e dixo a Lançarote: Ay, amigo, muertos somos. Commo, dixo el, que es esto? E escucho e oyo a la puerta grand grita e grandes bozes de omnes do querian quebrantar la puerta, mas non podian. Ay, dixo ella, amigo, agora sabra el rrey mi fazienda e la vuestra. Todo esto nos ordio Agravayn. Sy Dios me ayude, dixo el, yo ordire la su muerte. Entonçe se levanto del lecho. Ay, sennora, dixo el, a y aqui alguna loriga? Certas, dixo ella, non; ca plaze a Dios que muramos aqui amos. Pero sy ploguiese a Dios que vos escapasedes de aqui, se yo bien que non y a tal que me ose matar, sabiendo que vos erades bivo. Mas cuydo que nuestros peccados nos confondran. Entonçe vino Lançarote a la puerta e dio vozes a los que fuera estavan. E dixo: Malos cavalleros e covardes, atendet un poco; ca çedo averedes ela puerta abierta, e yo vere qual sera el ardit que entrara primero. Entonce abrio la puerta e dixo: Agora entrat. E un cavallero que avya nonbre Canagoyz, que desamava mucho a Lançarote, entro primero. E Lançarote que tenia ya la espada sacada, feriolo de toda su fuerça en guysa quel non presto arma, que lo non fendiese fasta en las espaldas, e dio con el muerto en tierra. E quando los otros vieron este golpe, non ovo y tal que osase entrar. Ante se fezieron afuera en tal guysa que la entrada finco libre. E quando esto vyo Lançarote, dixo a la rreyna: Sennora, esta guerra es finida. Quando a vos ploguiere, yr me. E ella dixo: Si vos fuerdes en salvo, yo non avere pavor de mi. Entonce tiro Lançarote al cavallero que matara escontra si e cerro la puerta porquel non entrasen los otros. E desarmol e prise de aquellas armas las mejores quel pudo. E dixo a la rreyna: Sennora, agora puedo yo, si Dios quesiere, yrme en salvo; que de quantos que me aqui guardan, yo me librare bien commo yo cuydo. E dixo ella: Ydvos e pensat de mi; ca yo bien se que ayna avere menester la vuestra ayuda. O bien, dixo el, mas si a vos ploguyere, levarvos he comigo; ca non ha aqui omne por que vos yo dexe. Esto non quyero yo, dixo ella; ca luego asy sera llannamente la nuestra follia conoscida. Mas Dios lo guysara mejor. Entonçe abrio Lançarote la puerta e dixo que non queria mas yazer en presion. E ferio al primero de un grand golpe quel fizo en tierra caer estordido. E elos otros que esto vieron fezieronse afuera e dexaronle la carrera. E Lançarote fuese a su posada e fallo a Boores en una camara con pavor de non verlo venir a su voluntad; ca bien gelo dezia su coraçon ca los del linaje del rrey lo tomarian con la rreyna si podiesen. E en esto Lançarote con su linaje partiose de la villa cavalgando. E fueronse a la floresta e metieronse en la orilla della donde era mas espesa, e estodieron y fasta la noche. E enbio luego Lançarote un donzel a saber nuevas. E traxieronle en commo el rrey lo enbiara prender a la posada, e non le fallaron. E luego el rrey mandara por su sentencia quemar a la rreyna, e guardaronla fasta otro dia.EL RREY mando a Agravayn que tomase ochenta cavalleros armados para guardar el campo alli do el fuego era que si Lançarote veniese, que la non podiese levar la rreyna. E el fizolo ansy commo el rrey le mandara. E levaronse la rreyna a quemar. E Lançarote en que supo las nuevas, cavallgo el e los suyos, e fallaronse treynta e dos cavalleros e fueronse escontra do parescia el fuego. E quando la gente los vieron venir, dieron bozes a los que guardavan la rreyna: Fuyt; que aqui Lançarote onde viene por levar la rreyna. E Lançarote que venia delante todos dexose correr a Agravayn; ca bien lo conoscio por sus armas. E feriolo tan fieramente que le non valio arma ninguna e metio la lança por el que parescio el fierro de la otra parte. E cayo en tierra muerto. Ansy que Lançarote con los suyos derribaron ende muy grand pieça; ca
fue una lit muy brava. E muy presto fueron vencidos. E quando Lançarote vio esto, fue a la rreyna e dixole: Sennora, que queredes que nos fagamos? E ella rrespondio: Amigo, yo querria que me levasedes adonde el rrey non me feziese mal. Sennora, dixo el, cavalgat, e vayamonos a aquella floresta e prenderemos y consejo que sea bueno. E fezieronlo asy. E sopolo luego el rrey commo eran desbaratados todos los suyos, e Lançarote levara la rreyna. E mandara luego el rrey guardar todos los puertos. E Lançarote con los suyos levaron a la rreyna a un castillo muy fuerte, e de ally enbio por sus amigos que le veniesen a socorrer; ca le tenia el rrey Artus çercado. E en esto enbio Lançarote dozientos cavalleros secrectamente que se lançasen en la floresta e estodiesen ende en tanto que sopiesen del rrey si vernia en paz. Donde non, que dende saldrian a socorrer a los del castillo. E asy fue que pelearon despues muy bravamente. E murieron muchos de los del rrey, mayormente de los de la Tabla Rredonda. De ciento e cinquenta que eran morieron ende setenta e dos, e de los otros muchos.QUANDO vyo Lançarote que el rrey Artus lo tenia cercado el que era el omne del mundo que el mas amara e que mas onrra le feziera, ovo ende grand pesar que non sopo que y fazer. Enpero non por pavor, mas porque lo amara el rrey Artus mas que a otro onbre que non fuese ssu pariente. Entonce tomo una donzella e apartose con ella en una camara. E dixole: Donzella, vos yres al rrey Artus e dezilde de mi parte que me maravillo mucho porque començo esta guerra contra mi; ca non cuydo que le nunca tanto erre que lo asy deviese fazer. Si vos el dezier que lo faze por lo de la rreyna, e que le fiz tuerto asy commo le algunos dizen, dezilde que me porne contra los mejores tres cavalleros de la su corte que me la non aponen a derecho esta culpa. E en onrra del e por el amor grande que perdi por mal aponimiento, dezilde que me porne ende en juyzio desta
corte sy le ploguyer. E si el al diz que esta guerra començo por la muerte de sus sobrinos, dezilde que de aquella muerte non soy tan culpado porque el me deviese desamar tan mortalmente; ca ellos mesmos se fueron rrazon de la su muerte. E la donzela luego se partio e levo su mandado e contolo todo al rrey. E ante que el rrey rrespondiole Galvan que el rrey estava para vengar la su vengança.