Estos son los terminos de Coria: por somo del Pie de Oveja, e dende por somo del otero Monio commo vierten las aguas contra nos, e dende por somo de la sierra de Santa Cruz, e dende por la penna de don Pelayo forredenna, e den por somo de Biçerdas ansi commo vierten aguas, e dende por Morasedas, e dende como Morasedas cae en Alagon e ixe a derecho de la otra parte de las Atalayolas que son en derecho de la mesa de Xerete, e dende derecho a la calçada, e dende como ixe la calçada de la sierra derecho al Puerto, e del Toronuelo ha derecho do cae Tajo ayuso a derecho de Piedras Alvas, e dende a Elza ayuso asi como entra en Tajo, e dende por somo de puerto de Vacas asi commo vierten aguas contra nos, e dende por Almaçaide asi commo vierten aguas contra nos, e dende por somo de la sierra de Pedrosin asi commo vierten aguas contra nos, e dende por somo de la sierra como vien a Gomar, e dende por somo de la sierra derechamientre a somo de Arrago como vierten aguas contra nos, e dende derechamientre por somo de la sierra como ixe a Pie de Oveja.
E acotamos estos terminos, que ninguna cabanna de ganado que entrar en estos terminos sin mandado del conçejo, que vezino no fuer, peche la cabanna de las vacas dos vacas, et de la cabanna de las ovejas tome diez carneros, e de los puercos V puercos; e esto tome por montadgo cada ocho dias hasta que salgan del termino. Et todo ome que no fuer nuestro vezino e en estos terminos [casa] hizier, el que lo y hallar tome de su aver hasta valia de çinco maravedis, e si la valia nol hallaren, aduganlo preso hasta que peche los V maravedis. Et todo nuestro vezino que en estos terminos casa hizier, sin mandado del conçejo, peche dos maravedis al conçejo. Et todo vezino que tajar enzina o alcornoque, ramas o tuero pora puercos, qui lo y fallare tomelle V puercos. Et si dixier: "no lo fiz yo", firmelo con tres vezinos e peche la calonna; si no, salvese con IIII e elle el quinto, et el otro non meta la manquadra. Et todo montalgo tomen omes del conçejo.
Qui quemare en termino de Coria desde mayo hasta San Martin, peche X maravedis al conçejo, si ge lo firmaren, e el danno a sus duennos; si no, salvese con IIII e elle el quinto, e por esto no de manquadra.
Todo ome que sacare oro de rio en termino de Coria sin mandado del conçejo, si ge lo podier firmar; si no, salvese con quatro e elle el quinto, e por esto non den manquadra.
Todo pescador que non fuer vezino e en estos terminos pescar, peche V maravedis, (e) sil hallaren por que los peche; si non, aduganlo preso hasta que peche la calonna.
Este fuero dio el rey a los vezinos de Coria: que en todos sus reinos non den portadgo nin respondan en todos sus reinos por nenguna ren, mas den fiadores que aparescan a derecho en Coria. E franquearon los reyes a los vezinos de Coria sus heredades e sus omes, que non pechen ni fagan fazendera; et acotolos que nengun ome que en sus heredades ho en sus omes metier mano, o en esto que lles mando el rey, que peche mill maravedis, e si fuer hechor tomenlle quanto ovier.
A esto el conçejo avenido, que nengun ome de Coria que vando hizier ho a vando se llamare, sino al cuerpo del rey, saquenlo por alevoso del rey e del conçejo, e derribenle las casas, e pierda quanto ovier, e tomenlo los omes del conçejo e metanlo en el castiello.
Alcalde o otro vezino de Coria que a otro quisier raigar e non pudier con el, faga testigos a los que y estodieren e aiudenlo; e si no lo quisieren aiudar, cada uno dellos peche tanto al querelloso quanto elle devia a pechar.
Todo ome a qui demostraren fiel e el fiel dixier: "fiel soe", e non quisiere ir antel alcalde, peche I maravedi. E el fiel sea vezino
e vaya antel alcalde, e si no quisier ir ante el alcalde, peche medio maravedi al otro con qui no quier ir.Mugier non vaya a fiel ni nenguno a ella, salvo si la raigaren bol mostraren plazo; e ella a el otro tal.
Todo ome que bestia ovier a meter e no la metier, el otro tome I fiel otro dia e prende pennos de un maravedi; e el fiel tengalos hasta IX dias, e si a IX dias el no demostrar fiel al fuero, que vaya al plazo sobre la prenda rezonar al logar connonbrado do julgar el alcalde, (e) sean muertos los pennos e de fiador de queda. E si se alçar de la villa, non sean muertos, si respondieren sobrellos.
Todo ome que no prendar hasta IX dias, aquel que non venier a fiel, o que bestia non metier o a plazo non venier, non prende mas por aquella calonna. Et si dixier: "a su casa fue e non falle prenda", firmelo con tres vezinos que el fue ante de IX dias e non fallo prenda, e de casa con pennos.
La bestia o la prenda quel alcalde mandar soltar e no la soltaren, denla doblada a su duenno, fueras bestias de heredade otorgadas; estas no sean sueltas sino por juizio de quatro alcaldes.
Todo ome que ante alcalde rezonar, <e> el alcalde por juizio le mandar meter bestia, e non la metier, peche I maravedi al querelloso. Todo ome que bestia ovier de meter, cada terçer dia meta bestia, [e quantas] bestias no metier, tantos maravedis peche al querelloso. Todo ome que bestia ovier de meter, meta una bestia muerta que vala I maravedi, e dende adelante meta bestias a fuero bivas.
Todo ome que se alçare al fuero, <e> el alcalde le vedar el fuero e le mandar meter bestia, no la meta. Et si bestia tovier, no la suelte, e si por esta rezon lo prendaren, tornenge la prenda dobla<da> con VI maravedis al querelloso. Todo ome que se alçare al fuero, delle el alcalde que vea el fuero. E si asi dixier el fuero commo julgo el alcalde, meta la bestia ese dia a la noche e alli yaga hasta que tome juizio del fuero. Et qui çe por su juizio alçar al fuero e el fuero le vedar el alcalde, peche IIII maravedis al que se [ alço al fuero], si ge lo pudier provar; si non, salvese con quatro <e> elle el quinto. E si en el [portiello se] anparar, depues que salir del portiello, respondal.
Todo ome que bestia metier sin soga, peche I maravedi. E si la bestia comier la soga, pida el otra soga, e meta la verdad que aquella su bestia comio la soga, e delle otra soga en ese dia. E si non ge la dier, peche I maravedi a qui devier meter la bestia. E sea la soga de una braçada.
Todo ome que vieda a comer a la bestia ante de terçer dia, o la tovier en descobierto, firmegelo con III testigos e denla doblada. Quin bestia oviere a meter despues de la bestia muerta, meta bestia biva de engera. E si tal no la metier, peche I maravedi al querelloso.
Toda bestia que prendada morier, venga su duenno e saquela e meta otra bestia en ese dia; e si otra no metier, peche I maravedi. E si no la quisier sacar, peche I maravedi al querelloso, e aquel en cuya casa morier, saquela e demande su calonna.
Ne<n>gund ome non pare fiel a ome qu'estodier yantando, o lavando su cabeça, o calçandose, o vestiendose, mas [demuestrelle] plazo pora otro dia exida de misa matinal, al logar do aya el alcalde. E si lo quisier raigar asperelo hasta que (o) vier el fiel que a yantado, o es lavado, o es vestido, o es calçado, <e> alli le puede parar fiel. E si non quisier ir con el antel alcalde, prendenlo hasta
que cunpra de derecho. E el que labrando estodier, en esta misma manera le fagan.Todo ome que a otro ovier a meter bestia, e dixier: "temome de perder la bestia", de ome sobre quien sea que no se alçe con ella. E si no lo dier, no le metan la bestia. E qui demostrar plazo sobre su bestia que vaya al logar do estodier el alcalde, e dixier: "otro plazo e julgado de otro alcalde a otro logar", metan verdad que ansi es, e vaya con el. E si no metier la verdad, vaya al logar do lle demostro el plazo. E si non fuer, suelte la prenda; e si la prenda non soltar e alla trasnochar, dela doblada al querelloso.
Qui aduxier ome con fiel a corral, este hasta arramada de los plazos e aparesca todol dia y. E si su contendor no metier pennos, haga el testigos e vaya sin calonna ninguna. E no caya por juizio de corral, sino por corral de viernes. E el viernes julguen los alcaldes sus juizios de la villa, e el sabado ajuntense, e julguen los afiados e adoben la pro de conçejo, e se asi no lo hizieren sean perjuros.
Todo ome que prendado fuer o fiel le pararen, si firmargelo podier que despues que prendado fue o fiel le pararon, (e) en la villa lo testiguaron, bestias yaziendo, aparesca bestias yaziendo.
Todo ome que [exido fuer] en carrera, o con armas o con sarçano, non venga fiel, si lo podier mostrar en verdad que ansi es.
Todo ome pare fiel despues de misa matinal dicha hasta biesperas, fueras se quisier raigar ome.
Todo ome que dos vezes prendar en el dia, o dos vezes parar fiel a su contendor, peche I maravedi.
Qui querella ovier de clerigo, tome un fiel del juiz clerigo e otro del juiz lego, e pare el fiel, e el su juizio julguen los alcaldes clerigos e legos. E el clerigo eso mismo haga a lego. Firmas que ovieren a hazer unos a otros, firmen clerigos e legos o legos e clerigos en uno. E juras (que) entre clerigos e legos, al fuero. Viudas e clerigos si(n) quintos se salven por lidiar, o por muerte de ome o por mugier forçiada.
Quin querella ovier de otro, de ome sobre quin sea que no se alçe, e si non lo dier, vendanlo sin calona fasta que de la calonna e cononbre su querella e meta la verdad que aquella querella a der, e si no dier verdad, non lo lieven sobre si e otro no tome aquel. E si sobresto lo prendiere, peche IIII maravedis al preso e quitese del. E si no lo quisier dexar e lo metier so techo, pechel VI maravedis. E si lo metieren en çepo o hierros, pechel XX. E quantos dias alla trasnochare, tantos XX maravedis peche, los medios al querelloso e los medios al que lo leva[va] sobre si. E aquesto si ge lo pudier firmar; si no, jure con IIII e elle el Vo. Et si verdad <no> quisier meter que non ha quin lo lieve sobre si, prendanlo hasta que peche la calonna.
Todo ome a quin demandaren casa con pennos, connonbre tres vezinos que lo lieven sobre si, e si entre tanto alguno lo lievar sobre si, sueltenlo. E si destos tres ninguno non lo quisier levar sobre si, prendanlo hasta que pague la calonna. E si despues que preso fuer, dier ome que lo lieve sobre si, sueltenlo. E si non lo quisieren soltar, quantas noches alla trasnochar, tantos XX maravedis pechen.
Todo ome que fiador dier, tal fiador de que aya valia de la demanda doblada. E si tal fiador no dier, su fiador no le preste. E si sobresta sobrecabadura non prendar o non parar fiel antes d'un mes, no responda mas. E si parar fiel o prendar ante del mes, respondan hasta un anno e non mais.
Si ome llevar sobre si por pennos de maravedi, e no prendar hasta IX dias, no sea tenudo a prendar mais. E si prendar, de los pennos doblados.
Todo aldeano que casa ovier en la villa, sea vezino si la tovier poblada con su ome. E de la meatad del diezmo en la collaçion do fuer escripto, e de al terçero recado por todas sus puestas. E si non lo hizier, non sea vezino.
Todo vezino de villa que ovier querella de aldeano, parelle fiel con un vezino aldeano e venga a su puerta a terçer dia de sol a sol, e si non vinier, peche I maravedi. E otro dia antes de los plazos, meta su bestia e razone sobrella, e si no quisier razonar, meta sus bestias al fuero, e quantas bestias no metier, tantos maravedis peche. E quando vinier a la villa, de casa con pennos a su deudor. E si el de la villa
hallar el aldeano en la villa, demuestrel plazo pora otro dia exida de misa matinal al logar do el alcalde julgar. E si alli le demandar casa con pennos, y lle la de.Aldeano que querella oviere de aldeano, parel fiel con un vezino aldeano, e venga a terçer dia a la finiestra de Santa Maria de sol a sol, e del casa con pennos asi como es derecho. E si non vinier, o casa con pennos no dier peche I maravedi. E si dixier: "no me demostro fiel", firmegelo con aquel que fue fiel e peche I maravedi a su contendor. E si dixier: "no fue fiel", jure con un vezino que no fue fiel, e reçiba sus pennos cabales. E qui fiel demostrar, o plazo, e non vinier el o su muger, o, si non ovier mugier, venga su çellerizo, e si non vinier ninguno destos, peche I maravedi al querelloso.
Si algun aldeano parar fiel en la villa, pora otro dia vengan anbos a la finiestra de Santa Maria e paguen su derecho, asi como sobredicho es.
Muger aldeana venga a fiel; si no, peche un maravedi al querelloso.
Todo ome que dixier a otro: "e vas fiel", e el otro non quisier ir con el, si valadi fuer o aldeano, prendanlo hasta que de la calonna, e si raigado fuere en la villa e toviere casa con pennos poblada, pechel I maravedi. Aldeano que parar fiel a otro aldeano, e venier aquel a quin parar fiel e el otro non venier, peche medio maravedi. E si venier el que parar fiel e el otro non, peche I maravedi.
Todo ome que aqui redro parte prendar o parar fiel, si ge lo pudier firmar, peche I maravedi, e primeramientre reçiba su calonpna, e su boz mantenga despues primeramientre.
Todo ome que juizio vençido renovar, si ge lo pudieren firmar, peche IIII maravedis aquel a qui demanda, e pierda la boz.
Qui ferir o mesar a vezino, peche XII maravedis al querelloso, si ge lo pudier firmar; si non, jure con IIII vezinos e elle el Vo. E si fizier livores, peche XX maravedis al querelloso, si ge lo podier firmar; si non, jurelo con IIII vezinos e elle el Vo. E si firmar pudier que torno sobre su cabeça, no peche la calonna. E si livores fizier, peche la media calonna <a> aquel a qui firio.
Qui ferir o mesar a morador que no fuer vezino, peche dos maravedis al querelloso. E si fizier livores, pechel IIII maravedis, si ge lo pudier firmar con III tales como el es, e si no lo pudier firmar, jure con un morador.
Qui ferir o mesar a vezino sobre salva fee o livores fezier, peche C maravedis, el querelloso reçiba la meatad e los alcaldes e los VI la
otra meatad. E asaquenlo por alevoso del conçejo, si ge lo pudieren firmar; e si non, jure con XII vezinos al vezino, e al morador con VI.Qui ferir o mesar o livores fizier a morador sobre salva fee, peche XX maravedis, la mitad al querelloso e la mitad a los alcaldes e a los VI, si ge lo pudier firmar; e si no, salvese, asi como sobredicho es.
Todo ome que salva fe diere, tal salva fee de que aya la valia de la calonna. E si despues que salva fe diere si ferier o mesar o algund mal fezier, los que la salva fee levaron, si lo podieren fallar, prendanlo sin calonna e metanlo en mano al querelloso con todos sus bienes. E si en çepo del querelloso morier, non salga por enemigo nin peche la calona. E si los que la salva fee levaron non lo pudieren aver, ellos pechen la calonna.
Qui a morador oviere a firmar, firmelle [con moradores] o con vezinos, quales pudiere aver.
Mugier de vezino, o fijo o fija de vezino, o pariente o parienta de vezino, que con su pariente morar sin soldada, aya fuero de vezino.
Quin ferir o mesar a vezino sobre conçejo hecho, si ge lo pudier firmar, peche XXIIII maravedis, e [al] morador VI, los medios al
querelloso e los medios a los medios a los alcaldes e a los VI; si non, salvese con IIII e elle el Vo. E forçia e vilto, firmen con dos o con tres e dende adelante.Qui ome lisiar, tal muerte le den commo por muerte de ome. E de tal lision de ojo, e de nariz, e de rostro, o de mano, o de pie, o de pixa, o de cojones, [o] de teta de mugier.
Qui tajar orejas o dedos de vezino, quantos dedos o quantos dientes quebrantar delantre, o sacare, tantos XX maravedis peche al querelloso. E al morador que vezino no fuer, peche la mitad. E si dixier: "no lo fiz", salvese con XII o lide, qual mas quisier el querelloso. E al morador, salvese con III.
Todo ome que vençido [fuer] por calonna pechar de maravedi arriba, peche en ropas e en ganado, e la ropa e el ganado sea de nuevo hasta de mediado. E si oro o plata quisier meter, metalo, e apreçienlo los alcaldes, e tomen ende la diezma parte por que lo apreçian, e digan por amor de Dios e de la jura que hizieron al conçejo, que derecho apreçian segu<n>d su seso. E por valia de dos maravedis [dos] alcaldes lo digan, e dende arriba IIII alcaldes lo digan.
Qui vezino descavalgar que cavallero stovier, pechele VI maravedis e tengal la estribera. Quien aldeano descavalgar, peche dos maravedis; e si anbos fueren aldeanos, tengalle la estribera e peche dos maravedis.
Qualquier ome que a ome matar, si lo supieren por verdad quelle lo mato, enforquenlo; e si non, lidie. E si cayere, enforquenlo. E si no lo pudieren aver, den de su aver a los parientes del muerto fasta trezientos maravedis, e el otro aver que fincar, prestelle. E si non ovier valia de trezientos maravedis, juren çinco de sus parientes, lo<s> mejores que ovier, que mas bienes non ha, e denlo por enemigo.
Qui forçiar muger velada e provargelo pudieren, enforquenlo. E si provar no ge lo pudieren, lide. E si cayere, enforquenlo, e si non, [salga] sin calonna. E qui forçiar otra muger que fuer vezina, que peche trezientos maravedis, si firmargelo pudieren, e salga por enemigo, e si non, lide. E si lidiando cayer, [peche] la pena e salga por enemigo. E qui forçiar morador, peche X maravedis, si ge lo pudier firmar; si non, salvese con seis.
Por muerte de ome, o por lision, o por muger forçiada, desafien en conçejo tres domingos con dos alcaldes. [Qui matare] ome sobre salva fee, peche seisçientos maravedis a los parientes del muerto. E si el [dannador] no pudieren aver, los que la salva fee fiaron, lo pechen.
Todo ome que salva fee demandar a otro ante IIII alcaldes, ge la den, o por corral, o por cabildo, o por conçejo. E los alcaldes escrivan la salva fee, que si despues fuer menester, que lo puedan mostrar. E si la salva fe no escrivieren los alcaldes e despues danno y venier, si ge lo firmaren, los alcaldes lo pechen al querelloso. E si lo negaren, jure cada uno con IIII e elle el Vo.
El que desafiado fuer en conçejo por muerte de ome, o por mugier forçiada, o por lision, al primero corral meta sus bestias. E si en la tierra no fuer e parientes ovier, metan sus bestias e hagan aquello que mandaren los alcaldes. E si las bestias no metieren, sean enemigos manifiestos de los que lo desafiaron. E si ome ovier muerto, sea enemigo de sus parientes e del conçejo. Qualquier ome que desafiado fuer, asi como sobredicho es, e en la villa fuer, meta sus bestias e venga ante los alcaldes, e aduga sus bozeros, e los alcaldes denlle dos fieles con que se vaya a ençerrar. E alli diga en qual casa se quier ençerrar. E <si> despues que ençerrado [fuer], fuera lo atestiguaren con tres vezinos, fueras por juizio de alcaldes que lo manden desençerrar, quantos dias lo testiguaren tantos X maravedis peche a sus enemigos. E el dando derecho ansi como mandaren los alcaldes, afienlo, e quantos dias pasaren que lo non quisieren afiar, tantos X maravedis pechen al enemigo, si ge lo podieren firmar con tres alcaldes que lo no quisieron afiar.
Todo ome que enemigo ageno cogier en villa o en aldea que sea vezino de Coria e fuer sacado por enemigo a nuestro fuero, peche çien maravedis a los alcaldes e a los VI, los medios al querelloso e los medios a los alcaldes e a los seis, si en su casa lo testiguaren con bonos omes asi como fuero manda; si no, salvese con IIII e elle el quinto. E si dixier: "en tu casa es mi enemigo e abreme tu puerta", e no ge la quisiere abrir, firmegelo e pechel la pena asi como si lo testiguase en su casa. E en aldea con aldeanos firme, e en la villa con vezinos.
Todo ome que a firmar ovier, firme con tres.
Por muerte de ome, o de mugier forçiada, o por lision, meta dos bestias, e por otra cosa, una bestia; e si por mas lo acotaren, no meta otra. E quien ovier de meter bestias, cada terçer dia las meta, una cavallar o otra mular e vala por dos asnales. Por muerte de ome, o por mugier forçiada, o por lision, entre a lidiar o salvese con XII; qual quisier el querelloso, tal le cunpla.
Mugier que aleve hizier a sus parientes, fierganla e martierienla sin calonna, si firmargelo podieren con bonos omes, e esta firma no recuda a repto.
Qui fallar ome con su mugier o con su parienta fasta segunda, si ovier marido de bendiçiones o a juras, matelos anbos sin calonna ninguna, e non ixca por enemigo. E si matare el varon e non la muger, peche el coto e ixca por enemigo.
Mançeba en cabello que ascondamientre, sin sus parientes, tomar marido, sea deseredada. E el que la reçibiere ixca por enemigo de sus parientes.
Biuda tome marido qual se quisier con sus parientes.
Mançeba en cabello huerfana, los parientes de anbas las partes la casen. E si los parientes de la una parte la casaren, los que la casaren salgan por enemigos, e pechen el coto a los otros parientes, como si la matasen.
Biuda no faga boda en domingo, nin vaya cavallera, ni tome marido antes d'anno. E si lo reçibier, peche la calona, asi como dicho es.
Qui mugier velada e jurada en mano de clerigo e dados fiadores por sus drechuras la sacar de su casa, e despues la quisier reçebir, delle boda e arras e reçibala. E si ella dexare a su marido, sea deseredada; e qui la anparar, peche diez maravedis a su marido quantos dias alla trasnochar, en casa del pariente o del que la anparar.
Qui demandar forçiadura de mugier, e el otro dixier: "no lo fiz sinon por su voluntad e por mi aver que lle di"; por este manifiesto no lidie nin peche la calonna. E por lo demas niegue o manifieste, e faga quanto julgaren los alcaldes, e la manquadra que dier la mugier tal sea: jure con IIII de sus parientes e elle el quinto. E si parientes non ovier, jure con IIII vezinos que en ese dia fue hecho primeramientre e no por su voluntad nin por aver, e entre lidiar e jurar con XII, qual quisier el querelloso, tal le cunplan. E si non jurar la manquadra, no le respondan. E despues si se quisier alçar al rey, alçese e meta pennos de dos maravedis, e el otro de dos maravedis; e el que cayer, de dos maravedis a los fieles, e el otro no de nada.
Qui dixier: "a las armas!", peche X maravedis a los alcaldes, (e) si ge lo firmaren con tres omes bonos. E si no, salvese con IIII e elle el quinto, e estas firmas no recudan a reto.
Todo ome que firier con cuchillo, o de porra, o de piedra, o con cosa que feridas fueren de muerte, en el çepo yaziendo, peche su calonna. E si no ovier donde lo pechar fasta IX dias, cortenge la mano los andadores. E si el otro morier, enforquenlo. Todo ome que ferier e no dier feridas de muerte, de bonos fiadores e este a derecho.
Mugier que biudad quisier tener, tome una casa de doze cabriadas, e una tierra de dos kafiçes senbradura, do la quisier tomar, e una vez de molino o de açenna, cada quinze dias, un dia; e una bestia asnal, e una mora o un moro, e un lecho comunable con un alfamar, e con un fierro, o con un cabeçal e dos savanas: e una vaca, e dos bues, e doze ovejas e una puerca, e de todo esto lo que quisier tome, e no reçiba entrega en otra cosa. E reçibalo del aver de anbos, e si no lo ovier de consuno, tome la meatad del aver del. E la questo resçibier, lieve al dia del domingo e al lunes bodigo, e dinero, e candela, e quantos dias non lo levar, tantos maravedis peche a los parientes del muerto. E despues que lo reçibier e marido tomar, delo doblado a los parientes del muerto.
Todo ome que enfermar e mandar por su alma, e despues otra vez ma<n>dar, la postremera manda sea estable.
Todo ome que morier, den su cavallo e sus armas a su hijo mayor. E si el marido no ovier hijo, den su cavallo e sus armas por su alma, sin partiçion, e los otros hijos no tomen entrega.
Qualquier ome que sin lengua morier, den el quinto de su mueble por su alma. E esto el obispo con los parientes del muerto, lo den alli do vieren que mejor fuer. E el que morier con su lengua, hasta la mitad de su aver mande, si quisier, e prestel; e si mas mandar, lo demas non vala.
Todo ome a qui su mugier morier, saque ante de partiçion una bestia qual quisier de las que ovier. E la muger, saque antes de partiçion todos sus vestidos quales en vida del marido ovo, e un lecho de ropa. El marido saque sus armas e su cavallo e sus pannos, quales ovo en vida de su mugier, e un lecho de ropa. E si cavallo no ovier, saque una bestia de siella, asi como sobredicho es.
Marido e mugier que se permediar quisieren, haganlo al dia del domingo, exida de misa matinal en una collaçion de la villa, o al sabado a las biesperas, e sea estable. E se asi no lo hizieren, no les preste.
Manda que mandar el marido a la mugier, o la mugier al marido, fasta la meatad de su aver lo pueda mandar. E si mas le mandar, nol preste.
Mugier que antes de anno tomar marido, peche IIII maravedis a los
alcaldes de la hermandad. E si con mandado de los alcaldes casare, peche dos maravedis. E si mugier prennada reçibier marido, sea descredada e tomen la mitad del aver, tanbien mueble como raiz, los parientes del muerto, e la otra meatad tomen poral castillo. El que la reçibiere por mugier, si muerta fuer la criatura, peche la calonna e salga por enemigo de los parientes del muerto.Todo ome que murier, o mugier, <e> fijos o fijas ovier, e despues el marido tomar mugier o la mugier tomar marido, e non ovier partido con sus hijos, e despues otros fijos e fijas fezieren e despues el marido o la muger morier, los hijos primeros partan la herençia e el mueble que a ellos pertenesçe, e despues partan con los otros hijos. E si alguna ren metier el padre o la madre, de los hijos que son sin padre o sin madre [que] fizo mester en su herençia, e fuere adelante, partan los hijos e las hijas con el padre o con la madre e<l> aver que fue de suyo ho los parientes quelle mas perteneçiere, e despues partan su herençia e su mueble que ganaron anbos en uno los otros hijos, o ella con sus hijos o con sus hijas, e todo su aver asi lo partan.
Todo ome que su heredad quisier vender, digalo primeramientre a sus parientes que su heredade quiere vender. E quanto los otros dieren por ella, denla a sus parientes la que quisieren conprar. E si a otro la vendieren e los parientes la quisieren conprar, no la puedan vender e puedanla sacar quando quisieren e dalla a sus parientes. E si les pudier firmar, quel queria vender su heredad e lles hizo testigos e el no ge la quiso conprar, vendala a qui se <la> pagar. E si los parientes la quisieren conprar, paguen hasta nueve dias el terçio; e si a estos plazos no pagaren, tengala el que la tien e vendala a quin se quisier.
Q<u>in heredad agena entrar e arrancar mançano o peral o otro arvol, dela doblada con seis maravedis al querelloso.
Qui bues echar de hero do bues araren, o le sacar la clavija, ho los destorvar que no aren, si ge lo pudier firmar, peche VI maravedis a su duenno de los bues; e si non, jure con un vezino.
Mugier que derronpier heredade de marido, o el marido la heredade de la mugier, entre en el quarto. E si hizier molino, o açenna, o casa, o vinna, o huerta, alli tome el quarto de la heredade o la meatad del lavor; e qual se quisier escoger, atal tome.
Todo ome que conprar herençia o ovejas o qual cosa quier con su muger de su aver, entre la mugier en la mitad despues que fueren velados. E si la mugier conprar alguna cosa, ansi lo fagan de su aver, aya el marido la meatad. E si alguna cosa [camiaren], asi sea.
Todo ome que fijo huerfano le fincar, e bivier nueve dias, e despues morier, el padre o la madre que fincar herede todos sus bienes del hijo o de la hija, tanbien mueble como raiz, [e] pueda fazer dello como de suyo. Herençia de parentesco, no se pare tras anno. E heredad de quadriella que no fuer partida, no se pare tras anno a los de su quadriella. E las tierras que hermanas deven ser e mandanlas eguar, (e) no se paren tras anno. Al huerfano que non ovier quinze annos e al cativo, no se pare tras anno.
Fijos o fijas que huerfanos remaneçieren que no ovieren quinze annos, sus parientes metan sus buenas en almoneda con el padre o con la madre, e qui mas por ello dier e mas bien les hizier, ese sea su guardador e los reçiba. E tanto por tanto el padre o la madre los tenga si quisier tenellos, el mueble este por mueble e la raiz por raiz. E si a cabo de un anno non venieren meter en almoneda el aver e dar la ganançia, metan las bestias cada terçer dia fasta que adugan la ganançia, e no ixcan ende por ferias ni por solturas fasta quel paguen.
Todo ome a quin demandaren heredade, e podier firmar que mas ha de un anno que la tien con lavor, ansi como le perteneçe, ayala por sienpre. E si el otro dixier: "antes de anno demande esta heredade", firmegelo que antes de anno ge lo demando, e respondal por ello. Esta demanda tal sea prendando e apertando e razonando ante alcaldes; e por valia de çinco maravedis firme con un alcalde, e por diez maravedis con dos alcaldes, e por quinze maravedis con tres alcaldes, e dende arriva con IIII e elle el quinto.
Qui labrar exido de aldea, peche X maravedis, e dexe el exido; los medios al conçejo e los medios a los querellosos.
Quien sobre lavor ageno entrare ho lo derronpiere, peche VI maravedis al querelloso, e quitese dello, e aya tal lavor que llegue surco a surco.
Todo ome que heredade otorgar, y de fiador sobre la heredade que aya valia de la heredad doblada, e si tal fiador no dier, por y caya.
Qui heredade ovier a otorgar, sobre la heredade otorgue; e quando otorgare, otro dia meta bestia, e cada terçer dia meta bestia. E si vençido el querelloso fuer, doble la heredade, e si el otro non ovier donde pechar, el fiador lo peche sus bestias yaziendo. E por esto no le metan el ome en poder, ni se alçe al rey. Et qui otor ovier a dar por heredade, a nueve dias lo de, e no pase mas de terçer dia el otor.
Si el marido morier non responda su muger ni sus hijos ni qui su buena heredare, sinon por deuda que deva. E el que tovier parientes huerfanos, con su buena respondal, e non se pare tras anno ni tras respuesta.
Qui dapno hizier en vinna, por cada vid que fuer paçida peche V maravedis, e dende arriba hasta X maravedis, si fuere calonna de paçedura de vinna. E qui ovier a pechar calonna, a conta de X sueldos a maravedi peche. Et qui tomar puercos o ovejas o cabras o ganado alguno, salvo cabeça mayor, si quisier mate dellos dos e non tome otra calonna, tanbien de puercos, como de ovejas, como de otro ganado, salvo cabeça mayor.
Qui cogier uvas en vinna agena o paçier a sabiendas, peche V maravedis; e entre la calonna de los V maravedis e la calonna de cada vid, qual quisiere el querelloso, tal reçiba.
Qui vendimiar vinna antes de San Çebrian, peche X maravedis al conçejo, salvo en el termino asi como escripto es. E quin fallaren uvas o agrazes, [si recabdo] no dier donde las ovo, peche I maravedi al querelloso. E si dixier: "conprellos", de otor. E si otor no dier, peche la calonna. E el otor que otorgar, de recabdo donde los ovo; si no, peche al querelloso un maravedi.
Todo ome que arrancar vinna ho arvol, ho la tajara, que este en prado defesado a fuero o en hera, peche I maravedi por cada arvol a su duenno del prado.
Estos son los cotos en que no entren las cabannas del ganado ni puercos ni cabras ni ovejas ni vacas: desde el aldea de Coçuela veniendo ayuso por el lonbo asi commo vierten las aguas a la vega fasta Alfarageme, e de Alfarageme por medio lonbo hasta la cabeça de Coçuela, e dende por las Xamaragas asi commo vierten las aguas a Valderrey fasta la carrera de çibdad, e por somo de la cabeça de Ubres, e por somo del lonbo asi como ixe a las Xamaragas de Alcornocal, e dende las Xamaragas ayuso hasta Çahalviento, et dende allende el rio desde Çahalviento veniendo arriba por la cabeça de las Xamaragas fasta la fuente Salgada en derecho de Coçuela. Qui fallar el ganado en estos terminos, de cada cabanna de puercos tome V puercos; e de la cabanna de ovejas tome X carneros; e de la cabanna de las vacas tome dos vacas. Qual ome quier que las fallar en estos cotos, morador de villa o vezino, tome estas calonnas. Qui toda esta calona reçibier, jure con quatro e elle el quinto, qui en estos terminos fallo el ganado, e si menos tomar quisier no caya por ende.
Todo ome que quisier hazer fijo o fija, ho fijos ho fijas, fagalos exida de la misa matinal, al dia del domingo, o al sabado a las biesperas, en una collaçion de las de la villa, e asi sea firme e estable; e si asi non lo fizier, nol preste. E los aldeanos asi lo hagan.
Toda vinna aya XX estadales en coto, e quin y fallar puercos en el coto, tome ende dos puercos; e de ovejas, dos carneros, tanbien de vinna vendimiada como por vendimiar; e si menos y ovier de una quarta de vinna, no aya fuero si no fuere en bago. E por cabeça mayor quien vinna entrar o en prado, peche una diezma de maravedi. E por puerco, quin <en>trar y, peche una quinta de maravedi. Et por toda calonna meta el dannador en mano del querelloso; si no, peche la calonna. Prado o vinna o huerto, si [fuer] redrado XX estadales de la delantera casa del aldea ondes, aya coto. Otrosi en la villa. E si menos fuer redrado, no aya el coto si no ovier pared de çinco palmos en alto sobre tierra e tres en ancho en redor; e a los de la otra aldea aya coto.
Todo ome que fallar puercos o cabras o ovejas en su rastrojo, do ovier gaviellas o treznales, o en vinna vendimiada, tome dos carneros o dos puercos, e no tome carnero ençençerrado. E si carneros non andovieren en las ovejas, tome dos ovejas e no tome marueco; si lo tomar, delo doblado ansi como si fuese carnero ençençerrado. De puercos, tome dos puercos. E de ovejas, tome dos carneros. E de cabras, tome dos cabras. E de cabrones, tome dos cabrones e no tome otra calonna. E de prado asi tome como de rastrojo. E destas calonnas, el aldeano tome la meatad, e si dixier el querelloso: "revelesteme pennos", jure con un vezino, e doblegelos el que lle los anparo. E si dixiere el duenno del ganado: "no lo tomaste en tu rastrojo, ni entre [te]zna-
les, ni entre gaviellas, ni en tu vinna vendimiada", jure el que lo tomo con un vezino que en su lavor o <de> su sennor los vio, e fue de pos ellos, e tomolos e tienlos. E si no pudier jurar, torne lo que tomo doblado e peche II maravedis al sennor del ganado. E si moro lo tomar, el sennor del jure por el. Qui entrar en lavor agena o en frucho, cavalgando o de pie, peche I sueldo al duenno del lavor.Todo ome que frucho ageno tomar, si ge lo pudieren firmar, peche II maravedis; e si non, jure con un vezino e el otro meta la manquadra, salvo por vinnal. Qui paçier frucho que a huerto pertenezca o cogonbral, por cada una raiz peche tres dineros.
Qui prado, o vinna, o huerto, ho pan, quemar, ageno, o colmenar, o açenna, o molino, peche diez maravedis al querelloso, e esto si ge lo pudier firmar; si no, jure con quatro e el la manquadra. E por toda demandançia de un maravedi arriba, den la manquadra.
Qui danno fizier en miese, por cabeça mayor peche I ochava, e por V ansares I ochava, e por puerco de muradal I ochava. E qual frucho comier, de tal peche. E quin comier hera de noche, por cabeça mayor e por puerco peche I ochava, e por ovejas o por cabras o por ansares, por V, I ochava. E ganado que andodier a pastor e danno fezier en hera de dia, non peche; el que andar sin pastor, peche asi como sobredicho es.
Las tierras que hermanas deven ser, manden iguarlas e eguenlas por o deven seer, e no se paren tras anno. E qui las conprare e liende quebrantare, ho mojon arrancare, peche dos maravedis al
duenno de la linde, si ge lo firmaren, e tornenlo en su lugar; si no, salvese con dos vezinos.Qui danno fiziere en lino, por la entrada peche I sueldo, e quanto danno fizier apreçienlo asi como sano, e peche otro tanto. E si dixier: "niegolo", apreçienlo, e qual fuer el danno asi se salve.
Qui danno fizier en lavor agena, alli de pennos, si ge los pidieren; e si ge los revellaren, venga a su casa e prende con un vezino. E si ge los revellare, peche un maravedi, si firmargelo pudiere; si no, salvese con un vezino. E si el ganado en corral tovier, delo por pennos, e si lle lo non dier e alla trasnochar, degelo doblado al duenno del ganado. E el de dia, tome pennos quales ge los dieren. E otro dia tome pennos de maravedi hasta que se entregue.
Qui despojare ome e lo lexar en cuero, pechel dos maravedis, si ge lo pudier firmar; e si non, jure [con] un vezino.
Qui danno fizier a sabiendas, peche al querelloso tres maravedis, si ge lo firmaren; si non, jure con dos e elle el terçero e el otro la manquadra, e si manquadra non oviere el otro, jure solo.
Prado amojonado de quarta hasta una arançada aya fuero, salvo si fuer en bago de otros prados o de vinnas. E esto en el aldea e en la villa.
Los yugueros tomen bues a quinto, e a cada uno den dos kafiçes e IIII ochavas de pan, el medio de trigo e el medio de çenteno, e media ochava de sal e III pares de abarcas buenas. E qui mas diere ho mas pidiere, peche IIII maravedis al castiello. E den en an<a>faga a un iugo de bues III kafiçes e medio. E si los bues cansaren, pechen las obras, e si morieren de cansançio pechen las obras e el bue. E los yugueros tengan bues de la fiesta de San Çibrian fasta San Çibrian e fagan quanto mandaren sus sennores. La cosa que lles mandaren sea de lavor, e faganla segundo su seso. E si su sennor no le diere su anafaga, fagalle testigos que lle de su annafaga, e si ge la non dier, non labre con el.
Todos los yugueros que obras fizieren perder, por cada una peche un maravedi. E si lo negare, jure por quatro obras con un vezino, e por X obras jure con IIII e elle el Vo, e por mais lidie, e si cayr doble la calonna. E si su sennor fuere aldeano, con aldeanos firme. E si bues de su sennor enguerar el yuguero, sinon en lavor de su sennor o por su mandado, doble aquellos bues; e si lo negare, jure con IIII e elle el Vo. Esto no aya ferias ni solturas. E si su sennor dixier: "matesteme mi bue", jure la manquadra, e el iuguero consigo el Vo. Qui bue descornar, ojo quebrantar o pierna, tomelo e de otro tan bono. E de toda bestia tal juizio aya; e si dixier: "no lo fiz", jure consigo el Vo, e el meta la manquadra.
Qui querella ovier de su iuguero, tomelle el Vo fasta quel le este a derecho, e el iuguero haga a el testigos que reçiba su derecho, e si non quisier venir, meta bestia cada terçer dia para el que reçiba su derecho, e estas bestias no sean sueltas ni por ferias ni por solturas. Todo aportellado que ovier amo asi lo faga, e se asi no lo fezier, no responda mas. E esto sea por las obras quantas perdier a su sennor; mas por otra querella quel sennor del ovier, prendalo sin
calonna hasta quel peche el danno o le haga derecho de aquella demanda. E todo ome que ge lo enparar ho rezonar ho lo bandear, peche X maravedis al sennor del mançebo e pierda la boz.Los ferreros tengan rejas desde San Çibrian hasta San Çebrian, seis rejas por I maravedi, e dende a su quenta. El herrero que tovier quinze rejas en aldea, sea suelto de puesta e de fazendera e de fonsado e de apellido; e ferrero de villa asi lo faga. E el que tovier XXX rejas, sea escusado, e faga la reja dos vezes de nuevo, e dende aguze e calçe, segur e açadon, e açuela, e escoplo. E si por su culpa se perdier obra, por cada una obra peche un maravedi. E si dixier que por su culpa no se perdio la obra, hasta X obras jure con IIII e elle el Vo, e si fuere menos a su quenta. E por mas lidie. E si cayr, doble la calonna. E qui mas [pedier] o dier, peche IIII maravedis, si ge lo firmaren; si no, salvese con III.
Todos los herradores hierren tres dozenas a maravedi. La ferradura que antes de nueve dias quebrar o cayere, fierrenla otra vega<da> sin preçio; si non, peche un maravedi al querelloso. E los ferreros que fezieren ferraduras, faganlas tales como las calanas de conçejo. E si peores clavos o peores herraduras hizieren, peche cada uno IIII maravedis al castiello. E si postura o juramento hizieren sobresto contra conçejo, peche cada uno IIII maravedis a los alcaldes. E si negaren que lo non [hizieron], jure cada uno con IIII e elle el Vo, e fagan las ferraduras. Los ferradores que las ferraduras pecharen por malas o por malos clavos, los [ferreros] que las ovieren fechas, denlas dobladas a los ferradores; e si non, peche cada uno dellos senos maravedis a los que las conpraron, e por esto cada terçer dia meta bestia, e la bestia y iaziendo peche. E si la bestia no metiere, prende el penno de maravedi, e desto no aya ferias ni soltamiento.
Este es el fuero viejo de cavalgada, por que sienpre cavalgaron adaliles. A primas en mentar a Dios e de si connonbrar sus fueros. Atalaeros cavalleros allende Tajo, dos maravedis, e peon un maravedi; e aquende Tajo, el cavallero un maravedi, e al peon medio maravedi. E allende Tajo e aquende, a ferida de parte en parte IIII maravedis, e otra dos maravedis. Ferida de cabeça, do huesos exieren, IIII; e quantos dientes o muelas o dedos perdiere, X maravedis. E por mano, o por pie, o por ojo, o por narizes, XX. De ferida de cavallo que pase de parte en parte IIII maravedis, e otra dos maravedis. E ergan todo cavallo, fueras cavallo que echaren a paçer suelto. E si dixier su sennor: "travado lo eche", firmelo con tres de conpannero, e dengelo erguecho; e si non, no. E si los adaliles o la conpanna les provaren que mentira [firmaron], tresquilenlos, e ixcan por alevosos. E si a monte fueren sin mandado de los adaliles, e alla tomar ferida su cavallo, o muerte, non ge lo yergan. E si(n) algun traidor llevar cavallo de su conpannero, sus conpanneros con quien comiere a pan, lo pechen, siquier ganen siquier no. E los adaliles e la conpanna los metan en manos al querelloso; e si non, ellos lo pechen. E yergan el cavallo que tal sea fasta cabo de anno, e denlle quanto le costo, fasta treinta maravedis e non mas. Atalaero ho otro o [el] que estodier en la vela, ho en atalaya, e lo fallaren dormiendo, tresquilenlo e ixca por alevoso, si lo provare<n> con dos omes. Nengun ome que fuxier de buelta ho de rebata, tresquilenlo e pierda el quinon. En cavalgada, si entre si travaren, el que firier con cuchillo, o con espada, o con lança, o con piedra, o con porra, cortenge la mano con otra tal arma; e si non, y la conpanna. E los adaliles e la conpanna metangelo en poder, si no, ellos lo pechen. E si lo matar, enforquenlo. Ningun ome que non ovier portiello e ganançia descober, hasta XX maravedis denle I maravedi. Ballestero que llevar balesta con dos cuerdas, e Ia avancuerda e con LX saetas, el cavallero tome media cavalleria, e el peon quarta. E cavallero que derribare a otro cavallero tras viso, tome la siella; e si fueren dos o
tres, partanla. E el peon, tome, otrosi, el mejor senal. E si mas fueren, sea de conpanna. El que levar loriga, o lorigon, o capiello, de çinquenta cavallerias o dende arriba lleve su derecho, e dende ayuso nada. E esto es derecho: IIII capiellos, Ia cavalleria; loriga o lorigon con almofar, Ia cavalleria; ho lorigon con capiello, Ia cavalleria; braffonas, Ia quarta; lorigon sin capiello e sin almofar, media cavalleria. Alcaldes que andodieren, lo que ganaren, ellos lo ayan en poder e ellos lo partan. E o non ovier alcaldes, adaliles lo fagan. E por todas estas cosas, si adalil firier algun ome por pro de conpanna, non peche calonna. Cavallo ferido o quebrado, si su sennor se temier que morra, demuestrelo a la conpanna, e ellos lo tengan fasta IX dias; e si morier, denle en que lo yerga por razon de la muerte, e si bivier, denlle su derecho. Todas feridas, si fueren sanas ante de partiçion, non tome nin ge lo yergan. En arrancada, quin en canpo robare fasta <que> la segunda sea fecha, pierda el quinon e ixca por alevoso.Todo ome que juizio ovier de corral, meta dos bozeros e mas non; e si mas metiere, elos alcaldes vazien el corral, e quin y estodier sobre su coto peche una quarta de maravedi, e si ge la dexaren sean perjuros.
Todo ome que aduxier pescado reziente, elle lo venda. E ansi lo fagan de las liebres, e conejos e perdizes. E si a otra villa lo llevar, el que lo fallar, tomelo sin calonna. E recaton, asi de gallinas, como de lenna, como de otra cosa, se y andar, peche I maravedi para el conçejo; si no, salvese con un vezino. E si los alcaldes no lo tomaren sealles en perjuro.
Todo tavernero gane el quarto e non mas; e si mas vendiere de a esta cuenta, peche un maravedi a los alcaldes, e si lo negare, jure con
un vezino. Todo vezino que por esto prendar, respondalle. Los carniçeros e las panaderas asi lo cunplan.Por pan de panadera, o por vino de tavernera, o por carne de carniçero, o por pescado seco de çacatera, o por queso de quesera, quin dineros les oviere dar, [delos] a terçer dia.
Los çapateros, por solar denles tres meajas, el maravedi a X sueldos; si sobier o deçendiere, tomen a su quenta. E qui mas dier o mas tomar, cada uno peche senos maravedis, si ge lo pudieren firmar; si no, salvese con senos vezinos.
Las mugieres entren en banno en dia del domingo, en dia del martes, el dia del jueves; e los varones entren en los otros dias. Todo ome que entrare en banno el dia de las mugieres de sol a sol, peche un maravedi al conçejo: e ansi lo fagan las mugieres. E si el banador omes metiere en el banno el dia de las mugieres, peche un maravedi. E las mugieres que entraren en el dia de los varones, pechen dos maravedis al conçejo. Ningun ome non de preçio en banno por escudero, [e] qui non oviere escudero, lieve por escudero ome de su pan; e las mugieres asi fagan. Alcaldes e juiz e escrivano no lieven sinon un escudero al banno, e si mas llevaren, seales en perjuro; e el que no oviere escudero o mançebo de su pan, [tres] lieven, uno que los lave e sea escusado. Este es el preçio del banno: de IIII sueldos fasta seis una puyesa, e de seis sueldos hasta XII una meaja, e de XII sueldos
fasta XX un dinero. E quin pennos echar en bano fasta IX dias no sean muertos, e dende adelante sean muertos, e el banador no sea escusado. Qui su preçio llevar por fuerça, peche un maravedi para los alcaldes. E el si tomar preçio de mançebo o de mançeba o de tres uno que deve seer escusado, peche un maravedi a los alcaldes.Quin moro ageno hallar en nuestros terminos: desde los visos de las Xamaragas de allende el rio aca, e como vien per las Xamaragas de Algodor, e dende para la cabeça de la Xara, e como ixe a Valdevacas, e dende por el lonbo derechamente Alfarajeme como ixe al enzin do cae en el rio, den a el en serviçio I ochava de maravedi; e dende arriba fasta en Plazençia, o en Granada, o a la sierra de Gomar, e fasta Elia, e fasta Tajo, den a el en serviçio medio maravedi; e dende allende den a el en serviçio un maravedi.
Qui ferir moro ageno, o mora, o los mesar, peche dos maravedis a su sennor. E si fezier livores, peche IIII maravedis a su sennor; si non, jure con IIII e elle el Vo. Qui ferir moro o mora ageno, jure solo que no lo ferio por su desonra de su sennor; e si no jurar, o de plazo cayre, peche la calonna doblado a su sennor.
Qui matar moro de lavor o mora de serviçio, peche quinze maravedis a su sennor. E si matar moro de merçede, los alcaldes e los VI apreçien quanto peche a su sennor.
Qui ferir mançebo ho mançeba agena ante su sennor, o ome de
su pan, peche la calona doblada, la meatad al mançebo e [la] meatad a su sennor.Todo moro o mora que ferir christiano o christiana, su sennor peche la calonna, al vezino ansi como de vezino, e al morador asi como de morador.
Quin ovier a jurar ho a firmar, a vezino, firme con vezinos; e a morador, con moradores.
Qui aduxier moro o mora de fonsado o de açaria, e cativo christiano yoguier por el, antes que [taye] den a el XXX, e despues que [tayar], den tanto quanto tayo fasta çien maravedis. E si de çien maravedis arriba tayo, no le den a el mas de çien maravedis. E tal sea el taiamiento ante los alcaldes del rey e por conçejo. E el que lo conpro denle tanto e medio de quanto lo conpro antes que taie. Todo ome de Coria o de su termino que cativar, e otro vezino de Coria o de su termino cativo conprar, moro o christiano, si por el yoguier, del a el tanto e medio de quanto lo saco en almoneda, e den el cativo a sus parientes. E si no lo quisier dar, meta dos bestias bivas en casa del querelloso. E si los alcaldes las soltaren, cayan en perjuro e no les preste. E si el cativo christiano muerto fuere, torne el moro a su sennor, si lo quisier reçebir. E si su pariente lo sacare e mas aver por el diere, denlo al duenno del moro. E si negare, jure con quatro e elle el quinto.
Todo aportellado que <a> su sennor tornar mano, cortengela. E si su amo lo soltar, fagan un tapial en el castiello. E al que dixier: "ayudame, que lo pueda prender", e non lo quisier ayudar, peche a el cada uno tres maravedis. E si lo negaren, cada uno jure con IIII vezinos e elle el V.
Todo amo que a su aportellado ferier, no peche calona.
Qui matar aportellado, o forçiar su mugier o su fija o su criazion, reçiba la media de la calonna su amo.
Todo ome que entrar con otro pora su serviçio hazer, e ante de su plazio se salier del, pierda la soldada. E qui lo acoger, peche dos maravedis a su amo, si ge lo pudier firmar que ante del plazio sel salio. E si el otro dixier: "no sope que contigo hera", juregelo el solo; si no, peche la pena e echelo de si. E si su sennor lo echare, el bien lo serviendo, de a el su soldada. E si su sennor dixier: "mal me servias", del un christiano que jure esto, e de a el aquella cosa que avia y servido; e si no quisier jurar, de a el su soldada.
Todo labrador que sinnal o preçio tovier por lavor, e el lavor dexar fasta que sea fecho, peche un maravedi al sennor del lavor e cunpla el lavor. E aquel que sennal le dio e el lavor le tollio, pierda la sennal. E por todo mercado que sennal tovier e se arrepentier, doble. E el que la dier, si se arrepintier, pierdala.
Todo carpintero que madera aduxier al mercado con alvura ho ripia, peche un maravedi al conçejo.
Qualquier ome que casa dier <a> alquile o la tomar, el que la tomar, si la dexar, de todo el alquiler. E si el sennor de la casa lo della sacar ante de su plazo ho por otro ome, sino para si, pierda el alquiler. E el que tenia la casa, si morando conprar suya, de quantol mereçio.
Todos los mercadores de traperia, si acreyeren, prenden en todo tienpo ellos; e ellos asi respondan en todo tienpo sin calonna, e no pierdan su pennora.
Alcaldes de hermandad no prenden ni acoten sin querelloso, sino por su debda.
Alcaldes que tomaren judio con [christiana], firmengelo con dos christianos e un judio, o dos judios e un christiano, que en uno los tomaron, e prestel; e si no, nol preste. Toda christiana que tomaren con judio, e los aduxieren sobre consejo hecho, por prendella con el judio, esa justiçia fagan del uno que del otro.
Biuda que no ovier hijo de quinze annos asuso, ho que no ovier valia de treinta maravedis arriba, non peche; e en otra manera, peche. Los [junteros] no pierdan sus derechuras.
Todo ome de Coria que preso ganar, moro o christiano, prestel, sinon la quinta que de al rey, siquier vala poco siquier mucho.
Alcaldes de hermandad e andadores cojan sus soldadas de San Juan hasta la fiesta de San Miguel, e los arteros, quando los tomaren, den todo su derecho. E si esto no cogieren desde San Juan hasta San Miguel, non les respondan mas por esta soldada.
Todo sennor que tovier a Coria, no meta mano en ningund ome de Coria que y morar, fueras el cuerpo del rey. E el juez coja sus quintas e el portero su portaje coja, e si el querella ovier de algund ome de Coria, demandel por nuestra carta con su manpostero por juizio de nuestros alcaldes.
Todo ome de Coria que dixieren ques traidor de conçejo ho de rey, enquiran alcaldes e bonos omes; e si fallaren ques traidor, fagan del cuerpo justiçia e metan el aver en el castiello.
Quin borra filar e en sayal la metiere, ho con pendes de hierro la cardar, peche un maravedi al conçejo e pierda el preçio, si ge lo pudieren firmar; e si non, jure con un vezino, e de la borra al duenno del sayal, e fagagelo bono.
Todas las mugieres que enprestaren o acreyeren alguna cosa unas a otras, respondanse hasta un maravedi, e por esto no se paren tras sus maridos.
Toda mugier que oviello vendier en mercado, ho varon, peche un maravedi al conçejo.
Quin velar ovejas, velelas al diezmo de los corderos, o de diez quesos uno; y si mas diere o mas tomare, peche quatro maravedis al conçejo. E qui las anafagare, tome el quinto. E destas quintas, qui las quisier tomar, de a su quenta e resçiba a su cuenta. Desde ese dia que començare a hazer quesos de en soldada del cabannero en anafaga, e en abarcas, e en sal, e en quajo; de la lana de las vazias, e de los corderos el quinto. Todo pastor que ovejas velare, de sennal de la oreja e del fiero en los pellejos. E si dier diez pellejos, jure con un vezino que de su ganado son e por su culpa no morieron. E si dier sennal de diez pellejos arriba, lidie, e si cayr, peche. E de quanto conoçiere, por la conoçençia responda, e razone por si. E de puercos, tal juizio cunpla.
Qui guardar vacas soldaderas, guarde X por un maravedi. E qui dier sennal, de dos cueros con sennal de fierro de oreja. E si mas dier, lidie, e si cayr, peche. Vacas soldaderas e ovejas [quinteras], el que las velare no se pare tras San Juan e responda a su duenno del ganado. E el amo responda otrosi por su soldada. E qui menos vacas velar de diez por un maravedi, peche tres maravedis al conçejo.
E desdese dia que començar a fazer queso o manteca, de a su cuenta en soldada e en anafaga del cabannero, e tome a su cuenta del queso e de la manteca.Quin puercos guardar, desdel dia que començar a guardarlos por conoçençia, quantos perdiere tantos dos maravedis peche por los que fueren annales o mayores, e por los que no fueren annales peche por cada uno un maravedi.
Todos aquellos que ganado echaren a pastor por Sant Iuanes, e despues su sennor ge los quiera toller, salvo por cativaçion o por enemizad, delle toda su soldada. E si por catividad o por enemizad ge la quisier toller, delle quanto ovier mereçido. E si el pastor dexar el ganado, pierda quanto ovier mereçido.
Qui matar puerco annal, o mayor o menor, pechelo asi como sobredicho es enante, e por lechon, peche una quarta de maravedi; (e) si hallaren [que no lo] mato por su voluntad e [jura] con un vezino; si non, doble el ganado e peche IIII maravedis a su duenno. E si lo negare e despues lo manifestar, pechelo doblado con la calonna. E si firmargelo podieren, pechelo asi como sobredicho es con la calonna.
Toda ave domada, palonba de palonbar o de casa, quin la matare, peche un maravedi por cada una a su duenno. E por gallina, e por
an[sares], o por otra ave, peche un maravedi, si firmargelo podieren; si non, jure con un vezino, salvo falcon, açor o gavilan.Ovejas que paçieren entre aldeas, anden çiento en uno e non mas, e çinquenta vacas e no mas. E si mas y andodieren, pechen un maravedi al castiello cada domingo.
Todos los que ganado ovieren e aparçeria quisieren hazer, <haganla> fasta calendas juli.
Las açennas e molinos maquilen a vez. E el maquilon que vez destajare, si ge lo pudieren firmar, peche quatro maravedis, los medios al querelloso e los medios a los alcaldes; si non, jure con vezino e muelan a vez. E non tome mas el maquilon ni el heredero. E qui tomar mas preçio o vedar vez, peche quatro maravedis; si no, jure con un vezino. E el molinero o açennero que otra cosa y fezier, non sea molinero a fuero nin sea escusado.
Toda panadera que pan crudo vendiere, quebrantandolo el que lo conpro, qual ge lo tornar, tal lo tome. E si no lo quisier tomar, faga testigos de tres omes e peche un maravedi a los alcaldes.
Los fornos cuegan a treinta e non menos. E si a menos cozieren, peche quatro maravedis, <la mitad> a los alcaldes e la mitad al querelloso, si firmargelo pudieren; si non, jure con un vezino, e cuegan a vez. E si el pan bien no cozieren, peche un maravedi al duenno del
pan. E si lo negar, firmegelo con tres mugeres e peche un maravedi al duenno del pan. E faga forno qual quisier fazer, e quin vedar vez peche un maravedi, el medio a los alcaldes e el medio al querelloso; si non, jure con un vezino.Toda fuente que naçe entre quadriellas, e fuer fuente de regar, como parten la heredad, partan el agua. E en qual heredad naçiere, ese tome primero, e asi por orden; e dos dias ande fuera, e al quarto dia torne a la heredad do naçe. E los que no venieren al cabze cavar o a fuente mondar, non ayan y parte. E quin la furtar o la destorvar en dia ageno su agua, pechel dos maravedis e doblelle su agua, si ge lo pudier firmar; si non, jure el otro con un vezino e otro no de manquadra. E si non jurar o de plazo cayr, pechel dos maravedis.
Toda fuente perenal que arroyo echare en qualquier heredade que sea, denle tres braçadas para carrera en ancho a todo redor de la fuente, e çierre su lavor si otra agua non oviere abondadamientre. E esto sea a aquellos que en su aldea morare<n>, e no a los otros de otra aldea. E quin pozo cavar en su heredade, no de agua <a> ninguno por fuero.
Los molinos nin las açennas no tuelgan agua a los huertos ni a los linares. Las açennas e los molinos muelan desde San Juan fasta San Miguel a XII, e desde San Miguel fasta San Juan muelgan a VI. Los que antes fueron fechos, o despues, tanto alçen que no tuelgan moler al de suso. E las pesqueras sean defesadas de suso [veinte] estadales e de yuso fasta uno. E el que y pescar, salvo <con> botron o anzuelo, peche IIII maravedis al duenno de la pesquera; si no, jure con un vezino.
Todo ome que rastrojo ajeno quemar, peche tres maravedis al sennor del rastrojo, si ge lo pudier firmar; si non, jure con dos vezinos e elle el terçero. E si quemar troznales, o gaviellas o miese, pague quarenta maravedis al sennor de la miese, si ge lo pudier firmar; si non, jure con XII.
Todo ome que en calle, o en castiello, o en carcava echare estiorco, peche un maravedi al conçejo. E otrosi, qui cavar tierra o arena so el castiello, peche un maravedi e refagalo de argamasa.
Todos los menestrales que lavor agena labraren e la mal hizieren, haganle otra vez sin preçio; si non, peche un maravedi al sennor del lavor, o jure que no sabe mejor lavor fazer.
Todo ome que casa quemar agena a queriendas, enforquenlo, si cosa verdadera fuere; si non, jure con XII vezinos, al vezino, e elle la manquadra; e al morador con moradores. E si casa quemar que vala çinco maravedis o ende arriba, entre jura e lide, qual mas quisiere el querelloso, tal le cunpran a el, e de quanto y perdiere por todo le responda.
Qui rio hervolar, peche quatro maravedis; e qui lo prendar, tome los medios e al castiello los otros medios.
Qui ganado sacudiere fueras de los terminos de Coria, reçiba ende el quinto, salvo cavalleros de arrafalla e pastores de ganado. E si cavallo y morier, de aquel ganado ge lo yergan. E cavallo que morier en apellido de conçejo, del dia que lo conpro a un anno, denle por el tanto quanto le a el costo; e de anno adelante, de<n>le por el treinta maravedis.
Todo ome que pediere en conçejo, no le den mas de un maravedi. E qui su vez tovier o mas le mandare, peche quatro maravedis al conçejo.
Qui derronpier en villa casa de vezino con armas, o corral, peche çinquenta maravedis al sennor de la casa, si ge lo pudiere firmar. E estas firmas recudan a repto, o jure con quatro e elle el quinto, qual se quisiere el querelloso.
Qui derronpier casa de vezino de villa en aldea, o corral, o molino, o açenna, o colmenar, o cabanna, peche a su duenno X maravedis, si el ge lo pudier firmar. E las firmas recudan a repto, [entre] lide o jure con IIII [e] elle el quinto, qual se quisiere el querelloso. Qui derronpier casa o corral de aldeano, o açenna, o molino, o colmenar, o cabanna, peche V maravedis a su duenno, si ge lo pudier firmar; si no, jure con dos e elle el terçero, con tales como elle es.
Todo ome que vinna agena tajar a sabiendas, o quemar, o huerta, o casa, tal juizio aya como por muerte de ome.
Todo ome que dexier: "demos de cada una collaçion alguna cosa", peche dos maravedis al conçejo, e lo que dixier nol preste.
Todo ome que ganado ferier por desonra de su duenno, peche al duenno del ganado quatro maravedis, si ge lo pudier firmar; si non, jure con quatro e elle el quinto.
Todo ome que firier bestia agena por desonra de su sennor, peche IIII maravedis, si ge lo pudier firmar; si non, jure con quatro e elle el quinto. E si la matare, dela doblada con quatro maravedis al sennor de la bestia. E de toda bestia en esta manera misma, si ge lo pudier firmar con tres vezinos al vezino, e al morador con moradores o con vezinos; e si ge lo non pudier firmar, jure con XII por toda bestia mayor, e por menor con IIII e elle el quinto. Todo ome que firiere bue o vaca o otro ganado ageno, peche quatro maravedis al duenno del ganado, si ge lo pudier firmar; si non, jure con quatro e elle el quinto.
Los alcaldes e el juiz, quando fueren en almofalla, lleven tres escusados, los que fueren en la almofalla.
Qui levar tienda redonda de veinte cuerdas, o dende arriba, como perteneçe, lieve quatro escusados cavalleros o ocho peones. E qui levar
loriga o lorigon con capiello o con almofar, lieve dos escusados cavalleros o quatro peones, cada uno. E qui levar yelmo con brefoneras, aya un escusado cavallero o dos peones. E estos escusados sean aldeanos; e si de la villa fueren, no les preste e no sean escusados.De fonsado e de açaria de diez cavalleros, una raçion a Santa Maria, e de menos media; e de peones eso mismo, e la otra a los [captivos]; e si menos fuere de fasta una raçion entrega, entre anbas las e[glesias]; [e] faganles egualeza fasta çinquenta cavalleros, e de çien cavalleros dos egualezas, e ayan estas dos egualezas esos dos adaliles que mandaren el fonsado o la açaria. E la egualeza tal sea: de çien cavalleros o ende arriba, senos bues o quatro maravedis; e de çinquenta cavalleros, un bue o quatro maravedis; e alcaldes e ataleeros tomen C cavallerias, o ende arriba senos bues o quatro maravedis (de) cada uno, e de çinquenta ayuso dos maravedis, e los ataleeros escojan antes e los otros sorteen. E lançada que pasar de parte en parte denlle IIII maravedis, e a otra dos maravedis. E a ferida de cabeça onde huesos exieren quatro maravedis. Qui mienbro perdiere, denle veinte maravedis. E a los lagados, denles bestias moriscas hasta el dia del quinon. Moro que por cativo yoguiere, den a su sennor len e medio, asi como dicho es. Cavallero o peon que cativare de açaria o de fonsado, denle el mejor moro o mora, o la mejor bestia mular o cavallar, qual se quisieren sus parientes o sus conpanneros de pan. E los de Coria o de su termino que se açertaren en ese fonsado [o] en esa açaria, de la su parte lo den esto. E si ellos no lo dieren, los alcaldes e los ataleeros, si fueren erguidores los ataleeros, e si non los erguidores e los alcaldes, metan cada uno senas bestias cada dia en mano de los querellosos. E quantas bestias no metieren, tantos maravedis pechen; e no las saquen por ferias ni por solturas fasta que lo den con seis maravedis. Cavallero o peon que a puerta de castiello o
entre dos hazes se diere con otro, quanto tomar del derrocado, todo ello reçiba el que se dio con el otro. E quien y lança azulada perdiere, denle dos maravedis, si lo pudier firmar que a manteniente firio con ella; e si otra lança fuere, denle un maravedi.Qui cavallero alcançar en seguda fuera de lide canpal, e lo derrocare, tome la mejor senal que troguiere, fuera del cuerpo del cavallo.
Qui su cavallo perdiere, porquel ello fiziere con un conpannero de pan, tal ge lo den. E los alcaldes lievenlo por la jura que fezieron, que valia le dan de su cavallo. E cavallo bivo apreçienlo como sano e denle su preçio quanto valiere, e metan el ferido en quinnon, e aquende Tajo, si no fuere por su plazer. E alcaldes e ataleeros a sesmos los pongan, e del sesmo onde oviere alcalde o jurado de la villa non meta y otro. E la quinta que en la villa fuer a dar, los alcaldes e los adaliles respondan por ella al juiz; e primero yergan e despues quinten, e no reçiban quinto sinon de aver morisco.
Todo ome de Coria e de su termino que cavalgar e portar, de la quinta en Coria, fueras aquel qui estodier en la atalaya, o en trebejo, o en el puerto, non de quinta; si hijos o muger oviere, alla de la quinta en sus castiellos.
Todo ome que en lid se açertare e antes que se torne del arrancada alguien aguijar o alguna cosa arrapare, pierda la raçion e mesenlle la barva. Qui aver de fonsado o de [açaria] o de apellido tomare, e a sus conpanneros no dier dello parte, pierda la raçion e mesenlle la [barva].
Qui rapare o furtare aver que fuere dado a partir, pierda la raçion e peche çien maravedis; e si no ovier donde los pechar, fagan del justiçia.
Todo ome que valia ovier de CCC maravedis, fueras sus vestidos del e de su muger, e no ovier cavallo, no tome portiello ni le responda nadi e responda el a todos. E si dixier: "no he la valia", jure con IIII. E si dixiere: "cavallo he", jure con IIII que lo ha sin arte. E qui mula ovier, dela por cavallo, e qui la quisier tener conpre cavallo. Todo cavallo que cotidianamientre fuere de albarda, no sea cavallo <a fuero>, e non sea su duenno escusado por cavallo. Todo ome que cavallo diere a otro por escusarse de apellido o de fonsado, cortenlle el rabo al cavallo, si de la villa fuere. E qui mula diere por escusarse, nol preste e peche.
A qui morier cavallo, sea escusado por un anno de cavallo, e respondanlle.
Qui troguier cabeça de adalid, denle X maravedis del conçejo.
Todo cavallero, o peon, ni primo junto, ni terçero que apellido oyere en la noche e en la mannana, e no fuer con la senna, peche la calona. E si lo odiere en la mannana, sea a la noche con la senna. E qui asi non lo hizier, peche dos maravedis el peon, e IIII el cavallero, al conçejo.
Qui dixier a otro cornudo, o fododinculo, o gafo, o judio, o traidor, e a la muger puta, o ençeguladera, o gafa, pechelle çinco maravedis. E si negare, jure con IIII vezinos; e si jurar no quisier, peche.
Qui dixier a otro: "mentira jureste", o "mentira firmaste", ho "mentirosa verdad dixieste", sinon aquel que deve retar, peche a el IIII maravedis, se ge lo pudier firmar, e fagalo verdadero. E meta cada dia bestia, fasta que lo faga verdadero. E quantas bestias no metier, tantos maravedis le peche; si no, jure con tres e elle el quarto.
Qui dixier al alcalde de hermandad: "mentira julgaste o tuerto", o "mentira firmaste", pechelle un maravedi, e meta cada dia bestia, fasta que lo haga verdadero. E si lo negar, jure con un vezino e el otro no de manquadra. E el alcalde de conçejo o jurado de la villa, eso mismo le faga.
Todo ome que barajar sobre acotamiento de alcalde, pechelle un maravedi; e por esto no enquote por bestia, mas pennore. Todo ome que pasare sennal de corral de viernes, peche una quarta; e por esto penore e enquote, e no se maten los pennos. E el alcalde no encote sino por fonsado o por apellido. E el acotamiento del fonsado e del apellido tal sea: el cavallero IIII maravedis, el peon II maravedis, al conçejo.
Todo ome que alcaldia tomare sin mandado del conçejo e por su ochavo, faganlle del cuerpo justiçia, e ixca por alevoso e derribenle las casas, si no fuer por su derechura. Eso mismo a los
alcaldes e juiz que fuer puesto por su ochavo e por su derechura, e se prende e tome sus derechuras; et non tome otro rabadan, e si otro rabadan metiere, no le den pennos.Los alcaldes no fagan amizad con otros omes de conçejo ne juramento. E qui la demandar o la fezier, sea perjuro e alevoso.
Correduras (d)e carreras por nuestros ochavos las fagamos.
Ningund ome que a vozero se lamare, non le viede el alcalde vozero. E si ge lo vedar, sea perjuro e no meta bestia.
Ninguna muger no responda sin su marido, sino por lo que sobredicho es.
E todas las calonnas del conçejo, pechenlas en oro o en dineros. Estas son las calonnas: mercado, tres maravedis; azogue, tres maravedis; corral de alcaldes, tres maravedis; boda, tres maravedis; treguas quebrantadas, quatro maravedis; bando sobre bando, L; exido de conçejo, tres maravedis.
Nengund ome o muger que querella ovier de clerigo, o clerigos de legos, ho mugier que demostrar plazo a clerigo, o clerigo a lego, e vozero oviere a dar, alli lo den a la collaçion donde fuere el clerigo exiente de la misa, e julguenlos elos alcaldes. E si alcaldes y non ovier, vengan anbos o estodieren los alcaldes; e si non vinieren, peche el uno al otro un maravedi. E otrosi la mugier.
Alcaldes por juizio non resçiban ningu<n>d preçio. Alcaldes, e bozero <e> mayordomo, si ayuntamiento hizieren o en uno comieren, sean perjuros. Alcaldes, e seis e mayordomos, si en falseria los fallaren, pierdan el portiello e salgan del portiello por alevosos. Et quantos asi fallados fueren, tantos ixcan. E si los otros no los echaren, ellos todos ixcan por alevosos e pierdan el portiello, asi como sobredicho es. E ansi de todo aportellado de conçejo que en falseria fuere fallado. De los alcaldes sienpre sean quatro a quatro o tres a tres. E fasta tres corrales sea feneçido su juizio, e si asi no lo fizieren, sean perjuros los alcaldes. E si el corral de los alcaldes esquisa fallaren, aquel que tovier tuerto, mandenlle que se parta de aquel a quin tien tuerto. E desto sea por todos los otros que juizio ovieren por la villa. E todos los omes que posiere el conçejo, e los alcaldes e los veinte y quatro, por guardar, asi de pelliteros, de ferradores como de taverneros, de quanto fuer a guardar e no lo endereçaren ixcan alevosos e pechen quatro maravedis al conçejo. Et los veinte y quatro vieden a todos los aportellados la enemiga que fezieren con el conçejo.
Et todo ome que por su barveza mandar alguna ren a otro, delos si non ge los soltar aquel a quin lo mando. E esto es dicho por los pedidos.
Nengunos pelliteros que las pennas de conejos o de corderos castraren, pechen senos maravedis a los barcos. E los çapateros que cantearen las suelas, eso mismo pechen.
Todo ome que aver diere a onzenas e non le dieren pennos, no le respondan. Et qui jogar dados de noche, peche un maravedi a los alcaldes. E en la casa o lo jogaren, pechen dos maravedis a los alcaldes. E si lo negare, jure con dos e elle el terçero.
Todos los omes que aparçeria ovieren en molinos, o en açennas, en las aldeas, fagan su cabildo a Santa Ines.
E los alcaldes, dese dia que entraren fasta un anno, julguen, e no julguen mas. E si mas julgaren, su juizio non valga. E los alcaldes, elo que julgaren, eso atorguen. E julguen derecho e otorguen derecho, e de lo que apreçiaren reçiban el diezmo e tomen su coto por corral, o de su acotamiento, o de veladores que van a Santa Maria o a la defesa, como fuero es. E los alcaldes de conçejo, e el juiz e los alcaldes de hermandade, sean por ochavos e por sus derechuras; el juiz eso mismo.
Todas las calonas, por buena pesquisa [e] derecha, la escojan. E delante sea aquel a [quin] diere las pesquisas; den de vezinos al vezino, el al morador de vezinos o de moradores. E estas pesquisas sean tres e no menos. E con esas pesquisas coja el querelloso su calonna. E qui primero feriere, ese peche las calonnas damos. E qui sobre su cabeça tornar, no peche calonna, si non fizier livores; si livores fezier, peche media calonna. Todas las calonnas que por los alcaldes, ho por los bozeros o por mayordomo se perdieren, ellos lo pechen.
Quin over a firmar, ante alcalde firme quel juizio julgo; si non firmar, caya e non le faga manna ante ese alcalde. Mas ell alcalde digalles el juizio como ge lo julgo. E si ge lo non quisier dezir, sea perjuro e peche la petiçion. E las firmas juren que nin por
amor, ni por promision, ni por envidia, ni por malquerençia, que non diga sinon verdade daquello que sabe. E las firmas, cada unas, diganlo por viervo, asi como lo tienen julgado. E si dixiere el que demanda: "non cunplio tu firma", y lo diga en que non cunplio. E si dixier el alcalde: "cunple esto", e non quisier conprir, por y caya. E estuençe diga el alcalde que es caido, e si non lo dixiere, sea perjuro e peche la petiçion. E si en la villa non fuere, esperelo fasta que venga, o vaya demandallo e diga aquella querella que del a. Qui non quisier esperar o demandallo, por y caya. E si non fuer en la villa el alcalde, saquen fiel e vayan ante otro alcalde. E qui non quisier sacar fiel o ir ante otro alcalde, por y caya. E el alcalde, ante que conosca el juizio, ese lo delivre asi como si elle mismo lo julgase; e si non lo quisiere delibrar ese, peche la petiçion. E qui mannana fiziere en las conoçençias, este alcalde lo pregunte. E qui negare el juizio, ese meta pennos de maravedi al alcalde. E nengund ome que dexiere: "despues feziste convenençia comigo", ho "al feziste comigo", non le vala. Por aver o por firma que a uno a otro a fazer, si non fuer fecha ante alcalde, non vala. Esto es porque dezian muchos omes: "despues feziste al comigo". E aver julgado ante alcalde, denlo. E nengun ome que aver ovier a dar a otro, delo ante tres testigos ho ante un alcalde. E si despues lo negare que non ge lo dio, fagan del justiçia.Todo ome que fuere con mestrulgo a rey, ho levare portero a casa de vezino de Coria, peche çien maravedis al conçejo e salga por alevoso.
El corredor de la ropa non tome mas de dos dineros del maravedi, e de XVIII dineros uno.
Nengun ome non prende en domingo ni en sabado. E quin ovier
a meter bestia, por juizio que non tome de corral, metala al domingo en la noche.Omes que juizio ovieren, fagan tres vezinos alcaldes e convenidores, e julguen su juizio, e vala su juizio tanto como de un alcalde jurado. E si mandaren bestia meter, metala. E si no la metiere, tomele pennos de maravedi. E si la mandare soltar e non la soltar e alla trasnochar, dela doblada. E firmen tanto como I alcalde jurado. E el alcalde jurado de conçejo julgue e firme uno por valia de V maravedis, e IIII por XX maravedis, ho ende arriba.
Todo ome a qui aver mueble demandaren e dixiere: "tuerto me demandas", jure el otro que demanda que suyo fue, e non lo vendio, ni lo dio a nenguno, e respondal el que lo toviere. E si dixiere: "dare otor", delo a IX dias. E el otro jure que por esto lo otorga, que lo vendio, ho lo dio, ho que lo dio, ho que fue fiador dello, si lo preguntaren. E si asi lo non fiziere, por y caya. E de fiador que aya la valia de la petiçion doblada. E si otorgare en la mannana, meta bestia en la noche. E si otorgare en la noche, metala otro dia. E si esto non conpriere el que da el otor, por y caya. E alli o dier el otor, y de el fiador que faga quanto mandaren elos alcaldes, si ge lo demandaren; si non, por y caya. E si vençido fuere aquel que da el otor, e non ovier onde pechar el otor, el fiador lo peche doblo e cabdal. Et qui se lamar a otor, e non conprier, dobrelo al querelloso. E si dixier: "non puedo [aver] qui me lo dio", jure que el lo conpro ho ge lo [dieron], e non lo puede aver, e delo <a> aquel que lo demanda. E el que demanda, de fiador que lo tenga manifiesto fasta medio anno.
Alcaldes e seis enforquen ladrones e vieden forçias e viltos.
Qualquier ome que su voz rezonar, meta la verdad, que verdad demanda o anpara. Quin voz agena rezonar, meta la verdad que quanto pudo pesquerir que verdad demanda ho anpara.
Qualquier clerigo que raçion ovier en la iglesia de la villa, sus omes e sus parientes que con el moraren sin soldada, ayan fuero de vezinos de villa.
Qualquier clerigo que raçion ovier en villa, e querella ovier de aldeano, parelle fiel con un clerigo e con un lego. E el que non venier, peche I maravedi e a fuero de Coria. E el que raçion ovier en iglesia de aldea, sus omes e sus parientes que con el moraren, ayan fuero de aldeanos.
Todo ladron que preso fuere por furto, e los seis e los alcaldes fallaren alguna pesquisa sobrel, non le den de mano. E qui lo enbiare, adugalo. E si no lo aduxiere el, metan y su cuerpo.
Todas las aguas de las goteras, e de los corrales e de las calles, por o mandaren los alcaldes e los omes bonos, por y vayan derechas.
Los segadores sieguen a diezmo e reçiban por suerte.
Los tresquiladores reçiban por suerte de XL velloçinos, de mayores, I; e de corderos de veinte.
Todo ome que con su iugo de bues arar, mager se faga iuguero, sea postero. E el mediero que con su mano arare, peche media puesta e no vaya en fosado nin en apellido.
Qualquier ome que morar con otro, e lavrar de todo en todo en heredad de su sennor, sea salariego. E si en otra heredad lavrar, peche asi como aldeano.
Toda calonna que ome ovier a pechar doblada, dela con IIII maravedis. Por toda firma, firmen III e non menos.
Todo judio que pescado conprar en viernes, peche I maravedi a los alcaldes. E si christianos lo conpraren pora judios, pechen un maravedi a los alcaldes; si non, jure con un vezino.
Nengun judio non tenga su voz ni agena. Si la tovier, peche I maravedi, medio al que tien con elle la voz e el medio a los alcaldes.
Quin colmenero quisier sacar, de XL colmenas arriba saque, e el colmenero que las guardare cutianamiente.
Qui pennos echar a alquile e los enguerar, non le den alquile. E si por pan, ho por vino, ho por carne, ho por pescado, ho enprestados, no los sacare, enguere los enpennos e prende por su aver o por otra cosa.
Todo aver manifiesto delante alcaldes, delo a IX dias.
Nengun ome que demandar aver, ho heredade, ho qual cosa se quier, de ese <es> la firma. E si pesquisa dier el otro que mentira firmo, non le preste e salgan por alevosos los que firmaren, e fagan dellos justiçia los alcaldes; e si lo non fizieren, sean perjuros.
Todo ome que ovier aduzir a otro a plazo, adugalo de las aldeas a terçer dia, e de Tajo a IX dias. E de Alva, e de Salamanca, e de Ledesma e de Çibdad fasta en Duero, adugalo a XV dias. E de allende Duero a tres semanas. Et del reino del rey de Castilla, desde Duero fasta Adaja, a XV dias. E si dixier: "es en arrafalla o en cavalleria", jurelo e adugalle a la descanbia; e se non,
responda. Et si dixier que pastor es, jure que es pastor, e esperelo a las exidas e delo a derecho. E de fonsado e de açaria connonbre all adalil e jure que alla es, a la venida del adalil, adugalo a derecho; e se non, responda. De Gerusalen fasta un anno. De Roma fasta seis meses. E de San Gil fasta tres meses. E de cativo fasta medio anno. De San Çalvador fasta tres selmanas. De Santiago fasta un mes. De Santo Domingo hasta tres selmanas. E por todo esto jure con un vezino c'alla es o diz. E por esto no se modro. Todo ome que torna fiziere de tierra de moros o de christianos, el contendor las bestias yaziendo adugalo. E <si> dixiere: "ido es a venado o a monte", jurelo que no sabe su posada e cononbre conpannero con qui fue, e <a la> venida de sus conpanneros adugalo.Todo ome que entrare en plazo e enfermare, venga qui los pennos quisier sacar e jure que enfermo iaz sin arte; e quando sanar, responda.
Qui fuere mandado de conçejo, a dos cavalleros que fueren fasta en Çibdad, e fasta en Granada, e fasta Plazençia, un maravedi. Et qui fuere fasta Talavera, e fasta Casçeres, e fasta Alcantara, a un cavallero un maravedi. E fasta Salamanca, e a Ledesma, a un cavallero un maravedi. E dende adelante, a un cavallero dos maravedis. E a Idanna a dos cavalleros un maravedi. E ende adelante a un cavallero dos maravedis.
Por furto o por condesijo, por quatro maravedis o ende arriba, lide.
Qui ovier a jurar, por un maravedi jure con un vezino, e por dos maravedis con dos, e por tres maravedis o ende arriba jure con quatro e elle el quinto.
Todo ome que firmare por diez maravedis ho ende arriba, recuda a repto.
Nengun ome a qui demandaren furto e negare, e despues fuere vençido por ello, delo doblado <con> IIII maravedis al demandador.
Qualquier ome que pennos anparare en villa ho en aldea, los VI del conçejo prenden por dos maravedis, el uno para los barcos e el otro para el querelloso. E si a los VI anpararen pennos, VI vozeros lo digan a los que y fueren, e ayudenlos. E qui non los quisier ayudar, peche cada uno dellos senos maravedis para los barcos, ho jure cada uno con un vezino que non les dieron aiuda de nos. E esto es dicho si revelaren pennos a los andadores. E qui revelar penos a los VI, peche quatro maravedis, elos tres a los barcos e el uno al querelloso; si no, salvese con quatro e elle el quinto.
Todas las calonnas que son dichas pora los querellosos, ayanlas.
E todas las otras sean poral conçejo e para los barcos. E los VI e los alcaldes del conçejo manden acotar por ellas, e lo rezonen, e denlas al mayordomo de conçejo.Estas son las ferias de agosto: desdel dia de Çinquasima fasta Santa Maria de mediado de agosto, no respondan por ninguna cosa, sinon por muerte de ome, ho por mugier forçiada, ho por furto, o por forçia, ho por virto, si fuer hecho en las ferias. E si non fuere fecho en las ferias, non respondan. Et si dixier el que anpara: "no lo fiz en ferias ni ante", el querelloso de la verdad que lo fizo en ferias, e respondanle. E respondan por bue e por vaca domados, e por carro, por quanto perteneçe a era, e por pan de panadera, e por vino de tavernera, e por vino de cuba, e por carne de carniçero. Cavallo de siella e mula de siella, ni escudo, ni lança, nin espada, ni todas armas, non ayan ferias.
Todo ome que pan llevar a tierra de moros, ho miel, ho queso, ho manteca, ho armas, ho cavallo, qui lo fallar tomelle quanto truxier sin calonna, e aduga el cuerpo a los alcaldes, e fagan delle justiçia, e pierda quanto ovier. E los alcaldes tomen el quarto, e las tres partes metan en el castiello. E si dixier: "no lo pu(e)de prender", salvese con IIII vezinos.
Todo ome que cuchiello troguier en la villa o en l'arravalde, e los alcaldes lo fallaren con el, peche dos maravedis. Et en la casa do posaren omes, diga el huespede a los que con el posaren que dexen el cuchiello en la posada. E si non lo dixier, peche dos maravedis. E si el otro non lo quisier dexar, diganlo a los alcaldes, e el que lo troguier, peche dos maravedis. E el que lo troguier en escondido, peche la calona doblada. E todo ome que fuera de la villa quisier ir, lievelo en su mano, e salida de la villa metalo en la çinta. E estas calonnas tome<n> las elos alcaldes.
Todo ome que de noche andar por la villa, desque la canpana lexaren de tanner, e non dixier onde vien, ho onde va, o lo non provar por buenos omes que es de buena fama, faganle como a ladron.
Todo ome que pescado matar, elle lo venda o su muger o sus fijos.
Recaton que pescado conprare para recatonar, peche dos maravedis a los alcaldes. E qui lo vendier, peche dos maravedis; si non, salvese con dos e elle el terçero. Et los alcaldes, si esto no costrengieren, sean menos valientes. E nenguno non sea osado de vender en su casa peçes, ni carne, ni pan, ni otra cosa, sinon vino; mas en mercado vendan lo que quisieren vender, assi como manda nuestro sennor el rey, fasta sol puesto. E qui al fiziere, peche un maravedi a los alcaldes.
Nengun omne ponga barco en el rio en logar do estodier el barco del conçejo, sinon si quisier pasar omes del conçejo. E quien y otro barco pusier, pierda el barco e peche dos maravedis a los alcaldes. E los frailes del Perero e los fraires del Ospital, pongan sus barcos en el puerto, e pasen sus omes e los omes del conçejo que pasar quisieren.
Estas son las ferias de quaresma: respondan por dineros de labrador, o por açada, e por açadon, e por podadera, e por danno de toda lavor; respondan por prado, e por vinna, e por miese e por quanto perteneçe al lavor; e por molino e por açenna respondan.
Et estas ferias tal fuero ayan como las ferias de agosto. Soldada de collaço non aya ferias, ni menoscabos que fezier el collaço al sennor non se pare tras ferias; nin ganado de leche non aya ferias; diezmo, ni premiçias, ni mortuoru<m>, non ayan ferias.Todo ome que aver ovier a dar a otri, e las ferias entraren, pidagelo con tres testigos. E del dia que lo pidier, degelo a IX dias; e si no lo dier, ferias exidas degelo doblado.
Todos omes que carrera quisieren sacar, si se avenieren entre si, saquen su carrera, e ayan coto como si la sacasen los alcaldes. E si se non avinieren, vengan al cabildo de los alcaldes, e denles el cabildo quatro alcaldes que la saquen, e denles dos maravedis. Et pues que fuer sacada, qui la çerrare ho la arare peche quatro maravedis a los alcaldes. Et la carrera que asi no fuer sacada, no aya coto.
Todo ome que con su ganado, ho con sus bestias, ho con su cuerpo, quebrantar valladar ageno, ho linde agena, peche dos maravedis al sennor del valladar ho de la linde, e faga el valladar, ho jure con dos e elle el terçero, si el que demanda no pudier firmar.
Todo ome que ferier a alcalde, peche su calonna dobrada. E eso mismo, si elle ferier a otro.
Todo ome que a otro pedier salva fe ante alcaldes e el otro non ge la quiser dar, peche quatro maravedis por quantas noches trasnochar, e los alcaldes tomen la meatad <e> el querelloso la otra meatad,
e de salva fe por si e por su aver. E si la non quisier dar, metanlo los alcaldes en el çepo; e si non, sean perjuros. E si non dier salva fee, prendalo el querelloso sin calonna. Et si dixier: "no so osado por prendello, ayudadme", e non lo quisieren ayudar, peche cada uno dellos senos maravedis, o jure con un vezino. Et si dier sobre quin sea fasta dia çierto que de salva fe, e no lo quisieren lexar, fieralo o matelo sin calonna. E qui dier salva fe, dela por si e por sus parientes que fueren en termino de Coria, e de quatro onbres que ayan valia de la petiçion, ho seis. Todo ome que dixier a otro: "dame salva fe", de su verdad que la non demando sino por miedo que ha del ho de su aver, e si asi non lo fezier non le de salva fe; e si dier la verdad, delle la salva fe.Los alcaldes non julguen en diomingo, nin en sabado, nin en otros dias despues de biesperas ni antes de misa. E si julgaren, su juizio non vala e sean perjuros, si non fuere por raigar.
Qui viere puercos en la dehesa, tome por cada uno una quarta de maravedi, e la media pora si e la media pora la puente; e esto en todo tienpo. Et qui ganado y metier a sabiendas, peche un maravedi. E si dixier: "no lo meti a sabiendas", jure que <no> lo metio a sabiendas, e pechel una quinta de maravedi. E quando la derronpiere el conçejo, no entre y otro ganado, seno cavallo e mulo e mula.
Todo ome que aparçeria fezier por mantener cabanna, tengala fasta un anno, si non le veniere cativaçion o enemizad. E el que assi no lo fiziere, peche seis maravedis a sus aparçeros, e torne y el ganado metiendo bestia a terçer dia; e estas no ayan ferias ni solturas.
Todo ome que echare su ganado en cabanna agena sin grado de su
duenno, pierdalo e non le responda por el. E el ganado de los aportellados, qui lo anafagare e qui lo salgare, ese tome la leche.Nengund ome que fuere a ovejas agenas, e tomar carneros, ho ovejas, ho puercos, o otra res, dela doblada con IIII maravedis al duenno del ganado, ho jure con IIII e elle el Vo.
Todo ome que fallar moro o mora de otras partidas o en la villa o en el termino, si lle duenno non salir, ayanlo. E si sennor le salir, e el moro fallado fuer desde la sierra aca, de dos maravedis en fallalgo. Todo ome que fallar su cavallo de siella, que aya perdido en açaria o en otro lugar qualquier, delle un maravedi e ayalo. Qual ome quier que fallar asno, o vaca ho bue foras de los terminos, denlle en fallalgo quarta de maravedi. E de çinquenta ovejas tome tres, e de çinquenta puercos tres, e dende arriba a su quenta e dende ayuso a su quenta.
Todos los aldeanos que labraren con bues, den senas ochavas de çevada a los yunteros, e el mediero media. E el anno que no senbraren no den nada a los yunteros.
Todo ome que dexier: "este es mi preso por mi aver", e otro ovier delle querella por su aver, si troxier fierro en mano o en pies e ome de su serviçio e de su pan (e) andodier con el, sea su preso. E si asi non fuer, non sea su preso. E esto que lo vean dos alcaldes ho tres omes buenos, que al primero dara su aver. E dende arriba venga el que primero lo preso, e de a todos sus debdores a su quenta. El que primero lo toviere, responda con el al otro, e el otro eso mismo faga. E responda e jure con tres vezinos, ho firme que esa querella a del que demanda, e respondal el preso. E si vençiere el preso, vaya en paz; e si non, vaya preso fasta que de su aver al contendor.
Los vozeros del conçejo, lo que por ellos se perdiere, ellos lo pechen.
Todos los labradores del castillo, fasta San Martin fagan su lavor, si cal ovieren a farto. E lo que remaneçiere, faganlo doblado.
Todo ome que sacar armas a buelta, peche IIII maravedis a los alcaldes, si ge lo firmaren; si non, salvese con IIII e elle el Vo.
Todo ome que fuera de la villa exier con armas contra otro, peche X maravedis. Si los alcaldes lo perdonaren, sean perjuros, si firmas podieren aver. E si non, jure con IIII e elle el Vo.
Por muerte de ome, o muger forçiada, metan dos bestias antes de misa matinal e sea ençerrado. E esto sea en dia de viernes, al corral. E si lo testiguaren fuera con III vezinos o con dos alcaldes, peche X maravedis.
Qui pediere lide a otro, peche quatro maravedis, si ge lo firmaren; si no, jure con IIII e elle el Vo. E qui primero pediere, peche los IIII maravedis por el otro a los alcaldes. E el que provare que sobre si torno, non peche.
Por toda demanda conosca o niegue. E si non quisier conoçer o negar, meta bestia. E cada terçer dia meta bestia, fasta que conosca o niegue.
La biuda, por bestia ho por peno de maravedi, pare fiel. E por otra cosa, biuda non vaya a fiel, si non fuer por raigar.
Todo ome por que prendaren de qual parte quier, vaya e saque la prenda.
Los vozeros acoten e metan las bestias en casa del querelloso fasta que saque la prenda.
Los mayordomos del conçejo, del dia que salieren fasta terçer dia, den el aver que tovieren a los otros mayordomos; si no, denlo doblado.
Todo ome que sin mandado de conçejo prendar, ho de los seis, e juizio non quisier hazer, e por el prendaren las bestias yaziendo, saque la prenda.
Los yunteros tengan las yuntas de las alcaldias de las hermandades
e tomen su çevada, e sus viudas, e sus treguas; e si mas tomaren, sean perjurados e ixcan del portiello. E non tomen ningun preçio. E todas treguas son quatro maravedis. E si a los VI viniere pesquisa, que por otro juizio aver tomaron, sean perjuros e ixcan del portiello e pechen XX maravedis al castiello.Todos los querellosos de la villa e de las aldeas, que querella ovieren de omes de fuera de villa, vayan a los VI e a los junteros, e mandenles prendar por su entrega. E de los junteros sienpre sean quatro alcaldes a los juizios julgar de fuera de la villa. E ellos fagan las idas al rey. E quanto por ellos se perdiere o dapnare, ellos lo pechen.
Los alcaçeres de las fronteras, si no fueren çerrados a fuero como los [ortos], no ayan calonas.
Todo ome que vinier a esta villa, e prendaren por hermandad, por aquel qui prendaren e por elle prenda llevaren, fasta IX dias la saque. E si la non sacare, cada terçer dia meta bestia, fasta que la saque; e non aya ferias ni solturas.
Alcaldes o bozeros que a buelta o a baraja sobrevinieren, e vieren ferir o mesar, o lo vier alcalde o bozero, firme fasta çinco maravedis, e peche el que feriere ho el que mesar. E dos alcaldes fasta X maravedis firmen, e li<e>venlo por la jura que fizieron al conçejo. E dende arriba, quatro alcaldes firmen.
Nengu<n>d ome de Coria ni de su termino non de a comer a nengun ome, si no fuere por su amor.
Toda aldea en que forçia fizieren a alcaldes o a bozeros, e apellido dieren a otros alcaldes, e non les quisieren ayudar, pechen C maravedis a los alcaldes que reçibieron forçia. E si algunos o algu<n>d ome forçia fizier en aldea do posare elle ho su criazon, e apellido dieren, e sus vezinos, ho de las otras aldeas que lo supieren, non les ayudaren, pechen C maravedis, los medios al aldea e los otros medios a los alcaldes e a los VI.
Todos nuestros sesmos a sesmos pechemos.
Los alcaldes no se paren tras l'alcaldia que non repondan, ni vozeros, mas respondan.
Todo ome que valia ovier de çien maravedis, e non fuer escripto en carta o en padron, no sea vezino a fuero, ni tome portiello, e no firme sobre otro. E cada dia del domingo, peche un maravedi fasta que sea en carta o en padron e sea postero.
Todo ome de aldea o de villa que forçia fizier a alcaldes o a boze-
ros, ellos andando en proveche de conçejo o de rey, pecho a ellos C maravedis.Qui can ovier en villa ho en aldea, e y ovier vinnas, e a las vinnas fuer el can, e el duenno de la vinna lo viere dentro e lo presiere, peche el duenno del can V sueldos; si non, metalo en mano del duenno de la vinna. E si dixier el duenno del can: "no entro mi can en tu vinna", [jure el duenno de la vinna que en su vinna] lo priso, e peche la calonna; e si non, meta el can en mano del querelloso. E si el can no troxier garavato de V palmos en alto e uno en corvo, peche el duenno del can colodra de vino. Si lo testiguaren dos omes sin garavato, al fuero.
Qui matare galgo, o caravo, o can rastrero, por galgo peche dos maravedis a su duenno, e por caravo un maravedi a su duenno, e por rastrero un maravedi a su duenno; e por podenco o alano dos maravedis a su duenno, si a tuerto los matare. E si a galgo quebrantare pierna, al tanto como si lo matase; si non, jure con un vezino, e si non, peche.
Todo ome que se lamar a bozero, de vozero otro dia salida de misa matinal, a la colaçion o mandare el alcalde. E si el alcalde le vedare vozero, sea perjuro.
Primo junto nin poblador, no peche fasta un anno, nin vaya en fonsado nin en apellido.
Todo ome que muger [morier] quinze dias antes del fonsado, si fijo o fija non ovier de hedad, non vaya en fonsado. E si tovier su muger lechigada, non vaya en fonsado fasta que sane o muera.
Todo ome que sobrino hoviere en su casa sin soldada, de medio anno arriba, c'aya XX annos, vaya en fonsado e prestel; e si non fuer, nol preste.
Todo ome que de fuero se sacare, no lo meta y Dios.
Todo ome aportellado que voz tovier de ladrones, pierda el portiello e peche X maravedis a la puente.
Todos los carniçeros, pescadores o otros merchanes, como a ellos respondieren en ferias, asi fagan ellos a los otros.
Todo christiano que aver dier a renuevo, sea escomungado. El alcalde que lo juzgar a dar, sea perjuro e nol preste. E si ge lo pudieren testiguar con tres omes bonos que lo julgo a dar, salga el alcalde del portiello por alevoso.
Todo ome que su muger de beniçion o de juras dexar, o ella a el, vaya el obispo o el que tovier sus vezes, e el obispo mande a los alcaldes que apierten que tornen el marido a la muger o la muger al marido. E si los alcaldes no acotaren ho no apertaren fasta que se ayunten en uno, e si ansi no fizieren, elos alcaldes sean perjuros e pechen X maravedis al obispo o al que tovier sus vezes. E el pariente que la anparar, peche diez maravedis al marido, cada dia que trasnochar en casa del pariente.
Todo ome que maravedis dier por pan, no le den mas de quanto dieren en agosto. Esto es dicho por los que dan dineros por pan a <re>nuevo.
Todos los omes que maravedis dieren por sayales, vayan al mercado, e quanto y dieren a maravedi, tanto de el a su debdor.
Todo ome que maravedis diere por mosto antes de San Miguel, quanto diere<n> XX dias despues de San Miguel a maravedi, tanto de el a su debdor.
Todo home que vinas, o açennas o casas enpennar, no den a el otra cosa por labrar las vinnas, ni por açennas ni por casas fasta que las saque. E qui las tovier, las labre asi como les perteneçe a cada uno. E si asi non lo fezier, de el aver que ovier a dar a su duenno e labre su herençia.
Todo ome que se lamar a firmas e non cononbrar, por y caya. E no cononbre mas de un pariente. E los parientes sean estos: padre, o hermano, o primo, o segundo, o terçero o quarto. E no meta mas de un pariente en firma.
Todos los parientes que enemigo [segudaren, segudenlo] los parientes de anbas las partes, segundos, e terçeros e quartos. E si non fueren en la tierra los parientes de la una parte, [segudenlo] los otros parientes. E si omezilio cogiere, [tome] el padre o la madre la meatad e los otros parientes la otra meatad. E si no ovier padre o madre, sus herederos tomen la meatad. E si no ovier herederos o herederas, los primeros tomen la meatad, e segundos e terçeros e quartos la otra meatad. E qui non venier a desafiar, ho a segudar, o al corral, sano seyendo en la tierra, no tome del omizilio parte.
Todo judio que aver diere <a> alquile, de el maravedi a la selmana por una ochava de maravedi, e el sueldo por un dinero. Todo juizio que ovieren judios o christianos, e firmaren dos christianos e no firmare el judio que con los christianos fuere en firma, el judio peche la petiçion doblada, e de luego y sobre qui sea fasta que de el aver. Eso mismo sea se un christiano e el judio firmare<n>, e el otro christiano no quisier firmar, peche la petiçion doblada.
Todo judio que pennos tomar sin testigos, peche un maravedi a los alcaldes por de hurto. E nenguno non tome aver de hijo
enparentado; si no, qui lo tomar, peche X maravedis a los alcaldes e a los seis.Todo ome que su aver conoçier a judio, firmelo el judio con dos judios e un christiano, e con dos christianos e un judio, que lo conpro e con sol, e de otor. E si non pudier firmar, jure el christiano que suyo es, e non lo vendio ni lo dono, ni lo mando enpenar, e tome el aver que demanda. Todo judio de otor por aver que lle conoçieren.
Todos omes que ovieren a firmar con conçejo, firme<n> con çinco hijos de posteros que ayan XV annos, ansi como es fuero.
Todo ome que fiare a otro, si pudier aver al que fio e meterlo en medio, no responda.
Todo ome que por fiadura pechar, aquel por qui la pechar doblegela.
Todos los que sacaren las ochavas, meta<n> en el mercado tres ochavas, e dos arrovas e dos medias, e non anden y estrajeras. E si andaren y, fostiguenlas los alcaldes; e si no, sean perjuros. E quantas ochavas, ho quantas arrovas, ho quantas medias hallaren, destas que de suso son dichas, tantos maravedis peche a los alcaldes por las ochavas, e medios por las medias.
Los lidiadores que ovieren a lidiar por juizio de alcaldes, eguenlos los alcaldes, e del dia que los iguaren a terçer dia, vayan a Santa Maria a la misa matinal, e armenlos dos alcaldes, quales ellos quisieren, <e> en su mano lidien. E pues que fueren armados, jure qui anpara que derecho anpara, e jure el otro que mentira juro. E qui anpara, de fiador, e si cayere, peche la petiçion doblada al querelloso, e las armas, si se dannaren. E tal fiador de que vean los alcaldes que ha valia de la petiçion doblada. E despues que juraren, no se manifiesten. E el que en la iglesia entrar, peche un maravedi a los alcaldes. E los que y fueren, saquenlos fuera ellos e los que los armaron. E si non quisieren salir, tomen de cada uno senos maravedis e saquenlos fuera. E si lo asi no fezieren, los alcaldes sean perjuros. Qui los cotos pasar que posieren elos alcaldes, lievenlo por la jura que pusieron al conçejo, e peche cada uno dellos seis maravedis, si non fuere viatrero. Et lidiador, de los cotos no ixca ni tome otras armas, sinon las suyas o de su conpanero con quien lidiar, ni piedra, ni tierra, e non tome vestido de ningu<n>d ome ni pan, ni corte lança que tovier en su poder, ni taje riendas ni cabeçada, ni mate cavallo de su conpannero. E si lo matare o tajare riendas o cabeçada, jure que lo non mato nin tajo riendas de su grado, e tome a otro como mandaren los alcaldes; e cada un cavallo sea apreçiado en treinta maravedis. E tales fiadores den que vean los alcaldes que ha<n> la valia de los cavallos e de las armas. Lidiador que cavallo matar, pechelo; e armas, si se dannaren, el que cayere se las peche. E por armas e por cavallo no metan omes en manos, mas los fiadores lo pechen la apreçiadura. E si el retado dev[en]ier de pie, espere al otro en canpo que vean los alcaldes que puede ayudar a otro de todas partes, e si anpararse podier fasta terçer dia de sol a sol. El que devenier de pie, espere al otro en canpo, e el reptado conquiera al otro tres vezes en el dia, e fieralo con las armas que toviere tres vezes en el dia a manteniente,en el yelmo, o en la loriga, o en el escudo, o en las armas que toviere, ho en el cuerpo, fueras en la lança. E si el reptado escapare cavallero, conquiera al peon tres vezes en el dia, asi como dicho es. E esto faziendo, si fasta terçero dia perseverare podiere, venga a su juizio. E nen-
guno non tome al otro a la pixa ni a los cojones. Lidiadores non pasen los mojones. Lidiador que esto todo non cunpliere, como en esta carta yaz escripto, por y caya. Lidiadores, pues que fueren armados en la eglesia, si confecharen, den III maravedis a los que los armaren. E si al canpo exieren, quantos dias alla fueren, tantos maravedis de el que cayere. E si se confecharen, anbos pechen estos maravedis. Lidiador que corriere antes que venga a su casa, peche çinco maravedis. E qui ca<n>tar con elle ho qui vener con elle comer, peche çinco maravedis a la puente. Los lidiadores en uno yagan en manos de los alcaldes, e en uno coman con ellos aquellos que los armaren, e si se non fecharen non se desarmen. E pues que sol puesto fuer, aduganlos a la villa, e ese dia saquenlos al canpo antes de medio dia. E si los alcaldes esto non fizieren, sean perjuros. Portellados de conçejo, non ayan el canpo vedado, o lidiaren. E <qui> vozes e silvos diere al lidiador que cayr, peche çinco maravedis, si ge lo firmaren. Et qui dixier al lidiador palabra [que en] forçiamiento le sea, peche çinco maravedis.Todo ome que eguaia ovier a dar, fasta tres nueve dias la de. E si en estos tres nueve dias non dier eguaia, el otro jure solo e arranque su juizio. E en las eguaias, el que sacaren por peor, si la pediere a otro, eguenlo con el. E a vezino den eguaia de vezinos, e a morador de moradores. E qui oviere a firmar, ho a jurar o testiguar, a vezinos testigue con vezinos e a morador con moradores.
Toda firma que firmare, eso firme onde fue hecho el testigo, e cosa que fue mercada o dada antel. E qui [a dar] a morador guaia oviere, ho firmare, si vezinos levare, non caya por eso. E en estas eguaias non entre soldadero de sennor de tierra, ni ome que prueva aya fecha que vençiese. E qui tal eguaia non dier, por y caya.
L'alcaldia, como tovier los presos con el çepo, asi los den a los otros alcaldes que entraren.
Todos carniçeros que conpraren carneros, ho vacas, o otro ganado para vender, non se pare tras ferias.
Todo aver que ovieren a dar por bestia de alquile, non aya ferias.
Todo ome que mentira jurare ho firmare, e sobrel fallaren los alcaldes e los jurados pesquisa, tresquilenlo fasta la meatad, e salga por alevoso de conçejo, e non aya mas portiello ni firme.
Todo aportellado de conçejo que en pro de conçejo fuere, sobre aquel a qui fuer demandar, sobrel coma. E si al conçejo demandar que coma, si aquel fallare, o en otro mandado fuere, peche seis maravedis e siervanlo el conçejo de la aldea o posare. A un alcalde una gallina, a dos dos gallinas, ho entre dos un cabrito; e a mas a su quenta, e a menos eso mismo, e pan e vino quanto abondar. E si ge lo non diere, prende el alcalde en casa del jurado de la aldea, e eche los pennos por la yantar doblada. E si los pennos anpararen al alcalde, peche un maravedi e la yantar doblado. E por esto dezir verdad el alcalde, por la jura que fizo a conçejo, que sin escatima la demanda, e peche. E a sus cavallos, a dos una ochava de çevada, e a bestia mayor mular una terçia. Estos son aportellados de conçejo, a qui deven servir alcaldes, e vozeros, e mayordomo e escrivano.
El andador, quando fuere en mandado del conçejo, en la aldea, do fuere, denle tres dineros en conducho, e medio quarto de vino, e pan quanto le cunpliere.
Todo ome que por enemizad venier de otra villa a esta, e ome de la villa dixier: "mi enemigo es", firmegelo aquel que demanda con tres vezinos que antes vino a Coria que el, e non tomaron sus parientes omizilio nin derecho, e estelle el a derecho. E si non le quisier dar derecho, vazie la villa e el termino fasta terçer dia; si no, matelo sin calonna. E si el que demanda non quisier reçebir su derecho, apertenlo los alcaldes, e meta cada terçer dia bestias, e no coma ni beva fasta que la suelte e reçiba su derecho. E quantas bestias non metier, tantos maravedis peche. A los alcaldes, si lo soltaren, cayales en perjuro. Por toda demandançia, si ome non pudier aver derecho en una alcaldia o en otra alcaldia, pare fiel de cabo, ho prende, ho desafie. E si asi non fezier, non le responda el otro.
Todos recueros que en reca fueren a tierra de moros o christianos, e por Coria o por su termino pasaren, den el portalgo en Coria.
Los porteros tomen el portalgo, e den el terçio a las posadas de los vezinos. E si en ese dia non ge lo dieren, tomen pennos por el doblo e por el cabdal.
Todas aldeas de Coria a la tierra onde ovieren treguas, e por y traxieren ganado ho robadura, ellos lo tomen; e si non, ellos lo
pechen. E las aldeas raiguense; e se non se raigaren, si tregua quebrantaren, ellos lo pechen. E en aquella villa los jurados los raiguen, e si no los raigaren, sealles en perjuro.Qui fiel parare a aldeano, ese aldeano le pida la verdade, e de verdad que querella ha del, e diga su querella. E si verdade non dier, non venga a fiel. E si prendare, torne los pennos doblados. E si verdad dier, e al fiel non venier, peche I maravedi, si ge lo firmaren con un vezino que fiel le paro.
Toda lavor de aldeano tal fuero aya de pechar como de vezino de villa.
Todo ome que uvas furtar de noche, ho otra cosa qualquier, si pesquisa fallaren elos alcaldes, enforquenlo. E si negare, jure con IIII vezinos. E si non conpliere, peche IIII maravedis a su duenno de la vinna.
Qui sospecha ovier a su muger que ella le faz aleve, salvese con XII vezinos. E si con ella mala estançia ovier, e salva fe ella diere, lidie, si la salva fe firmaren IIII alcaldes que la dio e la quebrantaron.
Todo ome que salva fe diere ho tomare, ante IIII alcaldes la den, e firmen si menester fuer.
Vozeros e alcaldes e jurados anden por las calles e raiguen los omes, e vean a cada uno que vida vive. E si esto non fizieren, sealles en perjuro. E de cada una aldea vengan IIII omes bonos e juren que se raiguen. E si se non raigaren, los de la aldea lo pechen el danno doblado, que y fuer fecho por ladrones ho por malos omes.
Todo pastor que puercos guardar, de las puercas aya su quarto de la criazion, e media ochava de çenteno de cada puerca. Por puerco annal o mas, un ochavo de çenteno. El que menos ovier de anno, denle media ochava. E como los velare del anno, ansi lo paguen a su quenta.
Los alcaldes e los vozeros non hagan en uno corral ni viernes ni sabado, si no fuere por razonar sus vozeros.
Todo ome de otra villa que viniere demandare heredade a nuestro vezino, por nuestro fuero le responda.
Todo ome que bestia oviere a meter en la noche, metala otro dia antes de misa matinal, e vaya demostrar plazo al fuero o el alcalde oviere.
Todo ome que pennos prendar, si vençier el cabdal, non vincca<n> los pennos.
Todo ome que voz agena rezonar, si vençiere el aver que demanda e ela voz, vinzca<n> elos pennos de las calonas que prindar. E si no vençiere la voz que demanda ni el cabdal, non vinzca<n> los pennos de las calonnas.
Pastor que ganado acogiere en cabanna de su sennor, sin su mandado, elle lo peche.
Alcaldes que llevaren conducho a las aldeas en quaresma, lieven por dos alcaldes una quarta. E si mas fueren, a su cuenta, e si menos, eso mismo. E esto pague el conçejo del aldea do çenaren. E si mas levaren, non les den nada.
Quando exieren en apellido, lieven su çarcano e non coman del aldea. E si comieren, cayales en perjuro e pechen X maravedis a la puente. E esto costringan los veinte y quatro.
Todo ome que pan vendiere en las aldeas, peche IIII maravedis a los alcaldes, si esquisa hallaren de bonos omes, ho jure con IIII vezinos. Eso mismo de todo pan que venier de las aldeas ho de otra parte, e non lo vendieren en mercado, pechen un maravedi. E en cuya casa lo vendieren en mercado, pechen un maravedi. E en cuya casa lo vendieren, pechen IIII maravedis a los alcaldes.
Todo ome que pan quisier conprar, conpre una moravidada al dia, e no mas. E si mas conprar, peche dos maravedis a los alcaldes. E esto en mercado lo conpre.
Qui alfoli ovier en la villa, venda do quisiere; mas qui conprare, no tome mas de una moravidad a la selmana.
Nengu<n>d ome que derronpier casa do tovieren el çepo de conçejo, pague çinquenta maravedis. E si sacare ende ome del çepo, pague çien maravedis, la meatad al castiello, e la otra meatad a los alcaldes e a los seis, e metan su cuerpo en el çepo. E alcaldes no tengan ome en el çepo mas de terçer dia. E el que fuer de justiçiar, justiçienlo; el otro, sueltenlo. E qui asi no lo fizier, sea perjuro.
Todo aver julgado de alcaldes por dar a IX dias, no se pare tras ferias ni tras otras respuestas. E las otras firmas e juras, quando mandaren alcaldes responder e echaren la repuesta, responda cada uno a su plazo.
Nengunos omes que heredad o otros averes de parientes partieren, partan delantre fieles o delantre parientes. E si ansi non fizieren, non preste su partiçion.
Todo ome que matar venado ageno de sabueso, tome la pierna. E si la sacar de madero, delo doblado con quatro maravedis al duenno
del madero, si firmargelo [pudier]; e si no, jure con IIII e elle el Vo. E jure el duenno del venado con vezino e elle pos el ho suyo hera el madero; e si non quisier jurar, no tome el venado ni la calonna.Todo cavallero ho peon, quando hodiere apellido e non fuere trotando o corriendo, e non exier de la villa ho de las aldeas privado, al peon mesenge la barva e al caballero cortenle la cola al cavallo, si ge lo pudier firmar con tres vezinos. E sobresto pechen la calonna.
Todo hortolano a fuero, tal sea de Natal a Natal. Todo ome que metier hortolano en su huerto, delle asno e seron e açada pora estercolar. E el ortolano, de quanta semilla metier la meatad, tome la meatad; de la que non metier, tome el quarto. E qui mas tomar o mas dier, peche seis maravedis a los alcaldes. Todo hortolano que tovier huerto, si mal lo labrar, el sennor tome en lo leno e el ortolano en lo vazio. E si por el sennor fincar, fagale testigos el ortolano, e el ortolano tome en lo leno e el sennor en lo vazio.
Todo collaço o aportellado que aver o bestia furtare, ho la levar agena, su sennor la peche, e el fiador al sennor. E si non ovier fiador, su sennor no peche. E si el collaço o el aportellado levare alguna cosa al sennor, si levar valia de un maravedi, jure el sennor por su cabeça e delo su fiador o el; e por dos maravedis, jure su sennor con dos vezinos; e por tres maravedis o ende arriba, jure con IIII e elle el Vo. E por quanto jurar, peche.
Nengunos alcaldes, nin vozeros, ni escrivano, no sea<n> en quenta de conçejo. Alcaldes de conçejo sean fasta cabo de aquella petiçion.
Vozero ni alcalde no acote, sinon por calonnas de conçejo; si no, sean perjuros.
Todo ome que yegua ovier, no la eche a ojo de cavallo que en prado paçiere, salvo en almofalla; e si la echare, peche un maravedi al duenno del cavallo.
Todo aver de cavalgada e de conpannia, no aya ferias ni devedamiento.
Todos los penos que echaren por vino ho por pan, e non los sacaren fasta IX dias, fagan testigos con tres vezinos que lo saquen; e si no los quisieren sacar, vendanlos con un fiel, e si sobrar demas, denlo a su duenno. E si menguar, prende por su aver fasta que sea entrego, e no responda mas por ellos. E prende el pennos de maravedi al fuero, e quantos dias pasaren que no paguen, cada terçer dia tantos maravedis le pechen. E si fiel le parare, sobre la primera bestia responda.
Et si al alcalde, ni al vozero, ni al escrivano, no pararen fiel por los pennos que prendaren en su portiello estando, no respondan mas.
Corral de alcaldes es [derecho] que julguen lunes sus calonnas. E qui se alçare, meta sus bestias a terçer dia sobre las otras que yazen. Viernes julguen los juizios de la villa, e al sabado den los desafiados.
Si alcaldes se ayuntaren por pro de conçejo, no cayan en perjuro, mas non julguen sinon en [estos tres corrales sobredichos].
Ladron que hurtare, enforquenlo; e preste su aver a sus parientes.
Todo ome que hijo o sobrino ovier, e otro ome matar, non pechen por el su aver los parientes, nin su padre; nin su muger la su meatad pierda, si varon matar a otro.
Hijo enparentado que con su padre morar, ho sobrino, ho yuguero, ho ortolano, ho molinero, ho pastor, no responda <a> nadie, ni nad<i>e a el. E si hijo ho sobrino de ome de villa, (que) demostrare fiel al aldeano, e non vinier elle conprirlle de derecho, ho otro ome en su voz, peche un maravedi.
Los seis ayan corral cada viernes, e el que y non venier, peche un maravedi a los otros, si no se espediere.
Los alcaldes no esten en corral con los seis, sinon quando enbiaren por ellos. E si los seis vieren cosa ende se devan partir los alcaldes, diganles que se partan ende. E si non se quisieren partir ende, sean perjuros e pechen çien maravedis al castiello.
Los alcaldes de lavilla non den quinta. E el anno que fuer juiz, non julgue quinta. De los sesenta, no entre ninguno en almoneda; e si entrare, peche diez maravedis.
Todo [al]monedero que prendar en la calle, e dos de la calle quisieren jurar por los pennos, denlos aquellos por que juraren; e si non, denlos doblados a su duenno. E en aldea eso mismo fagan.
Todo ome que tomar por su danno ovejas do andaren carneros castrados, delas dobladas por el lavor, como dize de suso. E bue, o vaca o bestia mayor que en lavor agena entrar, peche diezma de maravedi. E si entrare en prado, peche diezma de maravedi. E si a sabiendas fezier danno, peche toda su calonna, como diz de suso.
Por todo ganado diz esto, asi como diz en otro lugar: que deve cada uno pechar, por gallinas que fezieren danno en huerto o en otro lavor, pechelo su duenno, por çinco ochavas de pan, [una ochava]; e si menos fuer, o mas, a su quenta.
Por borrico que danno fezier, un dinero. De borrico, seis dineros den en diezmo; e de potro o de muleto, una quinta.
Todo ome que escusado fuere de fonsado e de apellido, no eche suerte en alcaldia, ni en vozeria, ni en julgado.
Todo ome que aver ovier a dar a otro, venga el que demanda, e conçiertense unos con otros, e cunpranse de derecho.
Todo ome que juizio ovier, no se avenga con los alcaldes, e si se avenier, sea aleboso, salvo por sus calonnas. E si ellos se avenieren, sean perjuros. E las calonnas que fueren hechas en un alcaldia, si las no demandaren esos alcaldes dese anno, los alcaldes que entraren no las demanden, mas demande el querelloso su derecho.
Alcaldes que fueren en fonsado o en apellido, non den mas de a quatro alcaldes soldada.
Todos omes que fueren escusados de conçejo, e de fonsado, e de apellido, e de puesta, si almonederos los prendaren, tornen los pennos doblados.
Todo aver julgado de alcaldes e de convenidores, no aya ferias ni solturas.
Todo pastor a qui ganado dieren a velar, de fiador por el ganado e por las bestias de la cabanna, e elle tome recado de las que elle cogiere. E si asi non feziere, responda elle por ellos.
Todo ome que su cavallo aduxiere quebrado ho dannado de fonsado ho de açaria, demuestrelo a tres vezinos o a dos alcaldes, e yrgagelo el conçejo. E jure con quatro vezinos que alla se danno en esa açaria o en ese apellido; e si asi no fezier, non le den nada de conçejo ni de conpanna.
Todos omes que preito fezieren sobre conçejo, pechen X maravedis.
Todo tejero que teja o ladrillo [vendier] e por agua se dannare antes de anno, [camiela], e si non, peche quatro maravedis al conprador, e camie la teja e el ladriello, e non aya ferias. E el tejero que dixier: "vendida la he", de otor sin arte. E si le non dier, peche IIII maravedis.
Todos los tejeros que teja labraren, labrenla por el marco de conçejo. E den mill tejas a maravedi, e qui menos a su quenta. Todos tejeros de Coria que non suelen labrar teja, si oganno no labraren, no labren mas. Qui mill tejas no dier a maravedi, peche IIII maravedis a los alcaldes. E den mill ladriellos a maravedi.
Todos los olleros que labraren, den el cantaro por seis dineros, e qui mas lo diere de aquesto, peche dos maravedis. E sea cantaro de colodra; e el que menor fuere, delo por tres dineros. E la olla de medio quarto, dela por tres meajas; e la de quarto, por tres dineros; e la de mas, a su cuenta.
Los alcaldes, quando fueren en almofalla ho en apellido en las aldeas, los que y fueren, todos fagan una despensa a su cuenta, e no lieven enbidados. E si asi non lo fezieren, sean perjuros.
Todo ome que bestia conprare, bue o vaca, o qual bestia quier, e ixier enfermo o dannado, tornelo antes de IX dias a su duenno. E jure con IIII vezinos que atal ge lo vendio, e por su culpa no ovo mal, e tome su bestia, e delle el otro sus maravedis. E por asno. jure con un vezino. E si al terçero dia no le dier su aver, delo doblado. E por doblo e por caodal meta bestias, e no aya ferias ni solturas. E si antes de IX dias no tornar la bestia, no responda mas.
Todo ome que pennos agenos tovier por su aver enprestado o mudado, o pennos rematados, e el duenno de los pennos non los quisier sacar, el que tovier los pennos fagalle testigos, e si al terçer dia non los quisier sacar, vendalos, e jure con un vezino que los vendio, e sin arte. E entreguese de su aver, e si <so>brar, delo al duenno de los pennos. E si non conplier, prende por lo demas hasta que se entregue.
Todo ome que llevar a otro sobre si por salva fe, e no venier a dar la salva fe quando mandaren los alcaldes, peche IIII maravedis. E si no fallaren pennos, al que pedieren salva fee, peche IIII maravedis el que la levare sobre si. E pues que dier salva fe, si enemiga feziere, el que la levare sobre si peche la calonna doblada al querelloso ho a sus parientes. La calonna es: si lo matare e non lo podieren aver, peche seis maravedis; e si lo ferier sobre salva fe, peche la calonna doblada e vaya por alevoso de conçejo e del querelloso, e estos fiadores que levaron la salva fe pechen el aver.
Toda muger que hurtare, si pesquisa ovieren los alcaldes, enforquenla los andadores.
Todo ome o muger que sosaca hi<ja> agena pora otro, ho otra mugier que su marido ovier, quemenla. E al baron enforquenlo, si lo pudieren aver, e pierda todos sus bienes.
Estos son pennos rebellados: si el que deve prendar toma elos pennos, e vien el duenno de los pennos, e ase a los pennos, el <o> su mandado, ho si se para en la puerta, ho si çerrar la puerta e non la quisier abrir, e dixier: "dexa pennos o non entraras alla", estos son pennos revellados, si ge lo pudieren firmar con el fiel.
Los yunteros, todos los que ovieren valia de diez maravedis fasta veinte, medias ochavas de ordio, e de veinte arriba, ochavas conpridas, e de diez maravedis ayuso, no den nada.
Todo ome que por su juizio se quisier alçar a rey, alçese hasta diez maravedis ho mas, e no por menos. E el que se alçare al rey, meta pennos de quatro maravedis, e el otro de dos. E vayan al rey fasta Duero no mas. E si por aventura no quisieren ir al rey, tomen juizio. E si por aventura no fuer el rey en estos terminos, esperen, e este el su juizio hasta que venga el rey a los terminos. E quando fueren al rey, fasta seis dias el que se alçar, meta el otro al rey; si no, el otro fagalle testigos de los fieles, e vengase. E si lle julgare el rey lo que julgaron los alcaldes, el que se alçar peche dos maravedis a los fieles e dos a los alcaldes. E si el otro cayr, peche dos maravedis a los fieles. E del dia que vinieren, el que cayr, a nueve dias de los maravedis; si no, de fiador de queda de los pennos.
Nengun ome que non fuer escripto en carta de la collaçion encomendado al fuero, e que faga todas sus derechuras, non sea vezino ni haya parte en portiello.
Todo ome que manpostero [fuer] de frailes, ni de obispo, ni de sennor de villa, no aya otro portiello fasta que dexe la manposteria.
Qual ome quier que non ovier fijos e muger en Coria, no aya parte en ningun portiello.
Manda que fezier conçejo en diomingo, preste, e si non, non preste, e este conçejo sea hecho despues de misa.
Quando algunos omes fueren a terminar, vengan los unos e los otros ante los alcaldes, e estos alcaldes denles por juizio que vayan a determinar aquella heredade, otrosi delles plazo asennalado fasta en terçer dia a la puerta de la iglesia a que vengan anbos, e y escojan dos vezinos terminadores, e qui al plazo non venier, peche a su aversario çinco sueldos. Mas como determinar la heredade fueren venidos, el querelloso determinela toda, andandola a rededor. Despues, si el labrador de la heredade la dexar, el querelloso entre la heredad sin calonna. Otrosi, si el labrador la defendiere delante aquellos determinadores, aplazelo el querelloso poral primer viernes a Coria, por antel alcalde, e y aya cada uno su fuero e su derecho. E si alguno de aquellos adversarios non venier al plazo, ho si venier e fuer vençido, dexe la heredade con calonna de seis maravedis. Mas si estos adversarios fueren aldeanos, el querelloso aplaze su adversario a terçer dia a la puerta del alcalde, e el alcalde delles por juizio que vayan a determinar, poniendoles plazo, asi como de suso dicho es.
Todo ome que firmas ovier a reçebir, no tome abogado ques o fue en aquel pleito, ni su enemigo, ni aquel que ha esperançia o parte en la petiçion, sacados los alcaldes e el conçejo, ca los alcaldes pueden firmar por su juizio que no tayan, e sacados los conpanneros que fezieren conpannia por ganar fuera de la villa, e sacados los que son idos en sus negoçios, e los muertos, e los que son idos en algund desenbargamiento ho en reclova.
Todo recuero que vendier vino, de una moravidada, medio quarto de vino. E de la miel, una quartezna. E de manteca, eso mismo. De [pan], de ochava de una cuchar de XXXII en la ochava. E de sal, eso mismo como de pan. E esto todo den los omes de fuera parte de la villa. Todo ome que a escuso mediere, peche I maravedi e de las cuchares dobladas; e si negare, jure con un vezino. E el ochavero que fallaren en falseria, peche X maravedis al conçejo e ixca por alevoso. E del azeite, de una moravidada, una paniella. Todo recuero que pan e vino vendiere en Coria, en ese dia sea pagado, asi el vezino de la villa como el de fuera. Desto es el conçejo avenido: ningun ome que tomaren en falseria, peche quatro maravedis, e por aquel anno no mierque nada; e si esto no quisier fazer, los alcaldes lo vayan entregar, e si no, sean perjuros.
Todo carniçero que carne vendier, de el terçio del carnero por nueve dineros; e el quarto del cordero, el mejor por siete dineros; el terçio de la oveja por siete dineros; el quarto del cabrito por siete dineros; el par de las perdizes por seis dineros; e la carne del conejo por quatro dineros; e la carne de la liebre por seis dineros. E qui este coto quebrantar, peche dos maravedis. E toda esta conpra salga a mercado.
Toda tavernera que vino vendier, de el medio quarto de vino seis dineros, e tenga medio quarto e quartezna. E si esto non fezier, peche dos maravedis e no venda vino en ese anno. E tenga sus medidas derechas.
A esto son avenidos los pescadores: que <las> xudrias c'ayan dos
estadales de suso e dos de yuso, e no les pesque ninguno entrellas; e qui les y pescar, peche dos maravedis al querelloso e dos a los alcaldes.Todo ome de Coria que cavalgar, ningun ome rico ome que la villa tenga, no tome a juiz su setimo, ni all adalid su redro quinta.
Qualquier ome que ferier a judio, pechel dos maravedis, si ge lo pudier firmar con dos judios e un christiano, ho con dos christianos e un judio. E si fezier livores, peche quatro maravedis, si ge lo pudier firmar; sin non, jure el solo e sea creido.
Todo carniçero que quebrantare coto de conçejo, peche dos maravedis e non venda carne en ese anno; e si lo negare, jure con dos vezinos.
El juiz que entrar, pague la soldada a los porteros desa quinta del primero que cogiere; e si non, delo de su casa.
El alfaqueque tome del cativo que ixiere, fasta en veinte maravedis, [medio maravedi]; de veinte maravedis arriba, un maravedi e non mas.
Todo ferrero que no quisier labrar a destajo, calçe la reja por dos
dineros e aguze por un dinero. E reja ninguna non pierda vez; e si vez perdiere, peche la obra asi como manda la carta en otro logar. E qui mas dier e mas pedier, peche como manda la carta.Todo alfaqueque que entrare en tierra de moros <a> sacar cativos, tome del christiano o del moro el diezmo. E tome un maravedi el alfaqueque e su partadgo.
Toda bestia mayor que venier de moros con carga, de medio maravedi en portalgo, e de la ida una quarta de maravedi. E el asno que vaya, un ochavo; e de venida, una quarta. E de las bestias mayores que levaren a vender, den senas ochavas de maravedi, e del asno a su razon. Cavallo de siella, un maravedi. De las vacas, tome senas ochavas. De carneros, tome de çinquenta un carnero. Toda bestia mayor, de quatro maravedis; e la menor, dos maravedis.
Toda recua que venier de Portogal con azeite, o con trapos, ho con pescado, toda carga de bestia mayor, de una quarta de maravedi, si aqui venier; e de bestia menor, un ochavo; e si pasar, de un ochavo.
Toda carga que venier de otra parte, fueras de Plazençia, de ansi como sobredicho es.
Todo merchan que venier de otra parte a mercar e vendier, de un maravedi de quatro dineros.
Todo conejero que venier de otra parte, de cada collera de dos pielles.
Todo moro que salier de cativo, (e) de a la puerta un maravedi. E de el diez<mo> a los sennores. E de todo aquesto tome el huespede la terçia parte, ho posare.
Estas son las carreras que son desacotadas quando quisieren correr los cavalleros: la de Santa Ines e de la carneçeria e todas las otras de fuera de la villa. E si alguno destas carreras ocasionar, no salga por enemigo ni peche calonna. E si alguno corrier en la villa, salvo dia de San Juan o de San Pedro, e matar, ho enemiga hezier, salga enemigo ho lo peche como manda nuestro fuero. E nenguno que en estas carreras levar lança, siquier corra con ella, siquier non, peche X maravedis a los alcaldes.
Fernandus Dei gratia rex Castele, [et] Toleti, Legionis, Galleçie et Cordube, conçilio de Cauria, salutem et [benediçionem et] dileçionem. Vuestros omes bonos, que venieron a mi, me dixieron que avedes fuero que por demanda que aya uno con otro e a mi se alçare, que de Duero aca non venga a mi. E esto semejame que es cosa en que
resçiben muchos omes tuerto ca, loado a Dios, yo he mucho de ver e no puedo andar tan a menudo por esa tierra como mi padre andava; onde vos mando, que todos aquellos que preitos ovieren e a mi se quisieren alçar, que se alçen a mi de diez maravedis a suso, e que lles plazo pongan del dia que se a mi alçaren, que sean a XXX dias ante mi en el reino de Leon, desde Leon e de Irago fasta Guadiana, a estos logares mando que recudan a mi e no se enbarguen los omes e sus juizios por otros cotos ni por otras cosas. Data Valenti XI die marcii, rege exprimente. Hanc cartam mandavit dominus rex que poneretur in foro cauriensi. Et ego Santius episcopus cauriensis visa carta regis, propia manu in loco isto scripssi et de hoc testimonium verum perhibeo.