Conoscuda cosa sea a quantos son et seran: como yo Habuadele Yuan Fudayl, alguazil et senor d'Alcala, me fago vuestro vassallo de vos senor don Alfonsso primero fijo del rey d'Aragon, et do vos ocho castielos - el uno dizen Pop, et el otro Tarbana, et Margarita, Churolas, Castiel, Alcala, Galinera, et Borbunchen.

Estos castielos sobredichos vos do con sus alcarias, et con terminos, et con pastos, et q quanto les perteneçe. Et d'estos avandichos castielos do a vos senor don Alfonsso dos castielos luego, Pop et Tarbana; et retengo pora mi Alcala et Borbunchen, por eredat pora mi et pora mios fijos et pora mio linage et por fer de los toda mi voluntade. Et los otros quatro castielos - Margarita, Churolas, Castiel, et Galinera - estos tengo yo por tres annos, en tal convenencia que ayades vos senor don Alfonsso la meetad de la renda, et yo la otra meetat; et complidos estos tres annos, que vos de los castielos forros et quitos sin tota mala pleytesia, con todos sos terminos et con todos sos derechos assi como de suso dicho es.

Et demas fago esta convenencia conbusco sennor: que de quantos castielos yo pueda ganar d'aqui adelant fasta los tres annos que vos de la meetat de la renda; et los tres annos complidos, que vos de los castielos que ganare con los otros quatro, assi como de suso dicho es.

Et yo don Alfonsso por la gracia de dios infant, primero fijo del rey d'Aragon, recibo a vos Abuabdele Yuan Fudayl alguazil et senor d'Alcala por mio amado et mucho alto et muy onrrado et mio fiel vassallo. Et otorgo et do vos dos castielos, Alcala et Borbunchen, por eredamiento a vos et a todo vuestro linage por dar, vender, enpenar, et por fer de los toda vuestra voluntat.

Et do vos las rendas de dos alcarias de Hebo et de Tollo por estos tres annos et depues de los tres annos que me lexedes estas dos alcarias con los otros castielos.

Demas juro et convengo et otorgo, que tenga todas estas convenencias assi como [de] s[uso s]cripto es, pero [assi] que del castielo d'Alcala et de lo que vos do que seades mio vassallo.

Data carta apud Puteulum, die Aprilis, era MCCLXXXII.

Testes huius rei: dompnus Guillelmus Hugo dompnus Gonbaldus miles dompnus Petrus Maça dompnus Petrus Sancii Gurren dompnus Raymundi de Montepessulano

Signum Alfonssi infantis, illustris regis Aragonum primogeniti.

Ego ... mandato ipsius hanc cartam scripsi; et hoc signum meum apposui loco, die et era prefixis.