Presentibus et futuris notum sit et magnifestum quod ego Fernandus Dey gratia rex Castelle et Toleti ex asensu et beneplaçito domine Berengarie regine genitricis mee unacum fratre meo ynsante domino Alfonso conçedo et confirmo hanc cartam subscriptorum fororum conçilio de Godalfajara presenti et futuro perpetuo valituram.
Tod ome que en boz agena quisiere entrar, primeramientre jure que cre que demanda derecho, e reçibanlo en la boz; e sy esto non fiziere, no lo reçiban.
Tod ome que oviere a firmar ante alcaldes e jurados, primerament connonbre con quales firmara e digal sy quiere firmar o no e que firmas oviere a perçebir; diga a los alcaldes e a los jurados: "esto do a pesquerir"; e ellos pesquiran ante que firmen las firmas; e pesquiran quatro jurados e sex alcaldes fielmientre en bonos omes; e al que fallaren en verdad pase, e al otro no; e o se acordaren los mas, los otros vayan pos ellos.
Quy oviere a jurar e dixere el otro: "pesquerid esta jura," pesquiranla los sobredichos alcaldes e jurados; e sy no quisieren pesquerir, pechen ellos aquella demanda.
Qui firiere a otro con punno, peche diez maravedis.
Qui truxiere por cabellos, peche diez maravedis.
Qui firiere a otro con armas de fierro o de fusta o con piedra o con teja, peche sesenta maravedis.
Quy anduviere en vando e firiere e livores non fiziere, peche tres maravedis.
Tod ome qui viniere en vando e firiere o dixere: "dadle," e el otro fuere ferido, peche sesenta maravedis.
Qui oviere a desafiar, dia biernes desafie ante los alcaldes e los alcaldes fagangelo saber; e sy no viniere dar derecho, peche tres maravedis; e el que non quisiere dar derecho, costringanle los alcaldes fasta que cunpla de derecho.
Tod ome que robare en azogue o en mercado, peche tres maravedis.
Tod ome que dixere a otro: "lidiartelo e," syn mandamiento de alcaldes, peche diez maravedis; e sy anbos lo dixeren el uno al otro, pechen anbos çient maravedis.
Dos que varajaren, qui primerament firiere peche, e qui sobre si tornare, no peche.
Pescador o conejero que vendiere pescado o conexos en sus casas, pechen sendos maravedis.
Qui echare algund arma por ferir a otro e non firiere, peche tres maravedis.
Tod ome que plazo pusiere e dixere: "echemos a plazo," nol preste ninguna sobrepuesta; sy no firmare con los alcaldes, de la raiz.
Alcaldes prenden por bueltas de mercado, por lides, e por vandos syn quereloso e vieden el mal do lo fallaren.
Sy algunos varajaren e paz pusieren entre si, no pechen nada.
Qui muger prendare e dixere: "testo a tu marido," firmegelo; e sy no, peche quatro sueldos.
Tod ome qui rancura metiere a los alcaldes, faganle luego aver derecho, e si non, pechenle un maravedi e faganle aver derecho; e de estas calonnas fagan tres partes: una al rencuroso, otra a los alcaldes e otra al conçejo.
Tod ome qui fuere trabieso, non pendre sino con vezino e el vezino tenga los penos.
Tod ome que erença quisiere demandar, demande fata a diez annos, e dende asuso non responda, si no fuere preso o en romeria.
Tod vezino o morador que fiziere a otro jurar e despues le dixere: "mentira jureste," costringanle los alcaldes e peche tres maravedis.
Qui enpellare a otro, peche tres maravedis.
Andador no coja ninguna cosa syno su soldada, quinque maravedis.
Qui cavallo perdiere yendo en apellido, coja de vezino un ochava de mencal.
Tod ome de Guadalfajara que bozes o bueltas oyere e con lanças o con escudos o con lorigas exiere en la villa, peche diez maravedis.
Qui oviere de firmar a conçejo, firme con çinco de conçejo.
Cavallero qui fuere en fonsado e se demandare, aduganlo a que non de a tres nuef dias, e de tres nuef dias adelant, non responda.
Alcalde o jurado qui con armas, fuera cuchillo, a buelta o en vando viniere, peche diez maravedis.
Sy buelta se fiziere en villa, ayuntense los alcaldes e jurados en el albergueria a provecho de la villa e syn arma; e qui armas aduxiere, peche diez maravedis; e vieden tod el mal e vayan pendrar e vedar el mal todos ensenble; e qui no quisiere yr, peche diez maravedis a sos conpaneros.
Tod ome que penos prisiere en vinna, jure con un parient vezino; e sy parient no oviere, jure con un vezino e peche diez maravedis.
Sy ovejas vinieren a la vinna quanto una piedra pudiere
echar, prendan un carnero; e sy entrarent en la vinna, prendan çinco carneros o el danno qual mas quisiere el sennor de la vinna.Ningund ome por casa ni por vinna ni por moral ni por peral de un anno arriba non responda ni coga otor.
Tod ome qui muger prisiere, el marido de al escosa en arras vente maravedis e a la bibda diez maravedis, e al escosa del aldea diez maravedis e a la bibda çinco maravedis.
Tod omne que prisiere ganado danno faziendo, ant que entre en corral, prenda pennos de una ochava de metal; e sy no, peche çinco sueldos; e sy trasnochare, duple el danno.
De Março arriba ganado que entrare en mies peche por la caveça fanega, e fasta Março, media fanega; e por arvejas e mijo asy peche como por çenteno, e por garvanços como por trigo. Et por diez porcos e por diez ovejas, una fanega. E si fuere paçida o arrancada mata de cogonbro, peche un sueldo, e por col, arrienço. Et en vinna por entrada, a la cabeça tres cotos.
Por dano de vinna, non preste nula sobrepuesta.
Tod ome que a otro en su casa o en su vinna o en su orto o en su mes lo fallare de noche furtando e lo matare, jure con doze dos vezinos que furtando lo mato e non peche nada ni exca enemigo syno el omezilio viejo.
Toda muger mala que dixere mala palabra a varon o a muger, vatanla sin calonna.
Ningund ome non riepte a su collaço ni syervo a su sennor. Por ninguna cosa non aya riepto syno por muert de omne o por fuerço o por muger forçada; et en estas tres cosas aya parte el sennor e en al non.
Tod omne que fuere poblar a Guadalfajara e dixere: "yo so fijo de ynfançon," no aya mayor calonna que uno de sus vezinos.
Ningund ome de Guadalfajara que vezino fuere non sea merino.
Ningund ome de Guadalfajara que judez fuere non coja pecho ninguno de la villa, fueras sy viniere el rey en la villa o sennor e diere el conçejo alguna enfurçion, aquello saque e aquello coja el judez.
Tod ome a qui so juguero o so collaço matare, sea el omezillo de so sennor.
Todo omne que en Guadalfajara muriere y parientes no oviere, hi dent su aver por su alma o el mandare; e sy muriere synt lengua, dent su aver o bieren bonos omnes por bien.
Tod ganado de Guadalfajara non de montadgo a ningund lugar.
Tod vezino de Guadalfajara, sy el judez o los alcaldes o los jurados alguna cosa le demandaren, de fiador que faga quanto el rey mandare , e sy asi fiador no le quisieren coger, defienda su casa.
Tod vezino que a ome albarran matare, non peche syno el omezillo viejo e non exca enemigo.
Ningund ome por ninguna raiz non responda de un anno arriba.
Tod ome a qui demandidieren fiadores de salvo, seyendo ante los alcaldes, e non los diere, peche tres maravedis; e ayan poder de desechar çinco omnes.
Cavallero qui oviere cavallo e armas de fust e de fierro e toviere casa poblada en la villa non peche e sea escusado.
Sy cavallero muriere, su cavallo e sus armas sean del fijo mayor que fuere en casa; e sy fijo no oviere en casa, heredelo el fijo mayor que fuere fuera de casa; e sy muriere su muger, ningund parient ni fijos ni fijas non partan al cavallero su cavallo ni sus armas.
Tod omne que a sabiendas lexare de desafiar ad aquel qui mato su parient e desafiare a otro por presçio o por ruego o por mala voluntad que aya contra el, pierda el enemigo e peche el omezillo que deviere pechar aquel henemigo sy con derecho fuese desafiado.
Ningund omne qui fuere justiçiado, sus parientes no pierdan el aver.
Tod omne que por alcaldia diere aver, derribentle las casas e peche al conçejo vent maravedis e non sea mas en por-
tiello. El alcalde quando entrare, jure con dos parientes que non conpro aquel alcalidia.De aquel quarto que fuere el judez, el conçejo con los jurados ponganle almotaçen e no ayan poder el judez ni los alcaldes sobre el almutaçen; e de al judez cada domingo dos libras de carne, una de vaca e otra de carnero.
Por ninguna cosa ningund ome non responda syn quereloso.
Tod omne qui aver oviere a dar e negare o dixere: "pagado lo he," e por alongar lo fiziere e se echare al rey e dixere: "aquel demandador dolo a pesquerir," e fallaren verdad que ge lo deve, no vayan con el al rey e pendre cada dia por su aver fata dos maravedis; e sy de dos maravedis arriba fuere la debda e se echare al rey, vaya puesto plazo en tod el reygno o que el rey fuere, e aquel que no y fuere, sea caydo.
Tod ome que a otro demandare fiador de su faz, del fiador que no se vaya, e el fiador sea fata a un anno, e de anno arriba, non responda.
Ningund ome que dixere a otro: "dam lo que me deves," e dixere ant tres bonos omnes: "devo," e sy nol diere fiador e debdor, por otro fiador no lo de; e sy dixere: "no te devo nada," del fiador en casa con pennos de seerle luego a derecho e sy fuere vençido, del luego lo suyo.
Tod omne que vestias oviere a prender por conçejo, non prenda vestia de cavallero escusado ni de vibda ni de forno ni de molino ni de ome pobre que non fuere en carta ni de
omne de fuera villa ni de clerigo; e si aquella prisiere, peche diez maravedis.Tod ome qui rancura oviere de otro por desorna o por ferida o por muerte de ome e aquella rancura non metiere a los alcaldes que fueren en es anno y despues la metiere a los alcaldes que fueren en otro anno, non responda.
Cavallero escusado quando oviere a yr en hueste con el rey, escuse una vestia que non sea de cavallo.
Nula cosa non prenda el judez a menos de dos alcaldes, e sy prisiere e non ge lo pudiere el judez provar por dos alcaldes, por quanto jurare el quereloso, tantol pechen.
En toda cosa quel sennor oviere parte, el judez le demande con el quereloso, e al judizio o a las firmas no sean el judez ni el merino.
Omne que mandare por su alma, mande mueble, e si rayz mandare e fijos oviere o parientes, nol preste.
Tod ome que a otro matare, peche trezientos maravedis, e quantos en el firieren cada uno peche trezientos maravedis e excan enemigos; e si non ovieren de que pechar el coto, pierdan las manos diestras et quanto ovieren; e sy en casa de algund vezino se metieren, el los prenda; e sy dixer: "no los pud prender," salves con doze dos vezinos; sy non se pudiere salvar o dar los omnes a justiçia, peche los cotos; e sy non cunpliere, a el corten la mano e ixca enemigo.
Por entrada de casa no aya pesquisa.
Qui muerte de omne demandare, primeramientre jure con dos parientes vezinos que no lo demanda por malquerencia, syno quel fazen creer que parte ovo en la muerte; e sy, responda; e si esto non quisiere jurar, non responda.
Aquel qui ome matare pues que lo saludare, muera por ello.
Qui omne matare, el seyendo seguro, muera por ello.
Qui omne matare sobre fiadores de salvo, peche mill maravedis e muera por ello; e sy aquel no oviere onde peche el pecho, pechenlo los fiadores; e sy el cuerpo aver non pudieren, los fiadores prendan lo que ha e sobre aquello pechen los cotos e el vaya por traydor; e sy el cuerpo dieren a justiçia, los fiadores no pechen nada.
Qui muger forçare, muera por ello.
Qui por muger forçada demandidiere, firme en la villa con tres vezinos, e de fuera con dos, que se mostro rascada e maltrayda antes que entrase en casa; e si, responda; e sy non firmaren, non responda.
Por muerte de omne sex alcaldes e quatro jurados lo pesquiran e lo juren en conçejo. E esta pesquisa parientes del muerto no la den. E sy los alcaldes e los jurados non quisieren pesquerir, ellos pechen el coto. O esta pesquisa fuere, otro judizio non preste. E si pesquirieren los alcaldes e los jurados que culpa non ovo en la muerte del omne, non responda.
De muerte de omne que alcaldes e jurados non pudieren pesquerir, entren en salvo o riepto, qual mas quisieren parientes del muerto, e sy el uno lidiare, los otros salvense.
Al qui su parient matare e fuere en pos de su enemigo e lo matare, non peche nada.
Tod ome qui a otro firiere o matare e se ençerrare en algund lugar e fueren sus parientes con armas prenderle, de fiador; e sy non quisyere dar fiador e lo mataren, non pechen nada; e si el o el sennor de las casas dieren fiador, no lo maten ni lo fiergan ni fuerçen las casas. E dando tiadores sy lo mataren o lo firieren o forçaren las casas, pechen las calonnas dupladas.
El vando que lo amparare, peche mill maravedis.
Qui ome matare o furtare, nol preste yglesia ni palaçio.
Qui enemigo conosçido en su casa acogiere e non se pudiere salvar, peche çient maravedis.
Qui muger rabiere, peche çient maravedis e ixca enemigo; e sy ella se yxiere por su voluntad, sea deseredada.
Tod ome que casas agenas quebrantare, peche las calonnas dupladas e tod el danno que hi fiziere al sennor de las casas; e sy junieren en ayuda con vando, peche cada uno diez maravedis; e qui non oviere onde peche estas calonnas, yaga en la carçel tres nuef dias, e de tres nuef dias, sy no oviere las calonnas, non coma ni veba fata que muera.
Ningund mandamiento non preste sy no fuer el martes
primero despues de Sant Miguel, e sy fuere refertado, non preste.Por muerte de ome non demanden ni desafien de çinco arriba.
A tod omne que demandidieret fiadores de salvo, de fiadores por el e por sus parientes a su cuerpo de aquel que los demandare.
A tod omne que demandare fiadores delant alcaldes e jurados que viba en paz e que non sea trabieso, delos, e sy no los diere, vaya por albarran, e qui lo matare no ixca enemigo ni peche nada syno el omezillo viejo: trenta e dos maravedis.
Tod ome que cortare arbol que fruta llevare syn grado de su sennor e ge lo pudiere provar, peche diez maravedis; e por arbol que non llevare fruto, peche çinco sueldos.
Qui cortare vinna syn grado de su sennor, peche por cada vid diez maravedis, e sy lo demandare a sospecha, haga la manquadra e salvese con sex e el el seteno.
Juguero o collaço responda a su amo troa cabo del anno por lo quel demandare, e por quanto el jurare, tantol peche. E sys fuere antes del cabo del anno, o lo fallare, y lo peche.
Estos maravedis de las calonnas sean de tres mencales. Destas calonnas la terçia parte al rencoroso e la terçera al sennor e la terçera al conçejo; e destas calonnas las duas partes en apresçiadura e la terçera en moneda.
Tod ome que a otro quebrare su ojo ol cortare nariz o mano o pie, peche çient maravedis e ixca enemigo; e syl cortare oreja ol echare dos dientes de suso o dos de ayuso que sean delante ol cortare su pulgar de la mano, por cada un destos mienbros peche çinquenta maravedis; e destos ayuso como van desçendiendo los mienbros de los dientes e de los dedos, ansi desçiendan las calonnas por cada mienbro çinco maravedis. E destas calonnas de los mienbros sean las dos partes del quereloso e la terçera de los alcaldes; e sy el malhechor no oviere onde peche las calonnas, yaga en la carçer tres nuef dias; e sy de tres nuef dias adelante non diere las calonnas, non coma ni veva fata que muera.
Qui emparare pennos a vezino, peche medio metal al judez e medio al quereloso, e qui a andador que los alcaldes enbiaren en villa, pechen un maravedi, e en el aldea, pechen tres maravedis; e qui al judez, un maravedi; e qui a dos alcaldes, tres maravedis; e qui a cabildo de los alcaldes, diez maravedis; e vayan al conçejo e pechen a los alcaldes vente maravedis e pierdan los pennos que levaren al conçejo. E qui anpare pennos a andador de los jurados, peche en villa un maravedi e en aldea tres maravedis; e qui a los jurados, vente maravedis.
Aldeano que acotare a otro, el que no viniere al coto, peche medio maravedi al quereloso e medio al judez.
E lo que no es en esta carta sea en albedrio de buenos omes.
Qui ovyere a dar eguaja, a vezino de carta, de vezinos de carta; a morador, de moradores; e sy non, no los resçiba.
Ningund omne que fuere braçero o oviere fecho prueva o fuere fuera de termino, no venga en eguaja sy no fuere por su cabeça.
Qui oviere a firmar a vezino de carta, firme en villa con tres vezinos de carta e en aldea con dos; e a morador, en villa firme con tres moradores e en aldea con dos.
Tod ome que oviere filios e muriere uno de los parientes, parta con sus fijos; e sy en uno moraren los fijos e muriere alguno dellos, heredentlo los otros hermanos; e sy partido ovieren, heredelo el parient.
Ningund omne de Guadalfajara no aya poder de vender heredad ni rayz a omne de horden, e sy la vendiere a omnes de horden, pechen çient maravedis e pierdan los conpradores la heredad.
Tod omne que molino oviere, defienda de la presa arriba quanto una piedra pudiere echar, e del calze ayuso otrosy defienda quanto una piedra pudiere echar.
A muger que demandidiere furto de diez mencales arriba, sy non fallaren pesquisa, salves con doze dos mugeres.
Ningund ganado de fuera termino non entre en la dehesa, e sy lo prisyeren los cavalleros, maten de la grey de las ovejas diez carneros e del busto de las vacas maten una vaca; e los cavalleros no pidan ningund pedido e sy lo pidieren, pechen çient maravedis.
El peso de la lana e del lino e del cannamo pese en medio del alcoba; e sy de otra guisa pesare, peche el pesador
çient maravedis e prendan del arroba de lana dos dineros e de cannamo quatro dineros e del lino sex dineros.Et la pesa del peso del cannamo e del lino e de la lana sea una e non sea en talega; e sy la fallare en talega, peche el pesador çient maravedis.
Tod ome que heredare de omne muerto poco o mucho, pague el debdo, e sy no lo quisiere pagar, no herede.
Et por ninguna cosa non firme palaçio, sy non fuere con alcaldes que fueren jurados.
Qui so moro tornare cristiano e non oviere fijos, heredelo su sennor, sy por Dios se aforrare; e sy por aver lo tornare o por annos, herede la meatad el sennor e la meatad o el mandare. E sy parientes oviere cristianos, heredenlo sus parientes.
Ningund ome qui demandare fiador en aldea a otro e no ge lo diere, prendal syn calonna, e sy dixere: "dare fiador en la villa," llievelo preso fasta la villa syn calonna.
Tod poblador que viniere poblar a Guadalfajara, no peche fasta a un anno.
Ningund omne de primero casamiento que case no peche fasta a un anno.
Cavallero de aldea ni peon no prenda fosadera ni escuse vestia por yda de hueste.
Ningund ome que fuere fiador de salvo a otro non responda de anno arriba pues que los alcaldes ixcan.
Ningund ome qui tornare so moro cristiano nunqua non firme sobre su sennor quel torne en danno ni su fijo al suo ni su nieto al suo.
Ningund ome que a otro dixere nonbre vedado o gafo o cornudo peche tres maravedis e sobre esto jure que no lo sabe en el.
Sy quis vero hanc cartam infringere seu diminuere in aliquo presumpserit, iram Dei omnipotentis plenarie yncurrat et cum Juda Domini proditore penas sustineat infernales et regie parti mille aureos in cauto persolvat et damum eidem concilio super hoc yllatum restituat duplicatum. Acta carta apud Toletum xxvi die Madii era millesima CCL. septima, anno regni mei secundo.
Et ego Rex Ferrandus regnans in Castella et Tolleto hanc cartam quam fieri jusi manu propia roboro et confirmo.
Rodericus Toletane sedis archepiscopus Hispaniarum primas confirmat.
Mauritius Burgensis episcopus confirmat.
Tellius Palentinus episcopus confirmat.
Geraldus Secobiensis episcopus confirmat.
Rodericus Segontinus episcopus confirmat.
Melendus Oxomensis episcopus confirmat.
Garsias Conchensis episcopus confirmat.
Dominicus Abulensis episcopus confirmat.
Dominicus Plaçentinus episcopus confirmat.
Johannes domini Regis Cançellarius abbas Sancti Anderii confirmat.
Dominus Rodericus Didacii confirmat.
Dominus Albarus Didacii confirmat.
Dominus Alfonsus Telli confirmat.
Dominus Johannes Gonçalvi confirmat.
Dominus Rodericus Roderici confirmat.
Dominus Suerius Tellii confirmat.
Dominus Guillelmus Gonçalvi alcaldes Toleti confirmat.
Dominus Garsias Ferrandi mayordomus Regine confirmat.
Dominus Gonçalus Petri mayor merinus in Castella confirmat.
Gonçalus Roderici mayordomus curie Regis confirmat.
Lupus Didacii de Faro alferiz domini Regis confirmat.
Egidius iusu Cançellarii scripsit.