---
title         : Tratado de cetrería
date          : s XIII
purl          : https://purl.uni-rostock.de/demel/t0036
publisher     : DEMel - Diccionario del Español Medieval electrónico (https://demel.uni-rostock.de)
analog source : Gerardus Falconarius, Tratado de cetrería. San Lorenzo de El Escorial: Monasterio, V.II.19, copiado 1290-1310. Transcr. José Manuel Fradejas Rueda. In: ADMYTE 0.
text encoding : UTF-8
---

[ 145v ]
  
 El primero capitulo es del prologo
 del libro
 El segundo capitulo es de melezinar
 los dela petita queles non pueden arrancar 
 con las manos
 El terçero capitulo es de melezinar
 los quando tornan la carne
 El quarto capitulo es de melezinar
 los quando an los colodriellos enbargados
 por ffumo o por poluo. o en
 alguna gujsa
 El quinto capitulo es de purgar
 las cossas que sson dentro del cuerpo
 del af.
 El .vio. capitulo es de melezinar
 los delas lonbrizes
 El .vijo. capitulo es de melezinar
 los delos pioios.
 El .viijo. capitulo es de toller la
 sset
 El ixo capitulo es de toller el fastio
 El xo capitulo es de toller la
 tos
 El xio capitulo es de melezinar
 la tinna
 El .xijo. capitulo es de melezinar
 la tinna que come las pennolas
 El .xiijo. capitulo es de melezinar
 la gota
 El xiiij capitulo es de melezinar
 la gota artetica
 El .xvo. capitulo es dela gota ques
 les ffaze en la goria
 El xvj capitulo es de melezinar
 los dela gota delas rrenes
 El .xvij. capitulo es de melezinar
 el ffalcon quando ha la gota
 ffilera
 El .xviij. capitulo es de melezinar
 el ffalcon que a mal en la
 garffa
 El xix capitulo es de mudar
 ayna el aue
 El .xx. capitulo es de melezinar

[ 146r ]
  
 la tissica. ⁊ la çera quel
 naçe del baço 
 El xxi capitulo es de guardar
 açor
 El xxij capitulo es de melezinar
 el açor duna enffermedat quel
 dizen aguia
 El xxiij capitulo es de melzinar
 el açor delos pioios.
 El xxiiij capitulo es de magreçer
 ayna el aue que es gruessa
 El xxvo capitulo es de engrossar
 el aue magra
 El xxvi capitulo es de melezinar
 la tesga que ha el açor
 enel vientre.
 El .xxvijo. capitulo es de melezinar
 la tesga dela cabeça
 El xxviijo capitulo es de melezinar
 la tesga dela ffiel
 El xxix capitulo es de toller las
 tinnas que non nascan
 El xxx capitulo es dela purga
 dela cabeça.
 El xxxi capitulo es de estrennir
 el paladar.
 El xxxij capitulo es de melezinar
 la nuue que paresçe enel oio
 El xxxiij capitulo es de melezinar
 el mal que es enel pulmon. o en la
 goria
 El xxxiiij capitulo es de melezinarle
 quando sse demuestra alguna malatia en
 ssy
 El .xxxvo. capitulo es de melezinar
 le delos gusanjellos quel comen
 de dentro enel cuerpo.
 El xxxvi capitulo es de melezinar
 el mal delas rrenes
 El xxxvij capitulo es de melezinar
 el ffigado
 El xxxviij capitulo es de
 toller el ffastio ⁊ la sequedat
 El xxxix capitulo es de melezinar
 las pennolas que come la tinna
 El xl capitulo es de melezinar
 la malabtia que fforada los pies
 El xli capitulo es de melezinar
 la ynchazon delos pies
 El xlijo capitulo es de melezinar
 la carne que creçe en algun logar

[ 146v ]
  
 El xliijo capitulo es de ssanar los pies
 El xliiij capitulo es de toller el fumo
 El xlvo capitulo es delo que deuen dezir
 quando esta en la muda ⁊ mete pennolas
 nueuas
 El .xlvi. capitulo es delo que deuen
 dezir quando a mudado
 El xlvij capitulo es delo que deuen fazer
 quando ffuere muy gruesso ques non
 dessayne
 El xlviijo capitulo es delo quel deuen
 ffazer que quiera bien al omne que
 nol dexe
 El xlix capitulo es delo que deuen
 dezir por mjedo del aguila
 que nol ffaga mal quando ffuere a caçar
 El primero capitulo 
 Mester ffue quelas cossas que an
 alma ffuessen criadas en ssennas
 guissas. pues que ffue el mundo criado
 en quatro cossas contrarias conuiene
 por las quales demostrasen departidas
 ffechuras despues duraron ffirmes
 luenga mjentre ssin
 corronpimjento de cuerpo. ffasta
 que cayeron por glotonja de vientre
 assi quelas cossas que eran de dentro conpuestas
 muy bien por tragonja de
 garganta ffueron desfechas. ⁊ desmenbradas
 por end plogo a la proffundidat
 dela ffisica por ssu
 natura dellas ⁊ por otras cossas
 muchas deparar en qual guisa
 esta pistilençia entrara por cada vna
 delas partes del cuerpo en que asi
 ssin danno de cada vna delas creaturas
 cada vna por ssus melezinas
 ffuesse ssana. Et esto non sola
 mjentre en las meiores mas en
 las bestias mudas vale onde
 en las aues que sson açores fallamos
 tal conpussiçion
 El ijo. capitulo 
 Si alguno ouiere petita atal
 que con las manos non gela puedan
 arrancar conuiene que ssequen la yerua
 brassinçe. ⁊ maien la. ⁊ mezclen
 la con olyo de oliuas ⁊
 con mjel. ⁊ den gelo mezclado con
 ssu çeuo
 El iijo capitulo 
 Si alguno torna carne conuiene
 que magen la çiliandre
 esprieman el xugo en vn
 panno muy delgado. ⁊ den le a
 comer carne caliente moiada en aquel
 xugo por tres dias. ⁊ luego

[ 147r ]
  
 quedara de tornar. Otrossi toma el pelitre.
 ⁊ el gingibre. ⁊ faz ende poluos. ⁊
 destienpra los enel xugo del apio. ⁊ da
 gelo en su çeuo. Et toma el lardo del
 puerco fresco. ⁊ fazlo taiadas con el
 poluo del culantro. ⁊ dagelo. ⁊ faz xugo
 de apio. ⁊ delas orugas ⁊ da
 gelo con ssu çeuo enbuelto
 El iiijo. capitulo 
 Si alguno a el colodriello enbargado
 por ffumo. o por poluo. o en
 alguna guissa toma la pimjenta.
 ⁊ ffaz poluo conel rrauano. ⁊ ssopla
 gelo en las narizes. o toma el
 lardo duro ⁊ los aios ⁊ muele
 lo en vno ⁊ ffregal el paladar
 o toma los aios ffuertes ⁊ destienpra
 los con agua tibia. ⁊ laual
 con ello la cabeça al ffuego o
 al ssol por tres dias. o toma
 el escoria del ffierro ⁊ ffieruela
 enel agua fasta que ssea el agua
 muy mjnguada ⁊ moial en ello su
 çeuo. ⁊ dagelo o toma la teia vermeia.
 ⁊ el atramjento ⁊ la ssal todo
 por egual. ⁊ ffaz poluos.
 ⁊ ssopla gelos en las narizes o
 toma el yssopo ⁊ la rruda. ⁊ la
 ssayn ⁊ ffaz lo vnguento ⁊ da
 gelo cada dia en ayunas. Et
 esto nos abonda pora purgar la cabeça
 El vo. 
 Dezimos assi que para purgar las
 cosas de dentro del cuerpo del
 aue. ⁊ valen mucho estas cossas
 que diremos adelantre. ⁊ mayor mjentre
 las conffirman los ffissicos tomen
 la fflor del apio. ⁊ del ssalze ⁊
 delos granos dela yedra ⁊ la flor
 del ssarpol montessino. ⁊ muelan lo
 todo en vno ffuerte mjentre. ⁊ ffagan
 lo poluos. ⁊ den gelo a comer en
 ssu çeuo o ssi non tomen del eboro
 que es criado en huerto. ⁊ cuegan
 lo mucho en vino dulçe. ⁊ despues
 tomen aquel caldo. ⁊ mezclen lo con grossura
 de cueruo marino ⁊ con grossura
 de gallina. ⁊ con grossura de paloma
 ⁊ dengelo a comer grant mannana. ⁊ nol den
 a comer mas aquel dia fastal primer suenno. Et
 despues tomen del orpimente con el lardo del
 osso. ⁊ la grossura del gallo montes. ⁊ mezclen
 lo todo en vno. ⁊ dengelo. o tomen
 del mjnio aluo con el hueuo tibio. ⁊ mogen
 les enello su çeuo, ⁊ dengelo a comer. Et
 esto las engruessa mucho. ⁊ presta mucho
 a las malatias que an dentro enlos cuerpos
 El vjo. 
 Quando ouieren
 lonbrizes, tomen la ssimjente del apio
 molida bien. ⁊ echen gela dentro enla boca
 ⁊ den le quatro çeuaduras de paloma biua

[ 147v ]
  
 ⁊ vn mur caliente. o tomen del çumo del
 assadrea ⁊ dela lechuga montesina. ⁊ denle
 vna taiada de carne moiada en aquel çumo
 o tomen el çumo del assenssio. ⁊ metanlo en
 estentino de gallina bien linpio. ⁊ sea de vn
 palmo en luengo. ⁊ atenle damas partes. ⁊ de
 guisa gele den que entero le coma.
 El vijo 
 Hora los pioios. Conujene
 que tomen el cabrito biuo, ⁊ dessuellenle.
 ⁊ enbueluan el aue enel pelleio
 ⁊ pongan la al sol. ⁊ assi yaga todel dia.
 o si non fagan lexia de çenisa de saujna. ⁊
 bannen el aue tres uezes con ella. o tomen
 argent biuo, ⁊ piedra sufre ⁊
 vnto anneio, ⁊ destienpren lo con el çumo
 del çerofolij. ⁊ vntenles con ello al fuego
 o al sol. ⁊ tomen pannos delgados ⁊ enbueluan
 la enellos. ⁊ sea enbuelta toda la
 noche. El viijo 
 Pora toller la set
 conujene que tomen el leuistico ⁊ el
 apio. ⁊ las berças montesinas. ⁊ la foia del
 aneldo. ⁊ la simjente del finoio. ⁊ cuegan
 todas estas cosas egual mjente en vino
 ⁊ mezcan las bien. ⁊ quando fuere frio den
 gelo a beuer. El ixo 
 Pora toller el fastio.
 tomen el orpiment mezclado con lana
 ⁊ dengelo a comer con su çeuo. o tomen el
 mur biuo. ⁊ dengelo a comer, o el perriello
 que non aya los oios abiertos. o gatiello
 que non aya los oios abiertos.
 El xo 
 Pora toller la tos. conujene que tomen
 del laurel. ⁊ quemen le. ⁊
 tomen daquellos poluos, ⁊ dengelos con carne
 de paloma, o tomen el aio cocho
 mezclado con la pimjenta. ⁊ freguen
 les los paladares con ello.
 El xj. 
 Quando quisieren melezinar la tinna
 conuiene que tomen el meollo del
 çieruo, ⁊ vn poco de olio de oliuas ⁊
 vnten les con ello aquel logar do fuere
 la tinna. o tomen el çumo del assenssio.
 ⁊ espriemanlo con vn panno delgado.
 ⁊ fagan lexia de sarmjentos. ⁊
 metan y vn poco de azeyte. ⁊ mezclen
 lo todo en vno. ⁊ lauen la tinna con
 ello. o tomen fojas de rrauano cochas
 con mjel. ⁊ con vino destenpradas
 ⁊ lauen aquellos logares con ello catorze
 dias, ⁊ endureçran las pennolas.
 El xijo. 
 Dezimos que
 quando comiere la tinna las pennolas.
 conuiene que tomen vn poco de
 balssamo. ⁊ metan lo enel forado o esta
 la tinna. ⁊ morra. ⁊ naçra buena
 pennola. o tomen vna onça de
 buen açafran oriental. ⁊ tomen del
 estiercol de ansar. ⁊ espriemanlo con
 vn panno. ⁊ tomen daquel çumo tres cuchares.
 Et otros tres de vjnagre
 fuerte. ⁊ el açafran fecho poluos.
 ⁊ mezclen lo todo en vno. ⁊ metanlo

[ 148r ]
  
 en vn baso de aranbre. ⁊ dexen lo fasta
 ques faga espesso. ⁊ tomen del vjnagre
 fuerte, ⁊ metan lo tres uezes
 en los logares dont salieren las pennolas.
 ⁊ despues metan les y daquel vnguente.
 o tomen las sangusuelas, ⁊
 pongan las sobre vna teia rroia ⁊
 quemen las bien, ⁊ paren pennolas de pauon
 dessuso en ques apegue el fumo
 ⁊ tomen aquel fumo con al tanto vjnagre
 quanto fuere el poluo delas sangusuelas
 ⁊ tomen taiadiellas de lardo. ⁊ mezclen
 lo todo en vno. ⁊ metan lo alli o la
 tinna es. ⁊ esto les fagan dos uezes
 en la ssemana. fasta que nazcan las pennolas
 nueuas. o tomen las sedas del cauallo
 bien picadas. ⁊ echen gelas sobre la carne.
 Et tomen del pelitre con el vinagre fuerte
 ⁊ con el çumo del bigato que non ssea
 muy claro. ⁊ unten les la tinna por tres
 uegadas ⁊ sseran sanas. O tomen el
 ssapo biuo. ⁊ quemen lo biuo. ⁊ tomen delos
 poluos ⁊ echen les dellos enel çeuo con
 limadura de fierro. El xiijo 
 Si uieres que a la gota. toma los huessos
 delos priscos. ⁊ ssaca el meollo
 dellos. ⁊ vntal con aquel olio. ⁊ toma la
 ssayn del corilo bien seco ⁊ untal con ello.
 El xiiijo. 
 Pora la gota
 artetica. esta malatia se entiende
 quando an los cuellos jnchados. ⁊ quando
 esto uieren. conujene queles messen los
 cuellos vn poco. ⁊ caten les la uena quel
 dizen organal, ⁊ sangren les del cuello
 vn poco. ⁊ den les a comer delas rranas. Et
 silo tollieren son sanas. El xvo. 
 Sabet que quando seles fiziere
 la gota enla goria. connosçer lo an por
 queles incha. Et conujene que tomen sangre
 de pauon ⁊ musco, ⁊ mjrabolanos. ⁊ claues
 ⁊ canela ⁊ gingibre de cada vna destas cosas
 vna onça ⁊ fagan dello nueue bocados
 ⁊ den les cada dia a ora de terçia. vn bocado
 ⁊ despues a ora de nona, den les vn mur
 a comer. El xvjo. 
 Dezimos que si fuere la gota enlas rrenes
 Conujene que tomen mumiam. ⁊ pelos
 de liebre. ⁊ dengelo a comer con carne de gato.
 fasta ix. dias. Et si rretouieren que non camjen
 son sanas. El xvijo. 
 Si el falcon ouiere la gota filera.
 puede sse connosçer por el rrostro ⁊ por
 las vnnas ⁊ por la çera que cahe del rrostro
 blanca. Et quando esto ouieren sepan que an
 aquella malatia. ⁊ conujene que tomen vna culuebra
 negra, ⁊ corten le vna mano con la cabeça
 ⁊ otra conla cola, ⁊ echen lo, ⁊ tomen lo
 que finca, ⁊ metan lo en vna olla nueua. ⁊
 tomen la grossura que saliere dende. ⁊ den
 gelo con carne de pauon caliente fasta
 ocho dias. despues tomen vna porçiella
 fembra ⁊ messen la con agua caliente. ⁊
 abran la, ⁊ tomen la ternjella del pecho
 que es foracada. ⁊ dengela a comer. Et si
 bien tollieren sepan que son sanas. El
 .xviijo. capitulo

[ 148v ]
  
 Quando el ffalcon a mal en la garffa
 connoçer lo an quando pussiere el un
 pie ssobre el otro. ⁊ ffiriere conel rrostro
 ssabran que ha la gota en la mano.
 Et tomen le ⁊ ssaquen le ssangre entrel
 pie ⁊ la cama de vna vena que ay. ⁊
 ssepan que ssera luego ssano
 El xixo. 
 Si quissieren mudar ayna el aue conuiene
 que tomen vna culuebra biua
 o dos o mas. ⁊ tuelgan les las cabeças.
 ⁊ lo al metan lo en vna vlla nueua a
 coçer. ⁊ cuegan tanto ffasta que todas
 sse desfacen. ⁊ ssaquen las ffuera de
 la olla. ⁊ dexen esfriar el caldo en la
 olla ⁊ coian toda la grossura. ⁊ den gela
 en la carne queles dieren a comer. Et
 estol ffaze los oios bermeios al açor.
 ⁊ las pennolas delas espaldas
 muy negras. ⁊ las de yusso muy
 blancas que ssemeia que es de muchas
 mudas. Et tomen uuas de ssauco. ⁊
 conel mosto dellas vnten le la carne
 a dessuso ⁊ den gela a comer
 El xxo. 
 La tisica ⁊ la çera que naçe
 del baço es muy mala
 enfermedat de ssanar ⁊ pocas aues
 dende guareçen. Et conuiene
 que tomen el aloen rruuio. ⁊ muelan lo.
 ⁊ echen les dello en ssu çeuo. ⁊ al
 segundo dia non les den aloen a comer. ⁊
 al terçero dengelo. ⁊ al quarto dia non. ⁊ al
 quinto dia denles vna taiada de carne con
 aloen ⁊ non mas. o tomen los grumos
 del sauco. ⁊ cuegan los en vna olla todol
 dia. ⁊ sea la olla llena. Et quando fuere
 bien cocha. fagan vn foyo en tierra. ⁊
 metan la olla y. ⁊ sea y bien dos meses.
 ⁊ quando quisieren yr a rribera denles vn
 poco daquello a comer El xxjo. 
 Quando
 quisieren guardar el açor que nunca se
 faga tisico. sinon por grandeza de rrostro
 quel dexan. dezimos assi que quandol dan
 la carne. ⁊ la grandez del rrostro traua
 enla carne que non gela dexa tragar a
 de rressollar por las narizes. ⁊ fazesseles
 vna espuma enellas que deçende
 al cuerpo, ⁊ fazes tisico poco a poco.
 mas por esquiuar esto que non sea. Conuiene
 quel faga omne el rrostro a su sazon
 quandol ouiere meester. Et por aquella espuma
 que acogecha. conujene quel de omne
 carne en que aya neruios. ⁊ magen
 la en clara de hueuos ⁊ dengela. Et esto
 le guaresçe del espuma antes que sea tisico.
 Et si fuere fecho tisico. a meester
 que tomen la rruda. ⁊ las maluas ⁊ el apio.
 ⁊ magen lo bien. ⁊ saquen el çumo dello. ⁊
 colen lo bien con vn panno de lino. Et tomen
 la grossura del puerco que ssea criado de pan
 ⁊ que non sea de monte njn verraco. ⁊ tomen
 aquella sayn. ⁊ rritan la en vna sarten linpia
 ⁊ colen lo. ⁊ despues que fuere colado. tomen
 las dos partes daquella ssayn. ⁊ la terçera

[ 149r ]
  
 del çumo delas yeruas que dixiemos.
 ⁊ mezclen lo bien. ⁊ metan lo en
 vna bostia. ⁊ yeles. ⁊ tomen el açor
 despues que ouiere comjdo a la noche. ⁊
 tengan le çerca del fuego. ⁊ denle a
 comer daquel unguente. Et si el açor
 ouiere mal enla cabeça. ⁊ non viere. tomen
 aferrizuelo que sea conuenjble pora
 sangrar le de amas las uenas delos oios
 o delas narizes. ⁊ tomen otro fierro
 tal commo el dela sangria. ⁊ ssea fecho
 de cobre. ⁊ calienten le al fuego. ⁊ quemen
 le aquellas uenas quel taiaron. ⁊ de
 mjentral quemaren aquellas uenas, tenganle
 vnas tabliellas delgadas ante
 los oios. ⁊ a terçer dia uera. Et si
 non quisiere comer; denle a comer mures pequennos.
 ⁊ passaros tiernos. ⁊ esto
 les fara comer ⁊ aduzir los a ssanjdat.
 El xxijo. 
 Si el açor oujere vna
 emfermedat quel dizen aguja. conujene
 que tomen del cabirol. ⁊ denle el
 figado. o del coraçon a comer caliente assi
 commol sacaren del cabirol. ⁊ pongan le
 al sol de guisa quel de el sol bien enlos
 oios ⁊ enlos pechos. Et commo el ssol
 le fuere dando assi camjara quanto toujere
 enla goria. ⁊ pongan le vn panno
 de yuso. ⁊ ueran la malatia commo la
 echa. Et si oujere el aguja enla goria
 que non la aya enel cuerpo conujene que tomen
 delos pelos dela pelleia beuerina ⁊
 tomen la mjel ⁊ los pelos ⁊ amassen lo
 en vno. ⁊ fagan tres pelliellas tamannas
 commo fauas. ⁊ unten las con dela mjel
 adessuso. ⁊ abran le la boca. ⁊ echengelas
 dentro quelas trague. ⁊ nol den otra cosa
 njnguna a comer. ⁊ pongan le al sol. ⁊ camjara
 aquello que tiene conla dulcedunbre dela
 mjel. ⁊ echara la enfermedat fuera.
 El xxiijo. 
 Si ouiere
 el açor pioios. conujene que tomen
 delos granos del bariso. ⁊ si non los pudieren
 auer tomen la pimjenta molida. ⁊
 destienpren la con el vino, o con del vjnagre
 fuerte. ⁊ vnten le bien el cuello ⁊ açerca
 delas alas. ⁊ deyuso delas alas en
 la carne biua. Et otro dia caeran todos
 muertos. Et si el çeuo quisiere camjar
 o oujere algun enodio, denle del agua muchas
 uezes a beuer. ⁊ nol den a comer fasta
 enla noche. Et a la noche den le buena
 carne caliente a comer. ⁊ ayan conssigo
 la yerua menuda quel dizen eya. ⁊ naçe
 enlos logares pedregosos çerca dela carrera.
 ⁊ echen le daquellos poluos sobre la
 carne quel dieren. Et den le a beuer, ⁊ fazer
 le a pro al bolar. ⁊ al comer. ⁊ fer
 le a retener el çeuo que non lo eche. Et
 tomen el argent viuo. ⁊ mezclenlo
 con la saliua del omne ⁊ con la çenisa mezclado
 todo en vno. ⁊ mezclen lo fasta que
 muera el argent biuo. ⁊ tomen el vnto
 anneio. ⁊ mezclen lo con argent biuo.
 ⁊ despues unten le en somo dela cabeça
 con ello. ⁊ tomen vn filo de lana. ⁊ vntenlo

[ 149v ]
  
 bien. ⁊ pongan gelo al cuello. ⁊ morran todos
 los pioios. Et si cayere tinna. en alguna 
 pennola. tomen la pennola ⁊ tiren gela ⁊
 alimpienle aquel poro dont aquella pennola saliere.
 ⁊ monden gelo bien ⁊ si saliere sangre
 saquen la bien toda. ⁊ metan enel forado esta
 melezina. el agriment fecho poluo sobre vna
 teia muy rroia, ⁊ la simjente dela
 rruda, ⁊ la neguiella. ⁊ destienprenlo bien
 con el vjno o con el vinagre fuerte. ⁊ jncan
 bien aquel poro dont salio la pennola.
 ⁊ tomen otra pennola de qual aue se quier que abenga
 en aquel logar de guisa que non sienta
 el cannon. ⁊ metan gelo. ⁊ sanara luego aquella
 tinna. que non podra mas passar a otra
 pennola njnguna. El xxiiijo. 
 Si vieren el aue
 gruessa. ⁊ quisieren que sea ayna magra
 denle dela sangre del pulçin tierno. o del
 pulmon, ⁊ ssera luego magra.
 El xxvo. 
 Si fuere el aue magra ⁊ la quisieren
 fazer gruessa. denle del coraçon del
 puerco caliente con toda su grossura. ⁊ sera
 luego gruessa. El xxvio. 
 Quando oujere
 tesga el açor enel vjentre. conujene
 que tomen la grana del sauco, ⁊ magenla
 bien ⁊ saquen el çumo della. ⁊ mogen la carne
 enello ⁊ dengelo a comer dos uezes o tres
 Et si non pudieren auer grana madura tomen
 la seca ⁊ fagan la poluos. ⁊ enbueluan
 la carne en aquellos poluos, ⁊ dengelo a
 comer. El xxvijo 
 Si oujere
 tesga enla cabeça. Conujene que tomen
 del çumo dela yedra. ⁊ echen gelo
 enlas narizes. o tomen del agriment ⁊
 dela sal tanto delo vno commo delo al. ⁊
 quemen lo sobre vna teia vermeia. ⁊ fagan
 tanto poluo dela teia quanto fuere
 la sal. ⁊ muelan lo tanto ques pueda
 çerner con vn panno delgado. ⁊
 despues echen gelo con vn cannudiello
 enlas narizes. El xxviijo. 
 Si oujere tesga enla fiel
 tomen el lardo del puerco rraziente.
 ⁊ rritan lo bien. ⁊ tomen el çumo
 dela sabina. ⁊ bueluan lo con aquella sayn.
 ⁊ fierua vn poco. ⁊ despues colen
 lo con vn panno muy delgado. ⁊ despues
 moien la carne en aquel vnguent
 quando lo quisieren dar al açor. Et si
 ouiere aguja tomen el estentino dela
 gallina ⁊ alinpien lo bien ⁊ sea tan
 luengo commo medio pie o commo tres dedos
 o commo dos. ⁊ jncan le de çumo de assenssio.
 ⁊ atenle damos cabos bien con vn
 filo, ⁊ dengelo de guisa commo trague entero.
 Et si oujere aguja enla cabeça den
 le a comer delas aues que buelan de noche
 calientes. Et si oujere tesga. tomen del
 aloen. ⁊ fagan lo poluos, ⁊ pongan lo de guisa
 en vn bocado de carne que non lo entienda
 el açor quando lo comjere. Et
 si oujere vna malatia quel dizen sembradura

[ 150r ]
  
 tomen los granos dela mirra. ⁊ muelan
 los bien. ⁊ den les a comer aquellos
 poluos con la carne
 El xxixo. 
 Si quissieren toller las tinnas
 que non nazcan. tomen las
 ffoias del çeruelo. ⁊ dela beruena.
 ⁊ maien las todas en vno. ⁊
 con esto vnten las pennolas al açor.
 ⁊ ssi ouiere pioios den le a comer
 la carne del cabrito. El xxxo 
 Quando quissieren purgar la cabeça
 al açor o al ffalcon. tomen
 la pez linpia tanto commo vna faua.
 ⁊ calienten la al ffuego ⁊
 assi blanda pongan gela enel paladar
 ⁊ dexen gela y apegada. Et
 despues tomen quatro granos de ffabarraz.
 ⁊ tomen vn poco de pimjenta
 blanca ⁊ muelan la bien. ⁊
 bueluan la con la pez ⁊ pongan
 gela enel paladar. Et los poluos
 que ffincaren echen gelos en las narizes
 [...] la malabtia dela cabeça ⁊
 despues delas oras del dia passadas
 den le a comer ssu carne.
 El xxxj. 
 Quando quissieren estrennir el paladar
 tomen la mjel vieia ⁊
 manteca. ⁊ dela çelidonja tanta delo
 vno commo delo al. ⁊ bueluan lo
 bien ⁊ dengelo a comer con la
 carne caliente. El xxxijo. 
 Si pareçiere la nuf enel oio conuiene
 que tomen la pimjenta. ⁊ el
 aloen tanto delo vno commo delo al.
 ⁊ pongan lo ssobre la nuf. Et ssi
 ffuere tienpo que puedan auer çiruelas
 montessinas tomen del çumo
 dellas ⁊ echen gelo enel oio
 El xxxiijo 
 Si enel pulmon o en la goria ouiere
 algun mal tomen el estiercol
 delos passariellos ⁊ el estiercol
 delos mures. ⁊ del aloen de cada
 vno vna dragma ⁊ granos de
 pimienta blanca. ⁊ dela ssal pedres dos
 dragmas ⁊ dela lana ssuçia vna
 dragma. ⁊ tomen lo todo ⁊ muelan
 lo bien en vno. ⁊ tomen del olyo.
 ⁊ dela mjel .vij. gotas. ⁊ tomen
 leche de muger que cria njnno maslo
 ix gotas. ⁊ mezclen lo todo
 en vno ⁊ ffagan tres pinnolas tamannas
 cuemo el auellana. ⁊ echen
 gelas en la goria. ⁊ tengan el açor
 en mano ffasta las dos
 oras passadas del dia que ayan camiado
 aquello que tienen en la goria. Et
 despues que ouieren camiado ⁊ tengan
 le vn poco en mano ⁊ despues pongan
 le çerca de agua si quisiere
 beuer beua. Et depues que ouiere

[ 150v ]
  
 beujdo den le a comer del pulmon
 del cordero tierno que non aya paçido
 yerua. Et despues den le
 a comer carne liuiana cada dia
 en la noche den le passaros quanto quissiere.
 El xxxiiijo. 
 Si demuestra el açor que ssuffre
 en ssi tomen vna dragma de orpimente
 ⁊ ix granos de pimjenta ⁊ muelan
 lo bien ⁊ ffagan lo poluos con vna
 dragma de granos de trigo. ⁊
 mezclen lo todo en vno ⁊ echen gelo
 ssobre la carne caliente ⁊ den gelo a
 comer. o tomen tres taiadas de lardo de
 puerco tamannas quelas pueda tragar
 ⁊ mogen las en la mjel ⁊ echen
 les las limaduras de ffierro. ⁊ den
 gelas a comer ⁊ esto les ffagan tres dias
 ⁊ non les den al comer. Et al
 quarto dia. tomen vn polliello
 chico. ⁊ enbriaguen lo con vino calienten
 le bien del pecho al ffuego
 ⁊ quando ffuere bien caliente fiergan
 el pecho del pollo bien ques buelua
 la ssangre ⁊ el vino ⁊ que
 ssuba al pecho ⁊ mogen la cabeça
 del pollo con leche ⁊ den gelo a
 comer por tres dias la carne del
 pollo assi ⁊ tengan le en vn punno
 por que non canbie ⁊ den adelantre
 den le carne de passariellos ⁊
 otras carnes ssanas ⁊ guareçran
 luego. El xxxvo. 
 Sil comieren gussaniellos dentro
 enel cuerpo tomen vn estentino
 de pollo ⁊ lauen le bien con
 agua ⁊ ffagan del tres pedaçuelos
 tamannos commo el purgar ⁊ yncan
 los de azeyte claro ⁊ aten los
 damos cabos. ⁊ ffagan gelos tragar
 otro dia tomen las rrayduras del
 marfil ⁊ del estiercol delos passaros
 atanto delo vno commo delo al
 ⁊ muelan lo de guissa que ssea bien
 molido ⁊ den gelo con ssu çeuo a
 comer. ⁊ al terçer dia tomen la
 pelleia dela garua
 ⁊ quemen la en vn tiesto que nol
 de ffumo nj la llama ⁊ tomen
 dello vna dragma ⁊ delas
 rrayduras del marffil ⁊ del estiercol
 delos passaros de cada vno
 vna dragma ⁊ muelan lo bien
 ⁊ den gelo a comer con la carne caliente.
 Et al quarto dia tomen
 la limadura del azero muy menuda
 ⁊ del marffil tanto delo vno
 cuemo delo al. ⁊ den gelo a comer
 con carne caliente
 

[ 151r ]
  
 Quando ouiere mal en las rrenes
 tomen el coraçon del pollo ⁊ echen
 enel del poluo dela camidria
 ⁊ den gelo a comer ⁊ ssanara luego
 Si quissieren melezinar el ffigado
 conuiene que tomen los carbones
 del rrobre vna dragma ⁊
 muelan los bien. ⁊ enbriaguen el pollo
 ⁊ den gelo a comer con estos poluos
 Quando quissieren toller el ffastio
 ⁊ la ssequedat tomen el hueuo
 ⁊ cuegan le en la leche ssin
 ffumo njnguno ffasta que ssea duro ⁊
 ssea cocho en ssarten que ssea linpia.
 ⁊ den gelo a comer dos vegadas
 o tres ⁊ ffazer pro a toda enffermedat
 Si comiere la tinna las pennolas
 tomen el balssamo ⁊ pongan lo en
 los fforados dont caen las pennolas
 ⁊ morra la tinna ⁊ naçran las
 pennolas nueuas
 Si ouiere malabtia quel fforade los
 pies tomen la corteza del medio
 del enebro non la primera nj la
 de çaguera del ffuste mas
 la que es entre la vna ⁊ la otra
 ⁊ ssaquen la ⁊ mezclen la bien
 ⁊ den gela a comer en la carne quel dieren
 ⁊ den gela vn dia ⁊ otro non.
 Quando le yncharen los pies tomen
 el aloen ⁊ el aluura del hueuo
 ⁊ bueluan lo bien en vno ⁊ tomen el
 aguzadera ⁊ trayan esto tanto por
 ella ffasta que la vmor del aguzadera
 ssea mezclada con esta melezina
 ⁊ vnten los pies conel ffasta queles pare
 costra a dessusso. Et quando ffuere
 fecha la costra vnten les
 los pies conel xabon bueno ⁊ al
 terçer dia vnten los conel otra melezina
 ⁊ ssanara
 Si creçiere la carne en algun logar
 tomen la cal ⁊ el aloen tanto
 delo vno commo delo al ⁊ pongan lo
 ola carne creçiere ⁊ ssanara
 Quando quissieren ssanar los pies
 tomen la mjel ⁊ las ffoias dela
 ssaxifraga ⁊ dela beruena ⁊ dela llanten
 ⁊ ssequen lo ⁊ ffagan lo poluos, ⁊
 bueluan lo con la mjel ⁊ den gelo a
 comer con ssu çeuo caliente ⁊ ssanara
 Pora toller el ffumo tomen
 la ssayn vieia del puerco
 ⁊ la mjel ⁊ dela ssimjente del apio
 ⁊ den gelo vna vez ⁊ sanara
 luego
 

[ 151v ]
  
 Quando comjença a mudar ⁊ a meter
 pennolas nueuas deuen dezir assi
 el quel muda uolatilia tua de ssub
 pedibus tuys
 Quando ouiere mudado el [...] ⁊ tomaren
 dela uara primera mjentre pora caçar
 digan assi ssi algun maluaz omne te
 lego dios te abssuelua por el sso abenjmjento.
 Quando ffuere muy gruesso ques desaynara
 tomen el ffuste dela ssarça
 ⁊ muelan lo bien ⁊ den gelo con ssu ceuo
 caliente ⁊ ssera ssano
 Por que quiera bien al omne que nol delexe
 tomen el apio ⁊ la pimjenta
 negra ⁊ el perexil ⁊ magen lo
 bien en vno ⁊ den gelo con la carne
 caliente a comer
 Quando ouieren miedo del aguila
 quel non ffaga mal deuen dezir
 quando van a caçar vinçit leo de
 tribu juda rradix dauid alleluya
 alleluya aquis acaba el primero libro ⁊
 comjença el ssegundo
 